ბევრი იწვალა თუ ცოტა, "სელტიკმა" "იუვენტუსთან" ვერაფერი გააწყო, ტურინელებმა კი "სელტიკ-პარკზე" სამი ბურთი გაიტანეს და 6 მარტს დაგეგმილი საპასუხო მატჩი ფორმალობად აქციეს."სელტიკს" საკუთარ კედლებში ჩემპიონთა ლიგის 24 შეხვედრა აქვს ჩატარებული და მხოლოდ მესამე მარცხი იწვნია - იტალიურმა ჭკუამ შოტლანდიურ ღონეს აჯობა, "იუვე", ფაქტობრივად, მეოთხედფინალშია.
რეაქციები
ნეილ ლენონი ("სელტიკის" მთავარი მწვრთნელი): "ტაბლოზე "იუვენტუსისთვის" საოცნებო, საამო შედეგი დაფიქსირდა. არადა, 70 წუთის განმავლობაში მეტოქეს აშკარად ვჯობდით. ასეთი გოლების გაშვება დაუშვებელია, ჩემპიონთა ლიგის პლეი ოფში ამგვარ შეცდომებს არათუ "იუვენტუსი", არცერთი გუნდი არ გაპატიებს.
ანტონიო კონტე ("იუვენტუსის" მთავარი მწვრთნელი): "ჩემი ბიჭების თამაშით ძალიან კმაყოფილი ვარ, შესანიშნავად იბრძოლეს და ყველაფერი ისე გააკეთეს, როგორც დავავალე. ჩვენი სტრატეგიულად სწორი და მაქსიმალურად მობილიზებული მოქმედებები "სელტიკის" დამსახურებაცაა - შოტლანდიელებმაც მაქსიმუმი გააკეთეს და ამით გვაიძულეს, რომ ჩვენც ასე გვეთამაშა. პირველიდან ბოლო წუთამდე უმძიმესი წნეხის ქვეშ ვიყავით. "სელტიკმა" მაგრად იბრძოლა, ჩემი აპლოდისმენტები გლაზგოურ გუნდს და "სელტიკ პარკის" პუბლიკას."
შემადგენლობები
"სელტიკის" ფეხბურთელები დასვენებულები იყვნენ და ეს მთელი მატჩის განმავლობაში ეტყობოდათ - გასულ უქმეებზე "ინვერნესთან" 3:1-ზე მოგებულ მატჩში ძირითადი შემადგენლობიდან ხომ მხოლოდ მეკარე ფორსტერმა და კომონსმა ითამაშეს. ლენონის გუნდს აშკარად ძალიან დააკლდა სამარასი - ბერძენ თავდამსხმელს რომ ეთამაშა, შეიძლება, მაღალ ჩაწოდებებს "იუვეს" საჯარიმოში შედეგი გამოეღო.
სამარასის არყოფნაში წინა ხაზის მთელი ტვირთი ჰუპერს დააწვა, რომელსაც "იუვეს" მცველები სამაგალითოდ მეურვეობდნენ.
"იუვენტუსს" კიელინისთან ერთად, ასამოა და დე ჩელიეც აკლდნენ. თუკი კასერესმა "იუვეს" უკანა ხაზს ჯორჯოს არყოფნა არ დაამჩნია. გამოუცდელმა ახალწვეულმა პელუზომ მარცხენა ფრთაზე ასამოას ან დე ჩელიეს საქმის ნახევარიც ვერ გააკეთა. ისევე, როგორც "ფიორენტინასთან" კონტე თავდასხმაში ვუჩინიჩი-მატრის ტანდემს დაეყრდნო და მართალია, მირკო დიდხანს არ ჩანდა, ხოლო ალესანდროს კი შოტლანდიელი მცველები სისწრაფეში ჩაგრავდნენ, მაგრამ ორივემ გოლები გაიტანა და ამით ყველაფერი ნათქვამია.
გოლები
0:1 მატრი (3): კასერესის გრძელ პასს ამბროუზის პოზიციური შეცდომა მოჰყვა და ფორსტერთან, ფაქტობრივად, პირისპირ დარჩენილმა მატრიმ "სელტიკის" მეკარეს ბურთი ფეხებშუა გაუტარა. ბურთმა მოედნის ხაზი აშკარად გადაკვეთა, მაგრამ მსაჯი ამ გოლის ჩათვლას არ აპირებდა და რომ არა მარკიზიოს ხეირიანი დამატება, რაც უნდა პარადოქსულად ჟღერდეს, შესაძლოა, "იუვენტუსს" ანგარიში ასე მალე ვერ გაეხსნა. გოლი საბოლოოდ მატრის ჩაუთვალეს.
0:2 მარკიზიო (77): პადოინისგან მიღებული ბურთი მატრიმ მშვენიერი პასით მარკიზიოს გაატანა, ამ უკანასკნელმა კი გლაზგოელთა საჯარიმოში ვილსონი მარტივი, მაგრამ მოხდენილი მოძრაობით ჩამოიშორა და ფორსტერს ახლო კუთხეში გაუტანა.
