ძანეტი ტიფოზებს შემოუწყრა

ემილიაში ჩასულმა "ნერაძურის" ტიფოზებმა სტვენით გააცილეს ფეხბურთელები მოედნიდან, რამაც ძანეტი გააღიზიანა "ინტერს" რომ რთული დროება დაუდგა, არახალია. მილანური გრანდი ჩემპიონთა ლიგის გათამაშებას გამოეთიშა და სკუდეტოსთვის ბრძოლას ჩამოშორდა, რაც გულშემატკივრებმა მტკივნეულად მიიღეს. "პარმასთან" განცდილი მარცხის შემდეგ, ემილიაში ჩასულმა "ნერაძურის" ტიფოზებმა სტვენით გააცილეს ფეხბურთელები მოედნიდან, რამაც ხავიერ ძანეტის გაღიზიანება გამოიწვია. მოვუსმინოთ არგენტინელს და შემდეგ განვავრცოთ თემა:"კარგად იცით, რომ მთელი საფეხბურთო კარიერა "ინტერს" შევწირე და თუ რამეს ვაკეთებდი, მხოლოდ ჩვენი გულშემატკივრებისთვის. ბოლო წლებში, ყველაფერი მოვიგეთ რისი მოგებაც შეიძლებოდა და ტიფოზებიც არაერთხელ გავახარეთ. ამიტომ, ცოტა გულდასაწყვეტი იყო, როდესაც "პარმასთან" განცდილი მარცხის შემდეგ ობსტრუქცია მოგვიწყვეს და სტვენით გაგვაცილეს მოედნიდან. კარგად მესმის, რომ ეს მხოლოდ მცირე ნაწილია გულშემატკივრების, მაგრამ მაინც საწყენია. სეზონი ისეთი არ გამოვიდა, როგორიც წარმოგვედგინა, მაგრამ ჯერ კიდევ ვაგრძელებთ ბრძოლას და უმჯობესია, შედეგებს მაისის ბოლოს გადავხედოთ. ჩვენი უმთავრესი მიზანი იტალიის თასის მოგებაა და საამისოდ თავს არ დავზოგავთ."პრესასთან ურთიერთობას ერიდება ლეონარდო, რომელიც მთლად კარგ ხასიათზე ვერ უნდა იყოს. სულ რაღაც რამოდენიმე თვის წინ, მილანის ერთი ნახევარი აღმერთებდა, მეორე კი პატივცს სცემდა - დღეს, ერთი ნახევარი მოღალატედ მიიჩნევს, მეორე კი აგინებს. ამ ფონზე, ძნელია დარჩენილ შეხვედრებზე კონცენტრაციის მოხდენა და იმაზე ფიქრი, რომ იტალიის თასი გაქვს მოსაგები. თუმცა, "ინტერის" მიზნები მხოლოდ კოპას მოგებით არ შემოიფარგლება და სწორედ ამაზე ამახვილებს ყურადღებას დეიან სტანკოვიჩი:"ბოლო წლებში, დიდ გამარჯვებებს მივეჩვიეთ და არ შეიძლება, რომ მიმდინარე სეზონში უტიტულოდ დავრჩეთ. ამიტომ, მაქსიმალური მობილიზებაა საჭირო, რომ იტალიის თასზე წარმატებით გამოვიდეთ და ეს ტროფეი მაინც მოვიგოთ. თუმცა, ეს იმას არ ნიშნავს, რომ ეროვნულ ჩემპიონატზე უმოტივაციოდ ვართ დარჩენილნი - "ლაციო" კუდზე დაგვაჯდა და თუ თამაშს არ გამოვასწორებთ, მესამე ადგილსაც დავკარგავთ. ეგ კი არა, "უდინეზეც" საკმაოდ ახლოა და დროა გონს მოვეგოთ, თორემ შეიძლება სულაც ჩემპიონთა ლიგის მიღმა დავრჩეთ. რამ გამოიწვია ასეთი ჩავარდნა? - რა გითხრათ, გასული ორი კვირა მართლაც კატასტროფული იყო და ვცდილობ, გავიგო რატომ მოხდა ასე. ფაქტია, რომ რაღაც მოიშალა მექანიზმში და ყველაზე საჭირო მომენტში პოზიციები დავთმეთ. კიდევ ასჯერ რომ შევხვდეთ "შალკეს", დარწმუნებული ვარ, რომ ასეთი ანგარიშით არც ერთხელ არ წავაგებთ. რა მოხდა იმ დღეს და რატომ წავაგეთ ასე კატასტროფულად, წარმოდგენა არ მაქვს."