ბუნდესლიგა. XXXIV ტური: ჰამბურგში დრო გაჩერდა... [VIDEO]

AutoSharing Option
"ჰამბურგმა", ბოლო ტურში "გლადბახის" დამარცხების მიუხედავად, პირველად დატოვა პირველი ბუნდესლიგა. ამ ნაღვლიან შემთხვევასთან დაკავშირებით, კლუბის საშინაო სტადიონზე გაანულეს ტაბლო, რომელიც "ჰამბურგის" უმაღლეს დივიზიონში ყოფნის დროს ითვლიდა.
განულების მომენტში საათი აჩვენებდა 54 საათსა და 190 დღეს...

"ჰამბურგი" - გერმანიის ექვსგზის ჩემპიონი და ერთადერთი კლუბია, რომელმაც 1963 წლიდან მოყოლებული, ბუნდესლიგის ყველა გათამაშებაში მიიღო მონაწილეობა.


მიუნხენი კიდევ ერთხელ და ახლა უკვე სამუდამოდ გამოეთხოვა პენსიაში მიმავალ იუპ ჰაინკესს. ტრიბუნებმა ოვაცია მოუწყვეს 73 წლის სპეციალისტს.

საზეიმო განწყობამ ცუდად იმოქმედა
"ბაიერნის" თამაშზე, განსაკუთრებით, დაცვის ხაზზე. ჩემპიონმა ბოლო 10 წლის განმავლობაში პირველად გაუშვა "ალიანც არენაზე" მინიმუმ 4 გოლი. "შტუტგარტს" კი მოტივაცია დაეხმარა: თუ 19 მაისს "ბაიერნი" მოიგებს გერმანიის თასს, მაშინ შტუტგარტელები, რომლებიც ჯერ კიდევ შარშან მეორე ბუნდესლიგაში თამაშობდნენ, ევროპის ლიგის საგზურს მიიღებენ.

მიუხედავად ამისა, საკუთარ მოედანზე 38-მატჩიანი წაუგებელი სერიის შეწყვეტასაც არ უმოქმედია საზეიმო ცერემონიაზე. "ბაიერნს" ჩემპიონობისთვის განკუთვნილი ვერცხლის სასალათე გადასცეს, კვარცხლბეკისკენ მიმავალ ჩემპიონებს კი წინა წლების ვარსკვლავები მიესალმებოდნენ, მათ შორის, ფრანც ბეკენბაუერი. ყველაზე ბოლოს მინდორზე ჰაინკესი გავიდა, ხოლო პირველმა პრიზი მანუელ ნოიერმა მიიღო, რომელმაც ტრავმის გამო თითქმის მთელი სეზონი გამოტოვა.


თუ მიუნხენში ზეიმი იყო, გუნდების ჯგუფი ბოლო ტურში ჩემპიონთა ლიგის ორი ვაკანტური საგზურისთვის იბრძოდა. ამ მხრივ, გამორჩეული იყო მატჩი "ჰოფენჰაიმსა" და "დორტმუნდს" შორის, რომლებიც იმყოფებოდნენ კიდეც ტურის წინ, შესაბამისად, მეოთხე და მესამე ადგილებზე.
პირველ ტაიმში ორივე გუნდს ჰქონდა შანსი, მაგრამ "ჰოფენჰაიმს" უფრო გაუმართლა - მან საჩუქარი მიიღო დორტმუნდელთა მეკარე ბიურკისგან, რომელმაც პირდაპირ კრამარიჩის ფეხზე მოიგერია ბურთი.

როისმა მეორე ტაიმში უცნაური მოძრაობით გაათანაბრა და ფრე "ჰოფენჰაიმს" ჩემპიონთა ლიგის ზონის მიღმა ტოვებდა, მაგრამ კრამარიჩმა იდეალურ პოზიციაზე გაიყვანა შალაი, რომელმაც ბიურკის თავზე გადაუგდო ბურთი, ხოლო, როცა კადერჟაბეკმა მესამეც გაიტანა, გასაგები გახდა - იულიან ნაგელსმანის გუნდი ბოლო ხუთ წელიწადში პირველად დაამარცხებდა "დორტმუნდს", თანაც ასეთი მნიშვნელობის მატჩში.

"დორტმუნდმა" პირველად გაუშვა 47 გოლი 2007-08 წლების სეზონის შემდეგ, თუმცა, ამას ხელი არ შეუშლია მისთვის ჩემპიონთა ლიგაზე მეოთხე ადგილიდან მოხვედრაში. ბოლო წუთებზე სტუმრების კარში ჩადგა რომან ვაიდენფელერი, რომელმაც კარიერა დაასრულა. მატჩის შემდეგ ის "დორტმუნდის" ტრიბუნასთან მივიდა და ფანებს მიესალმა, "ჰოფენჰაიმის" გულშემატკივრები კი მინდორზე გადავიდნენ და იქ ზეიმობდნენ მესამე ადგილს. გასულ წელს, მათი გუნდი "ლივერპულმა" არ გაუშვა ჩემპიონთა ლიგის ჯგუფურ ეტაპზე, მაგრამ ახლა ნამდვილად ექნებათ იქ დებიუტი.

