მუნდიალი 2018: I ჯგუფი: მსაჯებს ბოდიში აქვთ მოსახდელი [VIDEO]

ხორვატიამ და კოსოვომ მატჩი ვერ დაასრულეს, პირველ ტაიმშივე შეწყდა - როცა ექს-იუგოსლავიის ქვეყნები ერთმანეთს ხვდებიან, ეს ჩხუბსა და დავიდარაბას ნიშნავს, მაგრამ არა ამ შემთხვევაში - ხორვატიაში კოკისპირულად წვიმდა და მატჩი უბრალოდ მეორე დღისთვის გადაიდო.

ცენტრალურ მატჩში კი უკრაინამ 2:0 დაამარცხა თურქეთი. "დორტმუნდში" გადასვლამ ფრთები შეასხა ანდრეი იარმოლენკოს, რომელმაც დუბლი მიითვალა. აღსანიშნავია, რომ თურქეთს პირველად თავკაცობდა რუმინელი მირჩა ლუჩესკუ.
ანდრეი შევჩენკო (უკრაინა): "მეტოქე კარგად შევისწავლეთ და ჩვენი ბიჭების ფუნქციონალური კონდიციები უკეთესი იყო, ტაქტიკურადაც ბრწყინვალედ ვითამაშეთ. შეიძლება ზეიმიც, ოღონდ, მხოლოდ ერთი წუთით".

მირჩა ლუჩესკუ (თურქეთი): "უკრაინის ნაკრების ბირთვი ორ კლუბში თამაშობს და ეს მათი უპირატესობაა. ისინი უფრო იყვნენ მზად ამ შეხვედრისთვის. მსაჯებს ვუმტკიცებდი, რომ შეცდნენ ორივე გოლზე. მათ ამისთვის სულ მცირე, ბოდიში აქვთ მოსახდელი".

ფინეთის ნაკრებმა შესარჩევ ციკლში პირველი მატჩი მოიგო, ისლანდია 1:0 დაამარცხა და უკრაინას მისი გადასწრების საშუალება მისცა. გამარჯვების გოლი ალექსანდერ რინგმა მატჩის დასაწყისშივე გაიტანა, ბოლო 15 წუთი კი ისლანდიამ 10 კაცით ითამაშა.

ფინეთი-ისლანდია 1:0
გოლები: 1:0 რინგი (8)
გაძევება: გისლასონი (76. ისლანდია)

უკრაინა-თურქეთი 2:0
გოლები: 1:0 იარმოლენკო (18), 2:0 იარმოლენკო (42)
უკრაინა (4-4-1-1): პიატოვი - ბუტკო, ხაჩერიდი, კრივცოვი, მატვიენკო - იარმოლენკო, როტანი (79. მალინოვსკი), სტეპანენკო, კონოპლიანკა (90. ზინჩენკო) - კოვალენკო - კრავეცი (70. ბესედინი)


ხორვატია-კოსოვო შეწყდა

თ მ ფ წ ბ ქ
1. უკრაინა 7 4 2 1 11-5 14
2. ხორვატია 6 4 1 1 11-2 13
3. ისლანდია 7 4 1 2 9-7 13
4. თურქეთი 7 3 2 2 11-8 11
5. ფინეთი 7 1 1 5 5-10 4
6. კოსოვო 6 0 1 5 3-18 1

მომდევნო ტური
5 სექტემბერი:
ისლანდია-უკრაინა, თურქეთი-ხორვატია, კოსოვო-ფინეთი.