<p>ამ უქმეებზე ტიუმენში "დიდი პრიზის" ტურნირი დასრულდა <br> ამ უქმეებზე ტიუმენში დასრულდა "დიდი პრიზის" ტურნირი - ივან პოდუბნის მემორიალი ბერძნულ-რომაულ ჭიდაობაში, რომელშიც რუსეთის და მისი რეგიონების გარდა, აშშ-ის, ყაზახეთის, უზბეკეთისა და კიდევ რამდენიმე წამყვანი ქვეყნის გუნდები გამოდიოდნენ.</p><p>თავშივე გაგაცნობთ გამარჯვებულებს: სტეფან მარანიანი (55), რუსტამ ხუჩბაროვი (60), ადამ კურაკი (66), რომან ვლასოვი (74), ალექსეი მიშინი (84), ნიკიტა მელნიკოვი (96; ყველა - რუსეთი) და ნი სიაომინი (120, ჩინეთი).</p><p>სხვების არ ვიცი, რუსებისთვის კი ეს 19-24 მარტს თბილისში გასამართი ევროპის პირველობისთვის მთავარი შესარჩევი შეჯიბრება იყო. ამდენად, შეგვიძლია ვივარაუდოთ, რომ ჩამოთვლილთაგან ბევრი მარტში თბილისშიც გვესტუმრება, თუმცა არის ერთი გარემოება - რუსთა ქართველმა თავკაცმა გოგი კოღუაშვილმა თავდაპირველი დაპირება ბოლო მომენტში შეცვალა და ლონდონის ოლიმპიადის მედალოსანთა უმეტესობა დაასვენა.</p><p>იმათგან მხოლოდ ჩემპიონმა რომან ვლასოვმა იჭიდავა და დამაჯერებლადაც გაიმარჯვა. თბილისამდე რუსები თეირანშიც იჭიდავებენ მსოფლიოს თასზე და, სავარაუდოდ, "ოქროს დიდ პრიზებზეც" გამოვლენ თურქეთსა და უნგრეთში.</p><p>კოღუაშვილიც ამის შემდეგ დაასახელებს თბილისში წამოსაყვან შემადგენლობას, თუმცა გარკვეული დასკვნების გაკეთება, თუ ვისზე აიღონ სწორება ჩვენმა მწვრთნელებმა, ახლავე შეიძლება.</p><p><strong>ჩინელები მსოფლიოს აქაც უტევენ</p><p></strong>მართალია, ჩინელი მძიმეწონოსანი თბილისში ვერანაირად ვერ გვესტუმრება ევროპირველობის საჭიდაოდ, თუმცა ამ ათლეტის გამოსვლა მაინც საკმარისია ყურადღების მისაქცევად.</p><p>მძიმე წონაში რუსებს კრიზისი აქვთ და არც ტიუმენში ჩასულ სხვა გუნდებს მოეძევებოდათ ვარსკვლავები, მაგრამ სიომინის ზეობას მთლად საკადრო კრიზისსაც ვერ დავაბრალებთ, თვითონაც ძალიან ძლიერად იჭიდავა.</p><p>ჩინელების და მათი ალქიმიისას ბევრს ვერაფერს გაიგებ (ანუ არ გამოვრიცხავთ, რაღაც აკრძალული მეთოდებითაც იყო ასეთ ჩინებულ ფორმაში), მაგრამ ამ მომზადების სტაბილურად შენარჩუნებას თუ შეძლებს, მაშინ მძიმე წონას ახალი ფავორიტი მოვლენია და ეგაა.</p><p>თუმცა არ გამოვრიცხავთ, მათთვის ჩვეული ალქიმიკოსობით იქნებ ამ ტურნირს შეხვდა ასე კარგად მომზადებული და მომავალში ტემპი დააგდოს, მაგრამ ფაქტია, რომ მან 2007 წელს ახალგაზრდებში მსოფლიოს პირველობაზე ბრინჯაოსთვის იჭიდავა.</p><p>მართალია, მაშინ ის 96-ში გამოდიოდა და ზემოხსენებულ მელნიკოვთან დამარცხდა, მაგრამ, ეტყობა, მას შემდეგ მიზანდასახულად ივარჯიშა, შეცდომებზე ისწავლა და ტიუმენში საშიშ მეტოქედ მოგვევლინა.</p><p>ჩინელები ამ საჭიდაო სტილში ლიდერებს არ მიეკუთვნებიან, მაგრამ ბოლო წლებში, ანუ მას შემდეგ, რაც მშობლიური პეკინის ოლიმპიადისთვის დაიწყეს მზადება, მოულოდნელი გამოხდომები ახასიათებთ - 2006 წელს მსოფლიოს პირველობაზე ოქრო მოიპოვეს, 2011-ში - ბრინჯაო, პეკინის ოლიმპიადაზე კი ოქრომდე მანუჩარ კვირკველიამ (74) არ მიუშვა და ვერცხლს დააჯერა. ცხადია, ასეთ გამოხდომებში მათ პროფესიონალიზმი და ცნობილი ჩინური ხასიათიც ეხმარებათ.