ამასობაში, სულ უფრო და უფრო ხშირად ვრცელდება ინფორმაციები იმის შესახებ, რომ მომავალი სეზონიდან "ინტერს" შესაძლოა ჟოზე მოურინიო დაუბრუნდეს. სწორედ პორტუგალიელის ხელში მოიგო მილანურმა გრანდმა ის, რასაც გულშემატკივრები ათეულობით წლების განმავლობაში ელოდნენ: ჩემპიონთა ლიგა. ამიტომ, გუნდის მთავარი მწვრთნელის პოსტზე გულშემატკივრებს ყველაზე მეტად მაინც ჟოზეს ხილვა სურთ და იმედიც აქვთ, რომ ეს დღე აუცილებლად დადგება. მით უმეტეს, მოურინიოს მადრიდული მომავალი ბუნდოვანია და ესპანური პრესა ხშირად წერს პორტუგალიელის პირინეიდან აბარგების შესახებ. ბოლოდროინდელი წარუმატებლობებისა და მოურინიოს "ინტერში" შესაძლო დაბრუნების შესახებ პრესასთან მასიმო მორატიმ ისაუბრა:"შედეგებით რა თქმა უნდა უკმაყოფილო ვარ, მაგრამ ისიც კარგად უნდა გვესმოდეს, რომ ყოველთვის ყველაფერს ვერ მოვიგებთ. რთული დროება გვიდგას და ეს პერიოდი ერთად უნდა გადავლახოთ. რაც შეეხება ჟოზე მოურინიოს დაბრუნების საკითხს, ამაზე საინტერესოს ვერაფერს გეტყვით. პორტუგალიელი მადრიდის "რეალს" უდგას სათავეში და არასდროს უთქვამს, რომ კონტრაქტის დარღვევას და ესპანეთის დატოვებას აპირებს. შესაბამისად, მასთან მოლაპარაკების წამოწყებაზე არც კი მიფიქრია და არც მას გამოუთქვამს ჩემთან დალაპარაკების სურვილი. მოკლედ, ჟოზეს დაბრუნებაზე საუბარი ამ ეტაპზე აზრს მოკლებულია."დაბოლოს, სანტრასფერო ინფორმაცია "ინტერის" შესახებ. "გაძეტა დელო სპორტის" მიერ გავრცელებული ინფორმაციის თანახმად, მომდევნო სეზონიდან მილანური გრანდი "ბოლონიას" მეკარე ემილიანო ვივიანოს გადაიბირებს. შეგახსენებთ, რომ ვივიანო ერთ-ერთ საუკეთესო კიპერად ითვლება აპენინებზე და იტალიის ეროვნულ ნაკრებშიც სტაბილურად იძახებენ. მეტიც, დღეს ვივიანო ჯანლუიჯი ბუფონის უპირველეს შემცვლელად მოიაზრება. "ნერაძურის" მესვეურები მას შემდეგ დაფიქრდნენ ახალი კიპერის შეძენაზე, რაც ჟულიო სეზარმა შეცდომებს უმატა და მის გამო გუნდმა მნიშვნელოვანი ქულები დაკარგა. ამასთან, სეზონის განმავლობაში რამდენჯერმე მიიღო ტრავმა და კარგა გვარიანი დროც გაუცდა. ვივიანო გახარებულია იმით, რომ მის მომავალს "ინტერს" უკავშირებენ:"ჯერჯერობით, "ბოლონიას" მეკარე ვარ და მხოლოდ სეზონის დარჩენილ შეხვედრებზე ვფიქრობ. მეც გავიგე იმის შესახებ, რომ ჩემით "ინტერია" დაინტერესებული და არის შანსი, სწორედ მილანურ გრანდში ამოვყო თავი. მინდა თუ არა "ნერაძურიში" გადასვლა? - ვის არ უნდა? - ჩემი აზრით, "ინტერი" საუკეთესო გუნდია მსოფლიოში და მისი ღირსების დაცვა ჩემთვის დიდი პატივი იქნებოდა. სიმართლე გითხრათ, ძალიან სასიამოვნოა, როდესაც ასეთ დიდ გუნდში გადასვლას გიწინასწარმეტყველებენ. მთავარია კლუბები შეთანხმდნენ და ასეთ შემთხვევაში, ტრანსფერის საწინააღმდეგო არც მე მექნება რამე.".

