ლევან კუტალია: ქუთაისის "ტორპედოში" ყველაფერი მოვიგე, რაც მოსაგები იყო

- პირველ რიგში, როგორ მიდის მომზადების პროცესი და როგორ გაიარე "დინამოში " ადაპტაცია?
- მზადება მშვენიერ გარემოსა და პირობებში გვიწევს. ყველა ფეხბურთელი მობილიზებულია და ბოლომდე იხარჯება, რომ ჩემპიონატს მომზადებულები შევხვდეთ. რაც შეეხება ჩემს ადაპტაციას, ვეჩვევი ახალ გუნდს ნელ-ნელა. ბევრი ახალი ფეხბურთელია და უფრო დავიხვეწებით ამხანაგურ შეხვედრებში, უფრო შევთამაშდებით და მოვემზადებით.

- აუცილებლად უნდა გკითხო დედაქალაქურ კლუბში გადაბარგების შესახებ. რატომ მიიღე ეს

გადაწყვეტილება? ეს იყო კარგი შემოთავაზება? უფრო მეტი პერსპექტივა? თუ ფინანსური პრობლემები ქუთაისში, რომელზედაც ლეგიონერები საუბრობდნენ?
- რამდენჯერმე ვთქვი და ვამბობ, ქუთაისის "ტორპედოში" ყველაფერი მოვიგე, რაც მოსაგები იყო, ვითამაშე ევროპა ლიგის პლეი-ოფში. მანდ გატარებული დრო კარგად დამამახსოვრდება. დრო იყო ახალი კლუბის ახალი გამოწვევების და გამოჩნდა "დინამო". მსურს, "დინამოსთან " ერთად წარმატებას მივაღწიო.

- საქართველოში ცნობილია "დინამოსა" და " ტორპედოს" დაპირისპირების შესახებ. რას ფიქრობ, როგორ მიგიღებენ თბილისელი ფანები?
- საქართველოში ყველაზე დიდი თამაში "ქართული კლასიკოა", სანახაობრივადაც და დაძაბულობითაც. მე ბევრჯერ მითამაშია, ატმოსფეროც განსაკუთრებულია. ფანებს ვპირდები, რომ ყოველ მატჩში ბოლომდე დავიხარჯები და გუნდს დავეხმარები წარმატების მიღწევაში.

- წინა წელს ევროპა ლიგის პლეი-ოფში ითამაშე. ფიქრობ, რომ ამ ფორმაციის "დინამოს" იმავეს გამეორება შეუძლია?
- ყველაფერი შეიძლება, მთავარია, გუნდი შეთამაშდეს, მაქსიმალურად დაიხარჯოს და იყოს კონცენტრირებული, რომ ეს შეუძლია. ევროპა ლიგა გველოდება ზაფხულში. ჩვენ ვეცდებით, რომ რაც შეიძლება მეტი საფეხური გავიაროთ...

- თითქმის ყოველწლიურად იცვლი კლუბს. რა იწვევს ამას, ხასიათი თუ კლუბების არამდგრადობა? და ფიქრობ თუ არა, რომ "დინამოში" დიდი ხნით გაჩერდები?
- "დინამოსთან" ერთწლიანი კონტრაქტი მაკავშირებს და მინდა ამ გუნდთან ერთად წარმატებას მივაღწიო. მინდა, რომ გუნდს მაქსიმალურად დავეხმარო და წარმატებაში ჩემი წვლილი შევიტანო. დანარჩენს დრო გვიჩვენებს.

ლევან კუტალიას თბილისის "დინამომ" ერთწლიანი კონტრაქტი გაუფორმა