ჩემპიონთა ლიგა. პლეი ოფის წილისყრა

ჩემპიონთა ლიგის პლეი ოფის წილისყრამ ორი განსაკუთრებით საინტერესო წყვილი შეადგინა.

გერმანიის მესამეადგილოსანი მიონხენგლადბახის "ბორუსია" ელიტარული საკლუბო ლიგის ჯგუფურ ეტაპზე მოსახვედრად უკრაინულ გრანდ კიევის "დინამოს" შეებრძოლება.

დაძაბული უნდა გამოვიდეს მოსკოვის "სპარტაკისა" თურქეთის ვიცე-ჩემპიონ "ფენერბაჰჩეს" დუელებიც.

წილისყრით ყველაზე გულდაწყვეტილები გერმანელები დარჩნენ - მეტოქის გარკვევის შემდეგ, "გლადბახის" შვეიცარიელი თავკაცი ლუსიენ ფავრი და სხვა ხელმძღვანელები ამბობდნენ, კიევის "დინამო" ყველა შესაძლო მეტოქეზე ძლიერიაო.

მიონხენგლადბახელები მართლები არიან, რადგან უკრაინის 26 გზის ჩემპიონმა წინა სეზონი უკრაინის ჩემპიონატში მეორე ადგილზე დაასრულა, ახალი სეზონი ოთხი მოგებით დაიწყო, მესამე საკვალიფიკაციო ეტაპზე კი ჩემპიონთა ლიგის ჯგუფურ ეტაპზე მოსახვედრად ბრძოლას როტერდამის "ფეიენოორდი" გამოთიშა (2:1, 1:0). პირველი მატჩი 21 აგვისტოს მიონხენგლადბახში გაიმართება, საპასუხო კი - 29 აგვისტოს კიევში.

"გლადბახი" და კიევის "დინამო" ევროტურნირებზე აქამდე ერთმანეთს მხოლოდ ერთხელ შეხვდნენ: ეს 1976/77 წლების სეზონში მოხდა, როცა ორივე გუნდს საუკეთესო დროება ედგა - "გლადბახი" გერმანიის გრანდი გახლდათ, "დინამოში" კი ოლეგ ბლოხინი და კომპანია თამაშობდნენ. მაშინ ორრაუნდიან ბრძოლაში გერმანელებმა იმარჯვეს (0:1, 2:0).

საინტერესო დეტალი: კიევში ახლა ბრაზილიელი ფლეიმეიკერი რაფაელი თამაშობს, რომელსაც "გლადბახის" თავკაცი ფავრი ჯერ "ციურიხში" წვრთნიდა, მერე ბერლინის "ჰერტაშიც" გადაიყვანა და ბოლოს მიონხენგლადბახშიც სურდა მისი წაყვანა. 27 წლის რაფაელი "ჰერტადან" "დინამოში" რამდენიმე კვირის წინ გადავიდა - კიეველებმა ბერლინელებს 8 მილიონი ევრო გადაუხადეს.

"არ გაგვიმართლა: ყველაზე ძლიერი მეტოქე შეგვხვდა. ყველაზე მეტად "კოპენჰაგენთან" გვსურდა დაჯახება... ყველაფერი უნდა გავაკეთოთ იმისათვის, რომ კიევის "დინამოს" ბარიერი გადავლახოთ," - განაცხადა წილისყრის შემდეგ "გლადბახის" პრეზიდენტმა როლფ კიონიგსმა.

რაც შეეხება სხვა წყვილებს: ფაქტია, რომ მოსკოვის "სპარტაკი" და "ფენერბაჰჩე" ერთმანეთს უმძიმეს ბრძოლას გაუმართავენ - დღესდღეობით ორივე გუნდი კარგ ფორმაშია.

ფინანსურ კრიზისში ჩაძირული ესპანური "მალაგა" "პანათინაიკოსს" დაუპირისპირდება, იტალიის მესამეადგილოსან "უდინეზეს" პორტუგალიურ "ბრაგასთან" ექნება საქმე, ხოლო ფრანგული "ლილი" "კოპენჰაგენის" ბარიერის გადალახვას შეეცდება.

შვეიცარიული "ბაზელი", რომელმაც შარშან ყველასათვის მოულოდნელად ჯგუფში "მანჩესტერ იუნაიტედი" ჩატოვა, მერვედფინალში კი მომავალ ფინალისტ მიუნხენის "ბაიერნთან" დამარცხდა, რუმინულ "კლუჟს" შეხვდება. შოტლანდიის ჩემპიონ "სელტიკს" მეტოქედ "ჰელსინგბორგი" ერგო და წესით, გლაზგოელებმა ჯგუფურ ეტაპზე უნდა გააღწიონ.

თარიღი დრო მატჩი
21 აგვისტო 20:00 სპარტაკი-ფენერბაჰჩე
29 აგვისტო 22:45 ფენერბაჰჩე-სპარტაკი
21 აგვისტო 22:45 ბაზელი-კლუჟი
29 აგვისტო 22:45 კლუჟი-ბაზელი
21 აგვისტო 22:45 ჰელსინგბორგი-სელტიკი
29 აგვისტო 22:45 სელტიკი-ჰელსინგბორგი
21 აგვისტო 22:45 ბორუსია (მ)-დინამო (კ)
29 აგვისტო 22:45 დინამო (კ)-ბორუსია (მ)
21 აგვისტო 22:45 ლილი-კოპენჰაგენი
29 აგვისტო 22:45 კოპენჰაგენი-ლილი
22 აგვისტო 22:45 ბატე-შმონა
28 აგვისტო 22:45 შმონა-ბატე
22 აგვისტო 22:45 ლიმასოლი-ანდერლეხტი
28 აგვისტო 22:45 ანდერლეხტი-ლიმასოლი
22 აგვისტო 22:45 დინამო (ზ)-მარიბორი
28 აგვისტო 22:45 მარიბორი-დინამო (ზ)
22 აგვისტო 22:45 ბრაგა-უდინეზე
28 აგვისტო 22:45 უდინეზე-ბრაგა
22 აგვისტო 22:45 მალაგა-პანათინაიკოსი
28 აგვისტო 22:45 პანათინაიკოსი-მალაგა

ყოველდღიური სპორტული გაზეთი "ლელო"