გუშინ, 5 სექტემბერს, მსოფლიოს ჩემპიონატის საკვალიფიკაციო ეტაპის მე-5 ტურის შეხვედრები გაიმართა.
ბელგიამ ჩეხეთის ნაკრებს უმასპინძლა და დიდი უპირატესობით, 3:0 დაამარცხა.
მასპინძლებმა თავიდანვე აქტიურად დაიწყეს, პირველი გოლი კი დებიუტშივე, მე-8 წუთზე გაიტანეს. თავი რომელუ ლუკაკუმ გამოიჩინა. პირველი ტაიმის ძირითადი დროის დასრულებამდე 4 წუთით ადრე ედენ აზარმა სხვაობა ორამდე გაზარდა.
მეორე ტაიმში ჩეხები გააქტიურდნენ, თუმცა გოლის გატანა ვერ მოახერხეს. ბრწყინვალედ გამოიყურებოდა ბელგიელთა მეკარე ტიბო კურტუა. მატჩის საბოლოო ანგარიში ალექსის საელემაეკერსმა 65-ე წუთზე დააფიქსირა.
ამრიგად, E ჯგუფში 5 ტურის შემდეგ 13 ქულით ბელგია ლიდერობს.
ჩეხეთს 7 ქულა აქვს და მეორე ადგილს იკავებს. "წითელი ეშმაკები" მომდევნო თამაშს 8 სექტემბერს, ბელარუსის წინააღმდეგ გამართავს. ჩეხეთი მე-6 ტურს გამოტოვებს და მსოფლიოს საკვალიფიკაციო ეტაპის გათამაშებაში 8 ოქტომბერს უელსის წინააღმდეგ გასამართ შეხვედრაში ჩაერთვება. მანამდე კი იმავე 8 სექტემბერს უკრაინის ნაკრებს ამხანაგურ შეხვედრაში შეხვდებიან.
ევროპის ვიცე-ჩემპიონმა ინგლისმა ანდორას უემბლის სახელობის მოედანზე უმასპინძლა და 4:0 გაანადგურა.
მასპინძლებმა პირველ ტაიმში მხოლოდ 1 გოლი გაიტანეს. ჯესი ლინგარდმა თავი მე-18 წუთზე გამოიჩინა. მეორე ტაიმში გულშემატკივარმა გოლი 72-ე წუთამდე ვერ იხილა, აქედან მოყოლებული კი, "3 ლომის" ფეხბურთელებმა მეტოქის კარის ბადე 3-ჯერ შეარხიეს. 72-ე წუთზე ჰარი კეინმა თერთმეტმეტრიანი ზუსტად შეასრულა. 78-ე წუთზე ჯესი ლინგარდმა ანდორის კარი მეორედ აიღო, შეხვედრის საბოლოო ანგარიში კი ბუკაიო საკამ 85-ე წუთზე დააფიქსირა.
ამრიგად, 5 ტურის შემდეგ I ჯგუში 15 ქულით ინგლისი ლიდერობს. ანდორას 3 ქულა აქვს და მე-5 ადგილს იკავებს.
"3 ლომი" მომდევნო შეხვედრას 8 სექტემბერს პოლონეთის წინააღმდეგ გამართავს. ანდორა იმავე რიცხვში უნგრეთს ესტუმრება.
სან-მარინომ საკუთარ კედლებში პოლონეთს უმასპინძლა და 1:7 განადგურდა.
პოლონელებმა პირველ ტაიმში მეტოქეს 4 გოლი გაუტანეს (ლევანდოვსკი 2, სვიდერსკი, ლინეტი), მეორე ტაიმში რობერტ ლევანდოვსკი მწვრთნელმა შეცვალა, მის ნაცვლად კი ადამ ბუკსა შემოიყვანა, რომელმაც საბოლოოდ ჰეთ-თრიკის შესრულება მოახერხა. პოლონელმა ფორვარდმა თავი 67-ე, 90+2-ე და 90+4-ე წუთებზე გამოიჩინა.
მასპინძელთა რიგებიდან ერთადერთი გოლი 48-ე წუთზე გაიტანეს. თავი ნიკოლა ნანიმ გამოიჩინა.
ამრიგად, 5 ტურის შემდეგ I ჯგუფში პოლონეთს 10 ქულა აქვს და მე-2 ადგილზე იმყოფება. სან-მარინო 0 ქულით მე-6 ადგილს იკავებს.
როგორც უკვე აღვნიშნე, პოლონეთი 8 სექტემბერს ინგლისს უმასპინძლებს. სან-მარინო იმავე რიცხვში ალბანეთს ესტუმრება.
შტუტგარდში, "მერსედეს ბენცის" არენაზე, ადგილობრივმა გერმანიამ სომხეთს უმასპინძლა და 6:0 გაანადგურა.
მასპინძლებმა პირველი ტაიმი 4:0 მოიგეს. გოლები სერჟ გნაბრიმ (2), მარკო როისმა და ტიმო ვერნერმა გაიტანეს. მეორე ნახევარში "ბუნდესნაკრებმა" თამაში იმავე სცენარით განაგრძო. 52-ე წუთზე იონას ჰოფმანმა მე-5 გოლი გაიტანა, მატჩის საბოლოო ანგარიში კი კარიმ ადეიემიმმა დააფიქსირა, ახალგაზრდა გერმანელმა თავი 90+1 წუთზე გამოიჩინა.
ამრიგად, J ჯგუფში გერმანია 12 ქულით 1-ელ ადგილზე იმყოფება. სომხეთი 10 ქულით მეორე ადგილს იკავებს.
"ბუნდესნაკრები" მომდევნო შეხვედრას 8 სექტემბერს, ისლანდიის წინააღმდეგ გამართავს. სომხები იმავე რიცხვში ლიხტენშტაინს უმასპინძლებენ.
მურიქიმ 90+2-ე წუთზე კოსოვოს საბერძნეთთან ქულა მოუპოვა
მორიგი მარცხი და 1 ქულა 15 შესაძლებლიდან - ასეთი შედეგი საქართველოს ნაკრებს ვაისის ეპოქაშიც არ ჰქონდა [VIDEO]
