მიქაუტაძის გოლი და საგოლე პასი - "სერენი" პენალტების სერიაში დამარცხდა

ბელგიის თასის მერვედფინალში გიორგი მიქაუტაძის "სერენი" საკუთარ მოედანზე "ანდერლეხტთან" პენალტების სერიაში დამარცხდა და გათამაშებას გამოეთიშა.

მასპინძლები მე-10 წუთზე პენალტით მაზიზმა დააწინაურა, მე-17 წუთზე კი თერთმეტმეტრიანი მიქაუტაძემ გამოიყენა და ანგარიში 2:0 გახდა. ამის შემდეგ სტუმრებმა 3 გოლი გაიტანეს და წინ გაიჭრნენ. მე-60 წუთზე მიქაუტაძემ კარის წინ უმეთვალყურეოდ მყოფ მაზიზს უპასა და მან თანაფარდობა აღადგინა. ძირითადი დრო 3:3 დასრულდა და დამატებითი დრო დაინიშნა. გუნდებს დაღლა დაეტყოთ, მეტი გოლის გატანა ვერ შეძლეს, პენალტების სერიაში ქართველმა თავდამსხმელმა კიდევ ერთხელ გამოიჩინა თავი, თუმცა მისი გუნდი 3:4 დამარცხდა.