საქართველოს ნაკრების შემტევი ნახევარმცველი გიორგი წიტაიშვილი გუშინ 21 წლის გახდა, "ჩერნომორეცმა" დაბადების დღე მიულოცა და დღეს კიევის "დინამოსთან" უკრაინის პრემიერლიგის მე-15 ტურში მის თამაშს მოუთმენლად ელოდნენ.
როგორც იცით, წიტაიშვილი და კიდევ 15 ფეხბურთელი კიევის "დინამოდან" "ჩერნომორეცში" იჯარითაა გაშვებული და ფაქტიურად მისი ფარმ-კლუბია. ამიტომ არ უყვართ ოდესელებს საკუთარი გუნდი. ამას დღეს წერილი football.ua-მ მიუძღვნა.
"დინამო" "შახტართან" ერთად ჩემპიონატის ლიდერია და შემთხვევით ქულების დაკარგვა არ აწყობდა, ამიტომ ჯერ მატჩი კიევში გადაიტანეს, შემდეგ დაიწყო ლაპარკი, რომ განათხოვრებულ ფეხბურთელებს თამაშის უფლებას არ მისცემდნენ, მაგრამ
ასეთ შემთხვევაში "ჩერნომორეცი" მოედანზე 11 მოთამაშეს ვერ გაიყვანდა და იძულებული გახდნენ დათანხმებულიყვნენ.
ua-football-მა წიტაიშვილს დღის გმირი უწოდა და აღნიშნა, რომ გასაგებ მიზეზთა გამო სუპერმოტივირებული იქნებოდა. აი, რას წერს მის შესახებ ჟურნალისტი იგორ სემიონი:
"კიევის "დინამოს" ძირითად მჭიდში ყოფნისას ის სათამაშო პრაქტიკის არქონას უჩიოდა. განსაკუთრებით პოლონეთში U-21-ის მსოფლიოს ჩემპიონატზე ტრიუმფალურად გამარჯვების შემდეგ. წიტაიშვილი პეტრაკოვისთვის მნიშვნელოვანი ფეხბურთელი იყო, ფინალში გაიტანა, თუმცა საკლუბო კარიერამ ნათლად წარმოაჩინა ზრდასრულ და ახალგაზრდულ ფეხბურთს შორის სხვაობა.
გიორგი ფაქტიურად უშანსოდ აგებდა კონკურენციას ვიქტორ ციგანკოვთან, რომელიც მაშინ ჯერ კიდევ ბოლომდე არ იყო მომწიფებული. ახლა ის ციგანკოვს ტოპ-კლასის ფეხბურთელს უწოდებს. ვიდრე ციგანკოვს არ გაყიდიან, "დინამოს" ძირითადის კარი წიტაიშვილისთვის დაკეტილია (შეიძლება ტრანსფერის შემდეგაც სწორედ საქართველოს ნაკრების წევრზე არ გაკეთდეს არჩევანი). თუმცა, გიორგიზე დაკვირვება "ჩერნომორეცშიც" საინტერესოა.
დღეს ის აუტსაიდერ გუნდში გამოირჩევა. დრბიბლინგებით გამოირჩევა არამარტო "ჩერნომორეცში", არამედ მთელ პრემიერლიგაში. ძლიერია სხვა კომპონენტებშიც: კარში დარტყმებითა და ორთაბრძოლებში. "ვორსკლაში" ხელი ტრავმამ შეუშალა, ხოლო "ჩერნომორეცში" ბევრს და არცთუ ურიგოდ თამაშობს.
დღეს მისთვის განსაკუთრებული შეხვედრაა. გარდა წმინდა საფეხბურთო ძლიერი მხარეებისა, ზემოტივაცია წარუძღვება და შესაძლებლობა ექნება ციგანკოვის ფონზე თავისი შესაძლებლობები წარმოაჩინოს".
და რაოდენ გასაკვირი გახლდათ, როდესაც მატჩის განაცხადში გიო ვერ ვიხილეთ. იმავე გამოცემამ აღნიშნა, რომ მიზეზი მცირე ტრავმაა. ვითომ? დავუჯეროთ?
![alt](/pictures/image50/8d8c19acae26758602bf8b261c5c34e8.jpg "წიტაიშვილს "დინამოსთან" თამაშის და თავის წარმოჩენის შანსი არ მიეცა - რა მოხდა კიევში?")
"ბევრს სურს ევროპაში თამაში, მისი ღირებულება კი 20-25 მილიონი ევროა..." - წიტაიშვილი