"ჰოფენჰაიმმა" და "დორტმუნდმა" ბურთების უკეთესი სხვაობით გაუსწრეს "ლევერკუზენს", რომელიც 3:0-ს უგებდა "ჰანოვერს", მაგრამ ბოლოს ორჯერ გაუშვა. "ლაიპციგმა" კი 6-გოლიანი ლამაზი გამარჯვება მოიპოვა ბერლინში, მაგრამ ამას არანაირი აზრი არ ჰქონდა. ის და "ლევერკუზენი" მხოლოდ ევროპის ლიგით უნდა დაკმაყოფილდნენ.

ფაქტები
  • შეწყდა "ბაიერნის" 38-მატჩიანი წაუგებელი სერია საკუთარ მოედანზე.
  • შეწყდა "ბაიერნის" ექვსმატჩიანი მოგებათა სერია.
  • "შტუტგარტმა" ზედიზედ მეოთხე მატჩი მოიგო.
  • "ბაიერნმა" ბოლოს 4 გოლი საკუთარ მოედანზე 2014 წლის აპრილში გაუშვა - ჩემპიონთა ლიგის ნახევარფინალში მადრიდის "რეალისგან".
  • "ჰოფენჰაიმმა" ბოლო 11 მატჩში მხოლოდ ერთხელ წააგო და შვიდჯერ მოიგო.
  • "ჰოფენჰაიმმა" ზედიზედ მეხუთედ და ბოლო შვიდ მატჩში მეექვსედ მოიგო საკუთარ მოედანზე.
  • "დორტმუნდმა" ბოლო 5 მატჩში ერთი მოიგო.
  • "დორტმუნდს" ზედიზედ ხუთმატჩიანი მოუგებელი სერია აქვს სტუმრად.
  • ვაიდენფელერმა ბოლო მატჩი ჩაატარა "დორტმუნდის" რიგებში - 2002 წლიდან მოყოლებული, ვეტერან მეკარეს 349 მატჩი დაუგროვდა.
  • "დორტმუნდს" 10-მატჩიანი წაუგებელი სერია ჰქონდა "ჰოფენჰაიმთან".
  • "ვოლფსბურგმა" შეწყვიტა შინ 8-მატჩიანი მოუგებელი სერია.
  • "კიოლნმა" ზედიზედ მეშვიდედ ვერ მოიგო.
  • "კიოლნს" ბოლო 10 მატჩში ერთი მოგება და 7 წაგება აქვს.
  • "ვერდერმა" შეწყვიტა 5-მატჩიანი მოუგებელი სერია.
  • "ვერდერმა" "მაინცს" ზედიზედ მეოთხედ მოუგო.
  • "ვერდერის" მეკარე პავლენკამ ამ სეზონში მეტოქეთა დარტყმების 77 პროცენტი მოიგერია - ეს საუკეთესო მაჩვენებელია ბუნდესლიგის ყველა მეკარეს შორის.
  • "ჰანოვერს" სტუმრად 12-მატჩიანი მოუგებელი სერია აქვს.
  • "ლევერკუზენმა" შინ ზედიზედ მეათედ მოუგო "ჰანოვერს".
  • "გლადბახმა" სტუმრად ბოლო 11 მატჩში მხოლოდ ერთი მოიგო.
  • "ჰამბურგმა" ბოლო 4 მატჩში მესამედ მოიგო.
  • "ჰამბურგმა" შინ ზედიზედ მესამედ გაიმარჯვა.
  • "შალკეს" ბოლო 12 მატჩში მხოლოდ ერთი წაგება და 9 მოგება აქვს.
  • "შალკეს" შინ 6-მატჩიანი წაუგებელი სერია (+5=1) აქვს.
  • "შალკემ" ბოლო 14 საშინაო მატჩში მხოლოდ ერთხელ წააგო.
  • "აინტრახტს" ბოლო 7 მატჩში ერთი მოგება და 5 წაგება აქვს.
  • "აინტრახტმა" ზედიზედ 7 გასვლითი მატჩი წააგო.
  • ნალდო 7 გოლით მცველებს შორის საუკეთესო ბომბარდირი გახდა.
  • "აინტრახტმა" პირველად წააგო "შალკესთან" 2015 წლის სექტემბრის შემდეგ.
(იბეჭდება მცირე ცვლილებით)
ყოველდღიური სპორტული გაზეთი "ლელო"