კვარაცხელიას "ნაპოლის" განრიგი მუნდიალამდე - ლიდერები სტატუსის გასამყარებლად

საფეხბურთო შემოდგომა საკმაოდ სწრაფად გარბის და შორს არც მსოფლიო ჩემპიონატია (20 ნოემბრიდან). არსებული დატვირთული პერიოდის განმავლობაში პირველად მოხდა - იმ კვირაში, როცა ევროტურნირები ისვენებს, იტალიური კლუბები არც საკუთარ ჩემპიონატში თამაშობენ (თასის გათამაშება დაიწყო). ყველაფერი ეს ხვიჩა კვარაცხელიას ამოსუნთქვის საშუალებას მისცემს, მუნდიალის მიმდინარეობისას კი მოთამაშეებს, რომლებიც იქ არ მონაწილეობენ, განსხვავებული მომზადება ექნებათ. ნეაპოლელთა თითოეული მატჩის მიმართ საქართველოში დიდი ინტერესია და ჩვენც უახლოესი ამბები განვიხილოთ.

უპირველესი გამოცდა ერთ-ერთი ყველაზე რთულია, რაც აქამდე ყოფილა. "სტადიო ოლიმპიკოზე" ქართველი გარემარბის გუნდმა "ლაციო" უკვე (2:1) დაამარცხა და გამარჯვების გოლი ჩვენებურმა გაიტანა, თუმცა ამავე სტადიონზე ჟოზე მოურინიოს "რომასთან" თამაში, რომელიც ოთხეულში შევიდა, იოლი არ გამოვა. "ჯალოროსი" კარგი პრესინგით გამოირჩევა, ბევრი არ გააქვს, მაგრამ ცოტასაც უშვებს. "რომა" 3-მცველიანი ტაქტიკით ასპარეზობს და კვარაცხელიას ირგვლივ 2 ფეხბურთელი იტრიალებს, "განსაკუთრებულად" წოდებული მოურინიო კი ეცდება, ჩემპიონატის ლიდერი შეაჩეროს, რისთვისაც სპალეტის გუნდის ლიდერების ნეიტრალიზება დასჭირდება. ეს შეხვედრა კვირას, 23 ოქტომბერს (22:45 სთ), გაიმართება.



ამის შემდეგ (ოთხშაბათს, 26 ოქტომბერს, 23:00 სთ) "ნაპოლი" ჩემპიონთა ლიგაზე "რეინჯერსს" მასპინძლობს. ხვიჩას გუნდს პლეი-ოფში თამაში უკვე განაღდებული აქვს, თუმცა, თუკი ჯგუფში პირველი ადგილის დაკავება სურს, "ლივერპულთან" ბოლო ტურის წინ 3-ქულიანი ჰანდიკაპის შენარჩუნება მნიშვნელოვანია. თუ არა ამ მატჩში, როდისღა უნდა ვიხილოთ ექსპერიმენტები სპალეტის მხრიდან, რთული სათქმელია. ამავდროულად, შესაძლოა, "დიდ შესვენებამდე" გუნდი "ერთი ამოსუნთქვით" მივიდეს.

შაბათს, 29 ოქტომბერს (17:00 სთ) კი, ნეაპოლელები ისევ "სტადიო მარადონაზე" ითამაშებენ, ამჯერად "სასუოლოს" წინააღმდეგ, კვარაცხელიას პირისპირ კი გერმანელი ჯერემი ტოლჯანი დადგება. ამას ისევ ჩემპიონთა ლიგა და "ლივერპულთან" უკანასკნელი ტური მოჰყვება. ამ დროს ევროპაში უკვე საათი გადაიწევა და ეს დაპირისპირება 1-ელ ნოემბერს, 23:59 საათზე დაიწყება.

ამის შემდეგ სერია "ა"-ში 3 ტური ჩატარდება, რის შემდეგაც შესვენება 4 იანვრამდე გამოცხადდება. მოგეხსენებათ, ნეაპოლელები მე-2 ადგილზე მყოფ "ატალანტას" 2 ქულით აღემატებიან. არავინ იცის, მანამდე სატურნირო ცხრილში რა მდგომარეობა იქნება, ეს გუნდები კი 5 ნოემბერს (21:00 სთ) ბერგამოში ითამაშებენ. დღევანდელი გადასახედიდან, ეს ამ ეტაპის ცენტრალური მატჩია.



რა იქნება შემდეგ? 8 ნოემბერს (21:30 სთ) "ემპოლისთან" საკუთარ მოედანზე თამაში. ფაბიანო პარიზიმ "კვარას" შეჩერებაზე კი ისაუბრა, თუმცა ჩვენებურთან უშუალო დაპირისპირება მას არ მოუწევს.

ნეპოლური კლუბი მე-15 ტურის შეხვედრასაც (12 ნოემბერი, 18:00 სთ) საკუთარ არენაზე, "უდინეზეს" წინააღმდეგ ჩაატარებს. ბოლო წლებში "ნაპოლი" უდინელებს ძალიან იბრიყვებს და ახლაც მსგავსი რამაა მოსალოდნელი. ნოემბერს "კვარა" საქართველოს ნაკრების ამხანაგური მატჩებით დაასრულებს.

დარჩება 4 გუნდი, რომელთაც კვარაცხელია და მისი თანაგუნდელები პირველი წრის ბოლომდე უნდა შეხვდნენ, თუმცა ყველაფერი ეს უკვე 2023 წელს მოხდება - "ინტერი", "იუვენტუსი", "სამპდორია", "სალერნიტანა".




მოგეხსენებათ, "ნაპოლის" 10 ტურის შემდეგ 26 ქულა აქვს (ბურთების შეფარდება - 25:9) და იტალიაში ლიდერია, ამავდროულად კი, ჩემპიონთა ლიგაზეც უდანაკარგოა (12 ქულა).

რაც შეეხება კვარაცხელიას - 14 მატჩი, 7 გოლი, 6 საგოლე პასი და 3 მოპოვებული პენალტი - ასეთია ჩვენებურის სტატისტიკა ყველა ტურნირზე და მისი თამაში, რომელიც ამ მაჩვენებლებზე მაღლა დგას.

უდიდესი აღიარება! - კვარაცხელია 2023 წელს "ოქროს ბურთის" მოპოვების ფავორიტთა სიაშია

როგორ ქმნის ხვიჩას "ნაპოლი" ვარსკვლავებს? - სატრანსფერო პარალელი

 

ვარსკვლავებით გადაჭედილ საფეხბურთო ცაზე ახალი ვარსკვლავი გამოჩნდა