[VIDEO] დე ბრუინის სადებიუტო გოლი - "ნაპოლიმ" ჩემპიონატი გამარჯვებით დაიწყო

"ნაპოლი" ელმასის დაბრუნებას ცდილობს

"მილანი" დივოკ ორიჯის კონტრაქტს გაუწყვეტს და კომპენსაციას გადაუხდის

"ლიონი" - "მეცი". სამივე ქართველი სასტარტოშია

20 წლის ქართველი ფეხბურთელი "მილანთან" მატჩის განაცხადშია

"რეალმა" ტონი კროოსის შემცვლელს "კრისტალ პალასში" მიაგნო - "არწივები" 80 მილიონს ითხოვენ

"სამზარეულოში გიშვებდა და საჭმელს გაკეთებინებდა" - "იუნაიტედის" ყოფილმა მეკარემ სერ ალექს ფერგიუსონზე საინტერესო ისტორია გაიხსენა

"ყველაფერს გავაკეთებ, რომ კურტუას დონეზე ავიდე" - ლუნინმა "რეალიდან" წასვლა გამორიცხა

[VIDEO] ბუნდესლიგა უხვგოლიანი მატჩით გაიხსნა - "ბაიერნმა" "ლაიფციგი" გაანადგურა

ხვიჩას გარეშე. პსჟ სეზონს მძიმედ იწყებს - "ანჟესაც" მინიმალური ანგარიშით მოუგო

ლოჩოშვილის "ნიურნბერგი" ისევ დამარცხდა

"კვარას" ბარკოლა შეცვლის - "ანჟესთან" მატჩში პსჟ-ს სასტარტო შემადგენლობა ცნობილია

დე ლაურენტისი: "კვარა" და ოსიმენი პსჟ-სთვის 200 მილიონზე მეტად უნდა მიმეყიდა, მაგრამ...

პსჟ-ს მეკარე შეიძლება ესპანურ გუნდში გადავიდეს

"შავი ლომი" | 30 მორაგბით იტალიაში

ჩაკვეტაძის "ვალენსიაში" გადასვლა დღითიდღე არარეალური ხდება - როგორ აფასებენ ტრანსფერის შანსებს?

29 წლის ასაკში ქართველი ფეხბურთელი ტრაგიკულად დაიღუპა

"ამ ფეხბურთელმა ნამდვილად გამაოცა" - ოდეგორმა თანაგუნდელი გამოარჩია

ოფიციალურად: მატიჩი კარიერას სერია A-ში გააგრძელებს

"დარწმუნებული ვარ, ფორმაში შესასვლელად დიდი დრო დასჭირდება" - უოლკოტმა დიოკერეშზე ისაუბრა

"რასაც "კრასნოდარი" სპერციანს უკეთებს, ამას ეგოიზმი ჰქვია" - სომეხმა ჟურნალისტმა რუსული კლუბი გააკრიტიკა

"ჩეფერინი რუსულ ფეხბურთზე გიჟდება და მის ევროპულ არენაზე დასაბრუნებლად იმაზე მეტს აკეთებს, ვიდრე შეუძლია" - ვალერი კოლოტილო

მატჩის დღე! ხვიჩა კვარაცხელია განაცხადში არაა