"ვალენსია" სახლში უშანსოდ დამარცხდა და თასიდან გამოვარდა [VIDEO]

ესპანეთის თასის მეოთხედფინალში „ვალენსია“ საკუთარ მოედანზე „ბილბაოსთან“ 1:3 დამარცხდა და გათამაშებას გამოეთიშა.


მატჩის წინ „ვალენსიას“ გულშემატკივართა ნაწილმა მწვრთნელის, გატუზოს გადაყენება მოითხოვა, თავად იტალიელმა სპეციალისტმა კი კითხვაზე, აპირებენ თუ არა ნახევარმცველის დამატებას, უპასუხა, რომ ეს საკითხი თვითონაც ძალიან აინტერესებს.

პირველ ტაიმში ბევრი იყო ბრძოლა, მომენტი ცოტა და სტუმრებმა პირველივე შანსი გამოიყენეს - ბასკური გუნდი მისმა კაპიტანმა მუნიაინმა დააწინაურა. შემდეგ შეტევაში მასპინძელთა მცველი დიახაბი ჩაერთო, საჯარიმოში განივი გადაცემა გააკეთა და ბურთი საკუთარ კარში დე მარკოსმა ჩაჭრა. თუმცა 45-ე წუთზე ნ. უილიამსმა ახლო მანძილიდან გაუტანა მამარდაშვილს. აღსანიშნავია, რომ ორივე საგოლე გადაცემა ი. უილიამსმა გააკეთა.

„ვალენსია“ შესვენების შემდეგაც უხიფათოდ უტევდა, კონტრიერიშისას კი „ბილბაომ“ პენალტი მოიპოვა, როდესაც მსაჯმა ვიდეოგამეორების ნახვის შემდეგ მიიჩნია, რომ ოზკაჯარმა საჯარიმოში ნ. უილიამსი წააქცია, ვესგამ თერთმეტმეტრიანი უზადოდ შეასრულა, ბასკებმა დამსახურებული გამარჯვება მოიპოვეს და ზედიზედ მეოთხედ გავიდნენ ნახევარფინალში.

ნახევარფინალში ასევე „ბარსელონა“ და „ოსასუნა“ გავიდნენ, მეოთხე საგზურისთვის კი „რეალი“ და „ატლეტიკო“ იბრძვიან.

შემდეგ მატჩს „ვალენსია“, რომელსაც ლა ლიგაზე გასავარდნ ზონას 3 ქულა აშორებს, 29 იანვარს გამართავს - გასვლაზე „ვალიადოლიდს“ დაუპირისპირდება.

ვალენსია. „მესტალია“. 45 040 მაყურებელი
ვალენსია - ბილბაო 1:3