
Sportando-ს ჟურნალისტი ალესანდრო ლუიჯი მაჯი თავისი „ტვიტერით“ საქართველოს ნაკრების კაპიტნის, თორნიკე შენგელიას მიმართ „ბარსელონას“ დაინტერესების შესახებ იტყობინება.
მაჯის ცნობით, კატალონიური კლუბი შენგელიას კარგ, სამწლიან კონტრაქტს სთავაზობს, რომელიც უკვე განიხილება.
თორნიკეს „ვირტუსთან“ ხელშეკრულება ზაფხულამდე აქვს გაფორმებული, თუ შეთავაზებას დათანხმდა, „ბარსას“ თავისუფალი აგენტის სტატუსით შეუერთდება და ხუთი წლის შემდეგ დაბრუნდება ლიგა ენდესაში, სადაც 2014-2020 წლებში „ბასკონიაში“ დაუვიწყარი თამაშით დაგვამახსოვრა თავი.
33 წლის შენგელია ამ სეზონში ევროლიგაში 15,6 ქულას, 5.0 მოხსნას და 2.7 პასს აგროვებდა, მისმა გუნდმა კი სეზონი 9 მოგებითა და 25 წაგებით დაასრულა.