ნიკა კვეკვესკირი: ასეთ სიტუაციაში რა შეიძლება იყოს მეტი მოტივაცია?

თბილისის ზღვაზე მდებარე ს.კ. "ზესტაფონის" საწვრთნელ ბაზაზე გამართული ვარჯიშის შემდეგ
ეროვნული ნაკრების წევრმა ნიკა კვეკვესკირმა მოახლოებულ მატჩებსა და ტრავმირებულ თანაგუნდელებზე ისაუბრა.

"სამწუხაროდ, ტრადიციად გვექცა საკვანძო ფეხბურთელების არყოფნა სანაკრებო თამაშების წინ.

ჩემი აზრით, ისეთი დონის ფეხბურთელები, როგორებიც თორნიკე ოქრიაშვილი, ჯანო ანანიძე და ლევან მჭედლიძე არიან, ნებისმიერი ევროპული ნაკრებისთვის დიდი დანაკლისია.

რაც შეეხება მოტივაციას, ბოლო ოფიციალური თამაშია საკუთარ მოედანზე და ჯერჯერობით გამარჯვება არ გვაქვს. ასეთ სიტუაციაში რა შეიძლება იყოს მეტი მოტივაცია? ყველაფერს გავაკეთებთ გამარჯვებისთვის, ჩვენ უნდა დავუმტკიცოთ მაყურებელს, რომ შეგვიძლია კარგი ფეხბურთის თამაში და შედეგის ჩვენება.

განვლილი ორი თამაში ირლანდიასთან და ავსტრიასთან იყო ხარისხიანი ფეხბურთი, თუმცა, სამწუხაროდ, გამარჯვების გარეშე. ახლა ხარისხიანი ფეხბურთი უკვე შედეგში უნდა ავსახოთ და მივაღწიოთ გამარჯვებას".

შეგახსენებთ, რომ საქართველოს ნაკრები 6 ოქტომბერს, "დინამო არენაზე", მსოფლიოს 2018 წლის ჩემპიონატის საკვალიფიკაციო ეტაპის მატჩში უელსს 20:00 საათზე უმასპინძლებს. შეხვედრის პირდაპირ ტრანსლაციას "საზოგადოებრივი მაუწყებლის" პირველი არხი განახორციელებს.

ბილეთის ფასი არის 5, 10, 15 და 25 ლარი. ბილეთების შეძენა ინტერნეტში ამ მისამართზე შეგიძლიათ - TKT.GE

მომზადებულია gff.ge-ს მიხედვით