</p><p><strong></p><p>მიშინი არ ნებდება</strong></p><p>პოდუბნის ტურნირის სხვა გამარჯვებულებიდან გამოსარჩევია მსოფლიოსა და ოლიმპიურ ჩემპიონ ალექსეი მიშინის გამოსვლა, რომელმაც ასევე ძალიან დამაჯერებლად იჭიდავა. არადა, ბაშკირეთის წარმომადგენელი უკვე 33 წლისაა.</p><p>იმდენად კარგად იჭიდავა, ფრიად გულდასაწყვეტია, ტიუმენში მისი და ოლიმპიურ ჩემპიონ ალან ხუგაევის პაექრობა რომ ვერ ვიხილეთ.</p><p>საინტერესოა, მათგან ვინ ჩამოვა თბილისში? ჩვენზე არაა დამოკიდებული, თორემ ინტრიგისთვის ხუგაევი გვირჩევნია - ამით ვლადიმერ გეგეშიძეს მასთან ოლიმპიადაზე მარცხისთვის რევანშის შანსი მიეცემოდა, თუმცა ევროპაზე გამოსვლა ჯერ არც ჩვენებურს გაუნაღდებია.</p><p>66-ში კვლავ დამარცხდა ჩვენი მსოფლიოს ჩემპიონი თანამემამულე ამბაკო ვაჩაძე, რომელიც პრიზიორებშიც ვერ მოხვდა. აქ ფინალამდე კი მივიდა ნაკრებში მისი ოდინდელი ჩეჩენი მეტოქე, ევროპის, მსოფლიოსა და ოლიმპიური ჩემპიონი ისლამ-ბეკ ალბიევი, მაგრამ ადიღეელ ადამ კურაკთან ვერაფერს გახდა.</p><p>ადიღეელმა დამაჯერებლად მოუგო და პირველად მოიპოვა ასეთი დიდი წარმატება, რაც მას გზას უხსნის საერთაშორისო სარბიელისკენ.</p><p>60-ში რევაზ ლაშხის ერთ-ერთ სავარაუდო კონკურენტად რუსტამ ხუჩბაროვი ამოიზარდა, რომელიც აქამდეც შედიოდა რუსეთის ნაკრების გაფართოებულ შემადგენლობაში.</p><p>ამ წონაში არ უჭიდავია მსოფლიოსა და ოლიმპიურ პრიზიორ ზაურ კურამაგომედოვს, მაგრამ, ვფიქრობთ, კოღუაშვილი ამ ეტაპზე პირველ ნომრად მაინც ხუჩბაროვს დააყენებს და თბილისშიც მას ჩამოიყვანს. მით უფრო, 55-იდან ამონაცვლებული ოლიმპიური ჩემპიონი ნაზირ მანკიევი მესამეზე დარჩა.</p><p>თან ხუჩბაროვი მეორეზე გასულ ივან კუილაკოვზე ბევრად გამოცდილი და მებრძოლია. სავარაუდოდ, ნაზირ მანკიევი საბოლოოდ შეიცვლის წონას - ეს მას წინა წლებშიც სურდა და თან 55-ში ძმას, ბეკხან მანკიევსაც აღარ გადაეღობება.</p><p>თუმცა ინგუშ ფალავანს 60-ში ბიძაშვილი - ახმედ ჩაკაევი ხვდება, რომელმაც ამჯერად გამოტოვა ეს შეჯიბრება.</p><p>ხუჩბაროვის დარად, მელნიკოვი და მარანიანიც დიდი ხანია იბრძვიან თავიანთ წონებში ლიდერობისთვის. მელნიკოვს შარშან ეს რუსტამ ტოტროვმა არ დაანება.</p><p>ვნახოთ, რა მოხდება წლეულს მათ დავაში, თუმცა ლონდონის ოლიმპიადის ვიცე-ჩემპიონმა ტოტროვმა ყოველმხრივ აარიდა თავი პოდუბნიზე ჭიდაობას. დიდი შანსია, მან ევროპისთვის მოსამზადებელი ციკლიც გამოტოვოს და თბილისში მაინც მელნიკოვი ვიხილოთ.</p><p>მარანიანი შარშან ამ ტურნირზე ფინალში გავიდა, იქ კი ოლიმპიადის მომავალ ყალმუხ პრიზიორ მინგიან სემენოვთან დამარცხდა. ვფიქრობთ, მელნიკოვზე უფრო რეალური თბილისში მისი ჩამოსვლაა.