ჩაკვეტაძე მხოლოდ რამდენიმე წუთით ათამაშეს - დროა, თავი წარმოაჩინოს

ბელგიის ჟუპილერ ლიგის მე-12 ტურში "გენტმა" გასვლაზე 3:0 დაამარცხა "გენკი", სტუმართა გუნდის ნახევარმცველ გიორგი ჩაკვეტაძეს კი ამჯერად მცირე სათამაშო დროით მოუწია დაკმაყოფილება.

სამიოდ დღის წინ კონფერენს ლიგაზე "პარტიზანთან" მან 80 წუთი დაჰყო მოედანზე, ხოლო ახლა 87-ე წუთზე შეუშვეს შეცვლაზე. აშკარაა, სამწუხაროდ, ტრავმების შემდეგ ფორმაში ჩადგომა ძალიან უჭირს და შედეგიანი მოქმედებითაც კარგა ხანია არ გამოუჩენია თავი (ბოლოს საგოლე გადაცემა 26 სექტემბერს "სერკლ ბრიუგესთან" გააკეთა). მან მიმდინარე ჩემპიონატის 7 მატჩში მიიღო მონაწილეობა, გოლი არ გაუტანია, ორი საგოლე პასი კი გააკეთა.

"გენტმა" ყველა ტურნირზე ერთი კვირის განმავლობაში ზედიზედ სამი გამარჯვება იზეიმა, სატურნირო ცხრილში 17 ქულით მეცხრე ადგილზეა, 27 ოქტომბერს თასის 1/16-ფინალში სამოყვარულო "ბელისია ბილზენს" უმასპინძლებს, 1-ელ ნოემბერს - ჩემპიონატის ლიდერ "უნიონს", 4 ნოემბერს კონფერენს ლიგაზე "პარტიზანს" მიიღებს, ხოლო 7 ნოემბერს გიორგი მიქაუტაძის "სერენს" ესტუმრება.

ასე რომ, სამ ფრონტზე მოასპარეზე "გენტს" საკმაოდ მჭიდრო კალენდარი აქვს და გიორგის თავის წარმოჩენის საშუალება მიეცემა. მთავარია, ტრავმის მიღების შიში დაძლიოს, გაბედულად შევიდეს ორთაბრძოლებში, შეუტიოს და ძველებურად ათამაშდება. ის ხომ უზომოდ ნიჭიერია და ეს ნიჭი არსად დაუკარგავს.

ბელგიელებს ჩაკვეტაძის იმედი აქვთ

ჩაკვეტაძე: - ტრავმის მიღების შიში ისევ მეუფლება... შეცვლა ამიტომ მოვითხოვე...