"იმედი გაგვიჩნდა, რომ ფოთში მალე ნახევრად აშენებული სტადიონი მაინც გვექნება"

ბოლო 5 წლის განმავლობაში ფოთის ცენტრალური სტადიონის, "ფაზისის" მშენებლობა ორჯერ ჩაიშალა. ტენდერი გაიმართა, გამარჯვებული კომპანიები გამოვლინდნენ, მაგრამ საქმე ბოლომდე ვერ მიიყვანეს, ნაკისრი ვალდებულებები ვერ შეასრულეს და შედეგად, 4 მილიონამდე თანხა განიავდა...

...არადა, მშენებლობის დასრულება "კოლხეთის" 100 წლის იუბილესთვის (2013 წლის 14 ნოემბერი) იგეგმებოდა. მაგრამ დაპირება, რომ ფოთს ევროპული სტანდარტის საფეხბურთო სტადიონი ექნებოდა და რისთვისაც გვარიანი თანხა დაიხარჯა, ვერ შესრულდა.

სტადიონის სარემონტო სამუშაოების წარმოებაზე ადგილობრივმა ხელისუფლებამ ხელშეკრულება ტენდერში გამარჯვებულ კომპანია "ნიუ ქონსთრაქშენთან" 2013 წლის ოქტომბერში გააფორმა. სამუშაოები იმავე წელს, 31 დეკემბრამდე უნდა დასრულებულიყო. კომპანია ვალდებულებას იღებდა, რომ 3 თვეში ძველი სტადიონის დემონტაჟს შეძლებდა და ინფრასტრუქტურას მოაწყობდა - ააშენებდა ახალ ტრიბუნას, დაამონტაჟებდა სკამებს, განათების ახალ სისტემას, სტადიონს შემოღობავდა და შიდა ტერიტორიის კეთილმოწყობასაც დაასრულებდა...

სამუშაოები 2,3 მილიონ ლარად შეფასდა. კომპანიამ თანხის პირველი ნაწილი ავანსად მიიღო, თუმცა ვალდებულებები ვერ შეასრულა, მიუხედავად იმისა, რომ ადგილობრივმა ხელისუფლებამ ეს ვადა რამდენჯერმე გადაუწია. საბოლოოდ, 2014 წლის 30 იანვარს ხელშეკრულება გაწყდა.

ახალ ტენდერში გამარჯვებული გახდა კომპანია "ხიდი", რომელმაც სამუშაოები მხოლოდ 2014 წლის ოქტომბერში განაახლა. ამ კომპანიას ავანსად მიღებული 500 ათასი ლარით სამუშაოები 2015 წლის ივნისში უნდა დაესრულებინა, მაგრამ ვერც მან შეასრულა ვალდებულებები. ადგილობრივმა ხელისუფლებამ ვადები მასაც გადაუწია, თუმცა 2015 წლის აგვისტოს ბოლოს ხელშეკრულების გაწყვეტა კვლავ გარდაუვალი გახდა.

ამ ოთხ წელიწადში "ფაზისზე" 1,3 მილიონ ლარად დაგებული საფეხბურთო მოედანი გავერანდა, ხოლო დანგრეული ტრიბუნების ნაცვლად ჯერ მხოლოდ ბეტონის კედლებია ამოყვანილი.

ამის გამო ფოთის მერიასა და ამ ორ ტენდერში გამარჯვებულ კომპანიებს შორის სასამართლო დავა ჯერ კიდევ გრძელდება - მერია ფირმებისგან ავანსის სახით გაცემული თანხის დაბრუნებას ითხოვს. სულ სახელმწიფოს კუთვნილი 5 მილიონ ლარზე მეტი ისე განიავდა, სტადიონი თავიდან ასაშენებელია, მოედანი კი - ახალი დასაგები.

ფოთის მუნიციპალიტეტმა სტადიონის მშენებლობაზე მესამე ტენდერი წლეულს, მაისში გამოაცხადა, სადაც ცენტრალური სტადიონის დასავლეთ ტრიბუნის რეაბილიტაცია იყო გათვალისწინებული. მასში სამშენებლო კომპანია "ელიტაბურჯმა" გაიმარჯვა, რომელთანაც ხელშეკრულება 4 ივლისს გაფორმდა. მთლიანი პროექტის ღირებულება 7 მილიონი ლარია, მაგრამ ამ ეტაპის სამუშაოებისთვის 1,87 მილიონია გამოყოფილი, რადგან ახლა დასავლეთ ტრიბუნის რეაბილიტაცია დაიგეგმა.

ამჯერად, სტადიონზე მშენებლობა მიმდინარეობს და, გეგმის მიხედვით, დეკემბრის ბოლოს უნდა დასრულდეს. ფოთის მერის მოადგილის, ნიკოლოზ გრიგოლიას თქმით, პროექტის ამ ეტაპის დამთავრების შემდეგ ტენდერი დანარჩენი 3 ტრიბუნის მშენებლობაზე გამოცხადდება, მოედნის განახლება კი ეტაპობრივად მოხდება.

"ახალი სამშენებლო კომპანია საქმეს სერიოზულად ეკიდება და იმედი გაგვიჩნდა, რომ ფოთში მალე ნახევრად აშენებული სტადიონი მაინც გვექნება. ყოველ შემთხვევაში, სამუშაოები მიმდინარეობს და კონსულტაციებიც გაიმართა.

ფოთში ფეხბურთის ფედერაციის სტადიონების ინსპექტირების კომიტეტის ხელმძღვანელი მამუკა კვარაცხელია ჩამოვიდა, მერის მოადგილე გრიგოლიას შეხვდა და უეფას რეკომენდაციები გააცნო, რომ სტადიონზე სამუშაოები ამ სტანდარტების მიხედვით წარიმართოს.

დარწმუნებული ვარ, ამ კომპანიისთვის მშენებლობის უფლება თავიდანვე რომ მიეცათ, დღეს ფოთის "კოლხეთი" ქალაქ-ქალაქ არ ივლიდა და საკუთარ სტადიონზე ითამაშებდა", - ამბობს "კოლხეთის" ტექნიკური დირექტორი ლევან სარსანია.

საშინაო მატჩების ჩასატარებლად "კოლხეთს" დღესაც უწევს ახლომდებარე ქალაქების (ლანჩხუთი, ქობულეთი, სამტრედია) სტადიონების დაქირავება. იყო პატარა გამონათება, როცა მორაგბეთა "პარკი არენაზე" თამაშობდა, მაგრამ ახლა იქ შესვლა ვეღარ ხერხდება.

საერთოდ, სანამ გუნდები საკუთარ ქალაქებში არ დაბრუნდებიან და ელემენტარულად მოწესრიგებულ სტადიონებზე არ ითამაშებენ, მანამდე ეროვნული ჩემპიონატის დონის ამაღლება წარმოუდგენელია. შარშანდელის არ იყოს, წლეულსაც ჩემპიონატში ბევრი "ლტოლვილი" გუნდი გვყავს - საკუთარ ქალაქში ეროვნული ლიგის 10 გუნდიდან 3 ვერ თამაშობს...

(იბეჭდება მცირე ცვლილებით)
ყოველდღიური სპორტული გაზეთი "ლელო"