</p><p>ამჟამად მშობლიურ კრასნოიარსკში სამხედრო სამსახურში მყოფმა ვლასოვმაც ძლიერად იჭიდავა და შესანიშნავი მზადყოფნა გამოავლინა, თუმცა ფინალში ალექსანდრ ჩიხირკინთან პირველი პერიოდი დათმო და მოსაგებად დამატებითი დრო დასჭირდა.</p><p>ჩემპიონის ხასიათი აჩვენაო, ასე შეაფასა მისი ჭიდაობა კოღუაშვილმა. არადა, როგორც პირადი მწვრთნელის, ლეგენდარული ალექსანდრ კარელინის აღმზრდელ ვიქტორ კუზნეცოვის სიტყვებიდან ირკვევა, ბოლო დღემდე კიდევ არ ყოფილა გარკვეული, იჭიდავებდა თუ არა ვლასოვი ამ შეჯიბრებას და დასკვნითი შეკრების ნახევარიც კი გამოუტოვებია.</p><p>ასევე გაურკვეველი ყოფილა, იასპარეზებს თუ არა ოლიმპიური ჩემპიონი მსოფლიოს თასზე. სამაგიეროდ, კუზნეცოვმა დაადასტურა, რომ ვლასოვი თბილისში აუცილებლად ჩამოვა ევროპის პირველობაზე.</p><p>ცხადია, ეს ფრიად გაურთულებს საქმეს ჩვენს ფალავანს, რომელსაც დააყენებენ მწვრთნელები, მაგრამ აამაღლებს შეჯიბრების საერთო დონეს.</p><p><strong>ყოველდღიური სპორტული გაზეთი "ლელო"</strong></p>
ლაშა გობაძე რეპეშაჟში დამარცხდა და ოლიმპიური თამაშები მედლის გარეშე დაასრულა
ლაშა გობაძე ოლიმპიური თამაშების მეოთხედფინალში ბულგარელ მეტოქესთან დამარცხდა
რობერტ კობლიაშვილი ოლიმპიადის პირველივე შეხვედრაში დამარცხდა
"როგორც იქნა, გვირაბის ბოლოს სინათლე გამოჩნდა" - ჯორჯო კიელინიმ იტალიის ნაკრებზე ისაუბრა
"არსენალი" ზამთრის სატრანსფერო ფანჯარაზე 2 შემტევის დამატებას გეგმავს
ბასილაშვილი მეცის ჩელენჯერს ტრავმის გამო ჩაეხსნა
მარკის რიდი მატჩის საუკეთესო მოთამაშეა - "ბაჰჩეშეჰირმა" იტალიაში "რომა" გაანადგურა
19-წლამდელებმა შესარჩევში ასპარეზობა სან-მარინოსთან გამარჯვებით დაასრულეს
შერმადინის "ტენერიფემ" ევროთასის მატჩი "ტელეკომს" თურქეთში დრამატულად მოუგო
ისევ საფრანგეთში, მაგრამ მე-3 ლიგაში - ბენ იედერი სამშობლოში დაბრუნდა
პრობლემა დე ლაურენტისის მოთხოვნაა - დე ბრუინს "ნაპოლიდან" წასვლა უნდა
"ეს უბრალოდ ფარსია!" - კასანომ რონალდინიო კარიერის განახლების გამო გააკრიტიკა
"არანაირი პრობლემა არ იქნება" - სკალონი მესის სამწვრთნელო შტაბში შესაძლო გაწევრიანებაზე
"საქართველოს ნაკრები კარგად გამოიყურებოდა" - რა თქვა ზაბარნიმ გუშინდელი მატჩის შემდეგ
როგორი შეფასებები მიიღეს საქართველოს ნაკრების ფეხბურთელებმა უკრაინასთან მატჩში?
ჩრდილოეთ ირლანდია უნგრეთს ფრედ ეთამაშა და A დივიზიონში აღზევდა
[VIDEO] კატასტროფა - საქართველოს ნაკრებმა ერთა ლიგა გატანილი გოლის გარეშე, ბოლო ადგილზე დაასრულა
უკრაინასთან მატჩში საქართველოს ნაკრების შემადგენლობა ცნობილია
U17. საქართველოს ნაკრები საკვალიფიკაციო ეტაპის A ლიგაში გავიდა
"მერაბმა ლამაზად შეუსრულა - უსმანი ყველა ფრონტზე დამარცხდა" - ამბობს დაღესტანელი პრომოუტერი
საქართველოს ნაკრებმა პირველი ვარჯიში თბილისი არენაზე გამართა
საბა ლაზიშვილი: უმართან ბრძოლა ჩემთვის პირადულია, რადგან კულისებს მიღმა ისეთი რაღაცები მოხდა...
ერლინგ ჰოლანმა შესაძლოა, ზაფხულში "სიტი" დატოვოს