"ფურია როხას" არარიხიანი დასაწყისი, ანუ ლუის ენრიკეს უნაყოფო "ტიკი-ტაკა" [VIDEO]

ევროპის ჩემპიონატის პირველ ტურში, E ჯგუფში, ესპანეთმა საკუთარ მოედანზე შვედეთი ვერ დაამარცხა და მიმდინარე ტურნირზე პირველი უგოლო მატჩი დაფიქსირდა.

ესპანელები თავიდანვე დაეუფლნენ უპირატესობას, მომენტებიც შექმნეს, რომელთაგან ყველაზე რეალური მორატას ჰქონდა, მაგრამ მოახერხა და ვერ გამოიყენა. „ტრე კრუნურმა“ სახეიროდ მხოლოდ ერთხელ შეუტია და კინაღამ მიზანს მიაღწია, როდესაც ისაკის დარტყმული ბურთი ლორენტესგან რიკოშეტით ძელს მოხვდა.

შესვენების შემდეგ ესპანეთი ერთფეროვნად და უხიფათოდ უტევდა, შვედეთი კი თავს ორგანიზებულად იცავდა და კონტრშეტევებით პასუხობდა. ერთ ეპიზოდში ისაკი სამ მცველს დაუსხლტა, ბერგს უპასა, მაგრამ მან ახლო მანძილიდან ვერ დალაშქრა სიმონის კარი. მასპინძელთა მწვრთნელმა ლუის ენრიკემ თამაშის გასამწვავებლად ჯერ როდრისა და მორატას ნაცვლად მოედანზე ტიაგო და სარაბია შეუშვა, ხოლო შემდეგ - ფერან ტორესისა და ოლმოს მაგივრად ოიარსაბალი და ჟერარ მორენო. შვედების თავკაცმა ანდერსონმა კი გაგვაკვირვა და ყველაზე აქტიური ისაკი გაიყვანა. ცვლილებებმა თამაშის სურათი ვერ შეცვალა. ერთადერთი მომენტი 90-ე წუთზე ჟერარ მორენოს ჰქონდა, რომლის თავური მეკარემ მოიგერია.

სევილია. „ოლიმპიკო“
ესპანეთი - შვედეთი 0:0