ჟერარდ პიკეს პრესკონფერენცია - კატალონია, ესპანეთის ნაკრები და რამოსი

"ბარსელონას" მცველმა ჟერარდ პიკემ პრესკონფერენცია გამართა, სადაც ბევრ საინტერესო საკითხზე ისაუბრა.

"შესაძლოა, არსებობენ რადიკალი ჟურნალისტები, რომლებსაც სურს, რომ ჩვენ მსოფლიოს ჩემპიონატი ვერ მოვიგოთ.

მე კი მსურს, ადამიანებმა ნახონ, რომ თანმიმდევრული ვარ და ვიცავ იმას, რისიც მჯერა და პატივს ვცემ იმას, რასაც სხვები სხვანაირად ფიქრობენ. მე მხოლოდ პატივისცემას ვითხოვ.

ესპანეთსა და კატალონიას შორის ურთიერთობა მშობლებისა და 18 წლის შვილის ურთიერთობას ჰგავს, რომელსაც სახლიდან წასვლა სურს. მთავრობას ორი გზა აქვს:

მიუსხდნენ მაგიდას და დიალოგი წამოიწყონ ან არ გააკეთონ ეს და შვილი წავიდეს.

ყველა ამბავი ჩემსა და რამოსს შორის კონფლიქტზე ტყუილია, ჩვენ კარგი ურთიერთობა გვაქვს, ყველაფერი რიგზე გვაქვს. უფრო მარტივია თქმა, რომ ჩვენ შორის მანძილი გაიზარდა ან რომ კამათი გვაქვს და ა.შ.

მოდით, დავასრულოთ ეს სპეკულაცია, საკმარისია. ჩვენ შორის უთანხმოება არ არსებობს.

ჩემი შესაძლო წასვლა ესპანეთის ნაკრებიდან საქმესთან კავშირში არაა. პირიქით, მე მსურს ნაკრებში თამაში მუნდიალი 2018-ის შემდეგაც.

მინდა ყველაზე კარგ და სასიამოვნო მომენტში წავიდე და არა უკანა კარიდან.

ახლა წასვლა ნიშნავს, რომ მათ, ვინც მისტვენს და შეურაცხყოფას მაყენებს, გაიმარჯვეს. მე ეს არ მსურს. ეს გუნდი და ფეხბურთის ფედერაცია ჩემი ოჯახია. მინდა, მათ გვერდით ვასპარეზობდე.

არაფერს ვნანობ, რაც აქამდე მითქვამს. ყველანი ადამიანები ვართ, ჩვენი გარემოს ზეგავლენის ქვეშ ვართ და ჩვენი აზრის გამოთქმა შეგვიძლია. ვფიქრობ, რომ კატალონიელებს უნდა ჰქონდეთ უფლება, საკუთარი მომავალი აირჩიონ ხმის მიცემით და სხვებს პატივი სცენ.

მოდით, ვისაუბროთ. ადამიანებს, რომლებსაც სჯერათ კატალონიის დამოუკიდებლობის, შეუძლიათ ესპანეთის ნაკრებში თამაში.

თქვენ შეგიძლიათ გინდოდეთ თქვენი ქვეყანა, მაგრამ ეს არ ნიშნავს, რომ ესპანეთის წინააღმდეგ გამოდიხართ.

ეს მე არ მეხება, მაგრამ ეს შესაძლებელია. ხალხი ესპანეთის წინააღმდეგ არ გამოდის და აღიარებენ, რომ ის სავსეა კარგი ადამიანებით.

ყველას შეუძლია გამოთქვას აზრი აქტუალურ თემებთან დაკავშირებით. რატომ არ შეუძლიათ ფეხბურთელებს იმავეს გაკეთება? არასდროს დამიყენებია ჩემი თავი რომელიმე მხარეს. მე ვთქვი, რომ ადამიანებს აქვთ უფლება, მისცენ ხმა - "კი" ან "არა" ან უბრალოდ, გააფუჭონ საკუთარი ბიულეტენი. სულ ეს არის.

სტვენა? მივეჩვიე ამას, თუმცა ეს მტკივნეულია. თანავუგრძნობ ჩემს თანაგუნდელებს, რომლებსაც ამის ატანა მოუწევთ.

ისინი, ალბათ, უკვე უნდა დაიღალონ ჩემზე საუბრით. ამიტომ დავნიშნე ეს პრესკონფერენცია, რომ ყველა კითხვას პასუხი გავცე.

მედიაში ბევრი ტყუილი იყო ჩემსა და რამოსზე, მაგრამ ჩვენ ახლო ურთიერთობა გვაქვს და თავს ძალიან კარგად ვგრძნობთ.

ვფიქრობდი კარიერის დასრულების შესახებ, რადგან თანაგუნდელებს გაუადვილდებოდათ, მაგრამ მაშინ ვინც უსტვენდა, ისინი გაიმარჯვებდნენ.

იყო შერაცხყოფილი, არასასიამოვნოა, მაგრამ ეს გამოწვევაა ჩემთვის. ბევრ ადამიანს ესპანეთში სურს მოლაპარაკება და დიალოგი.

მაგრამ ახლა კონცენტრაცია პარასკევის სამ ქულაზე უნდა გავაკეთოთ. უნდა გავაგრძელოთ მუშაობა. ესპანეთის ნაკრებში 15 წლიდან ვთამაშობ და ნაკრები ჩემთვის ოჯახივითაა. ესპანეთის ნაკრების მიმართ ჩემი ერთგულების ეჭვქვეშ დაყენება არ ღირს. ძალიან ვამაყობ ყველა ტიტულით, რომელიც ნაკრებთან ერთად მოვიგე", - თქვა პიკემ.

მომზადებულია Football Espana-ს მიხედვით