match tv კვარაცხელიას "დინამოში" გადასვლას ეხმაურება - "ნაკლებად სავარაუდოა, ეს უკრაინის მოვლენები იყოს"

ხვიჩა კვარაცხელია იმდენად საინტერესოა, რამდენადაც იდუმალი. ყველაფერი ეს მის კარიერასაც თან ახლავს. ჯერ კიდევ ვერავინ ხვდება, ასეთ ნიჭზე მოსკოვის "ლოკომოტივმა" უარი როგორ თქვა? - თანამედროვე ფეხბურთში ეს, უბრალოდ, სისულელეა.

ყველაფერი, თავად ფეხბურთელის თქმით, მომავალი კონტრაქტის ვადაზე იყო დამოკიდებული. მოსკოვში კვარაცხელიას "1+3" სქემა შესთავაზეს, "რუბინში" კი - პირდაპირ ხუთი წლით თანამშრომლობა. კიდევ ერთი მნიშვნელოვანი ფაქტორი აგენტი მამუკა ჯუღელი იყო.

ყაზანში ხვიჩამ ძალიან კარგად დაიწყო. ორი წლის განმავლობაში მისი პოტენციური ღირებულება 20-ჯერ გაიზარდა - 900 ათასიდან (2019 წლის ივლისი) 18 მილიონ ევრომდე (2021 წლის ივლისი). ფეხბურთელი გაძლიერდა, დაიხვეწა ტექნიკა, აიმაღლა თვითშეფასება. ხვიჩამ საბანი იქამდე არ დაიფარა, სანამდეც მისწვდებოდა - არამედ ბოლომდე გადაწია.



გულშემატკივრებს ხვიჩა მოსწონთ, თუმცა მის ფიგურას გუნდისთვის განსაკუთრებული შედეგი არ მოჰყოლია. თუ გავიხსენებთ კონფერენს ლიგის სევდიან მატჩებს პოლონურ "რაკუვთან", ქართველმა ორივეში მიიღო მონაწილეობა, მაგრამ შემდეგ ეტაპზე პოლონელები გავიდნენ. დაახლოებით ამ დროს მოთამაშის ნიჭის მასშტაბებსა და მის კლუბს შორის შეუსაბამობა უკვე ჰიპოთეზა აღარ იყო, არამედ ფაქტი. ხვიჩას შეუძლია დიდი გამარჯვებები. ამავდროულად, მისი გუნდის ფეხბურთი არ არის სასიამოვნო საყურებელი.

ცნობილი მოვლენების დაწყების შემდეგ ახალი რეალობა დადგა - "რუბინის" ლიდერი "დინამოში" (ბათუმი) გადავიდა. ხვიჩას მაინც შეუძლია სეზონი ყაზანში დაასრულოს...

ჭორების მიხედვით, ხვიჩას "აიაქსში" გასული წლიდან უნდა ეთამაშა. ეს გარიგება ლოგიკურად ყველა თვალსაზრისით გამოიყურებოდა - სტილისტურად, კარიერულად, ფინანსურად. ნიდერლანდური კლუბი რომანტიკული ფეხბურთის ციტადელია. მართალია, "აიაქსის“ ტექნიკურმა დირექტორმა მარკ ოვერმარსმა ინტერესი უარყო, ხოლო ქართველმა ლეგენდამ, შოთა არველაძემ - შუამავლის ფუნქციები, გარიგებას, როგორც გავიგეთ, ამ ქვეყანასთან დიდი კავშირების მქონე კიდევ ერთი ცნობილი ქართველი ფეხბურთელი გიორგი გახოკიძე ხელმძღვანელობდა.

მხარეებმა შეთანხმებას ვერ მიაღწიეს. ამსტერდამი გაქრა, მაგრამ ასეც რომ იყოს, ბათუმი საუკეთესო არჩევანი ნამდვილად არაა. ფეხბურთელი რაღაცამ აიძულა, დაეტოვებინა რუსეთი და ნაკლებად სავარაუდოა, რომ ეს უკრაინის მოვლენები იყოს. რუსეთში ამერიკელი ფეხბურთელებიც კი დღემდე თამაშობენ. ხვიჩას პაციფისტური შეხედულებები რომ ჰქონდეს, მაშინვე წავიდოდა, მაგრამ მან თითქმის მთელი მარტის განმავლობაში ითამაშა.



ჯუღელმა, რომელიც დიდი ხანია რუსულ ბაზარზე მოღვაწეობს, ეროვნული ლიგა 3-ის გუნდი "კოლხეთი" შეიძინა, რომლის შემადგენლობაშიც 80-90-იან წლებში თავადაც თამაშობდა. გავრცელებული ხმების თანახმად, ის აპირებს თავისი მთავარი პროფესიული აქცენტი საქართველოში გადაიტანოს. ამას რეპუტაცია სჭირდება და მას სამშობლოში "უღრუბლო ზეცა" არ აქვს. გარკვეული საიმიჯო მოქმედებები სრულფასოვანი დაბრუნებისთვის სასარგებლო იქნება.

ხვიჩას დაბრუნება, თუმცა დროებითი, ერთ-ერთი ასეთი ქმედებაა. უპირობოდ, საუკეთესო ფეხბურთელის მოსვლას საქართველო ენთუზიაზმით გამოეხმაურა. ეროვნულ ჩემპიონატში ბათუმის "დინამო" ლიდერობს, იქ უკვე ჯანო ანანიძეა, ტულის "არსენალიდან" ზურიკო დავითაშვილიც შეუერთდებათ. გუნდში საქართველოს ნაკრების 4-5 სტაბილური და 2-3 პოტენციური მოთამაშე გამოდის. ზაფხულში "დინამო" აუცილებლად ითამაშებს ჩემპიონთა ლიგის საკვალიფიკაციო ეტაპზე. კლუბი იმედოვნებს, რომ გაძლიერება დაეხმარება.

განტოლებაში ძალიან ბევრი უცნობია იმისთვის, რომ ხვიჩის შემდგომი ბედი ვიწინასწარმეტყველოთ. ფეხბურთელის კონტრაქტი 2024 წლამდეა გათვლილი. არავინ იცის, რა გადაწყვეტილებას მიიღებს ფიფა რუსეთში ლეგიონერებზე კონტრაქტების შეჩერების დასრულების შემდეგ. ამ დონის ახალგაზრდა ფეხბურთელს სჭირდება პროგრესი და არა ის, რომ გადაარჩინოს სხვისი რეპუტაცია და არ გავარდეს კონფერენს ლიგის პირველივე ტურიდან.

მომზადებულია matchtv-ის მიხედვით

კვარაცხელიას იტალიური მედია არ ასვენებს - ზაფხულში "მილანს" უკავშირებენ

კვარაცხელიას რუსეთში ზოგი გამოეტირა, ზოგი კი...

კვარაცხელიამ "რუბინთან" ხელშეკრულება შეაჩერა