0:3 ვუჩინიჩი (83): ამბროუზის მორიგი უპატიებელი შეცდომით მარკიზიომ ისარგებლა და ვუჩინიჩს მოემსახურა, რომელსაც ფორსტერის კარში მესამე გოლის გატანა არ გასჭირვებია.
გმირი
კლაუდიო მარკიზიო (იუვენტუსი)
საკმაოდ ინტენსიურ მატჩში კლაუდიომ ყველაზე მეტი იშრომა. დაცვით ფუნქციებსაც კარგად ასრულებდა და შეტევაშიც გამორჩეული იყო. ამასთან, მარკიზიომ მშვენიერი გოლიც გაიტანა, მერე კი ჭკვიანური და დროული პასით ვუჩინიჩსაც გაატანინა. აქვე ისიც დავამატოთ, რომ კინაღამ პირველი გოლის ავტორიც გახდა.
ანტიგმირი
ეფე ამბროუზი (სელტიკი)
კვირას ეფემ ნიგერიის ნაკრებთან ერთად აფრიკის თასი აღმართა, მერე კი გლაზგოში გაემგზავრა და სამშაბათს ჩემპიონთა ლიგის უმნიშვნელოვანეს მატჩში აშკარად აჭრილი იყო. ამბროუზი ბურთთან ყოველი შეხებისას თავდაუჯერებელი ჩანდა და პირველ რიგში, სწორედ მისი ბრალია, "იუვენტუსმა" სწრაფი გოლი რომ გაიტანა.
62-ე წუთზე მან ანგარიშის გათანაბრების კარგი შანსი გაუშვა ხელიდან და ვუჩინიჩის გოლიც მის სინდისზეა. ერთი სიტყვით, ეს ნამდვილად არ იყო ეფეს დღე.
მსაჯი
ალბერტო უნდიანო მალენკომ ნორმალურად იმსაჯა. რამდენჯერმე კი შეცდა და აშკარად ეტყობოდა, რომ "სელტიკ პარკის" ატმოსფერომ მასზეც იმოქმედა, მაგრამ ისეთი შეცდომა არ დაუშვია, შედეგზე რომ ემოქმედა.
მწვრთნელები
ნეილ ლენონი ჭკვიანურად მოიქცა, "ინვერნესთან" სასტარტოს თითქმის ყველა ფეხბურთელი რომ დაასვენა. აი, ეფე ამბროუზის ძირითადში გამწესებით კი მწარედ შეცდა. პირველი ტაიმის მეორე ნახევარში "სელტიკი" ისე იბრძოდა და ისე უტევდა, ვიფიქრეთ, რომ მეორე ტაიმში გლაზგოელები აუცილებლად გაიტანდნენ, მაგრამ "სელტიკმა" იმედები სწორედ მეორე ნახევარში გაგვიცრუა, რაც ლენონს აქტივში ნამდვილად არ ჩაეწერება.
როგორც მოსალოდნელი იყო, კონტემ "იუვენტუსი" მომლოდინე ტაქტიკით ათამაშა და ჩასაფრების ტაქტიკამ ასი პროცენტით გაუმართლა. ამასთან, ალბათ კონტეს დამსახურებად უნდა მივიჩნიოთ ისიც, რომ მეორე ტაიმში "იუვემ" წნეხს თავი აარიდა.
რაც თვალში მოგვხვდა
- "სელტიკმა" თავიდანვე ვაჟკაცურად შეუტია და "იუვე" დაწნეხა. თუმცა შოტლანდიელთა იერიშები ტურინული კლუბის დაცვის გასარღვევად ზედმეტად ერთფეროვანი იყო. გლაზგოელები უმეტესად ფლანგებიდან უტევდნენ და ბურთს საჯარიმოში აწოდებდნენ, მაგრამ... იქ სამარასი არ ჰყავდათ!
- ტურინელთა სასახელოდ უნდა ითქვას, რომ "სელტიკ პარკის" ატმოსფერომ მათზე დამთრგუნველად არ იმოქმედა - მათი პირველივე ხეირიანი შეტევა პლეი ოფისთვის ესოდენ მნიშვნელოვანი გოლით დამთავრდა. ამის შემდეგ იტალიელები უფრო საკუთარი კარის უსაფრთხოებაზე ზრუნავდნენ და საკუთარი საჯარიმოს მისადგომებთან მუდმივად 8 ფეხბურთელი ჰყავდათ.
- ბურთის დაუფლების შემდეგ "იუვე" სწრაფად გადადიოდა შეტევაში როგორც მოკლე, ასევე ვუჩინიჩის ან მატრის მისამართით გაკეთებული გრძელი პასებით.
- შესვენების შემდეგ "იუვემ" თამაშზე კონტროლის დამყარება შეძლო, "სელტიკს" კი ხეირიანი შეტევების განხორციელება უჭირდა. აღსანიშნავია, რომ შოტლანდიელებს მეტოქის კარისკენ ამდენჯერ (17) ჩემპიონთა ლიგის ჯგუფური ეტაპის არცერთ მატჩში არ დაურტყამთ, გოლი კი ვერაფრით გაიტანეს.
- მატჩის მიწურულს "იუვენტუსმა" იტალიური გრანდისთვის დამახასიათებელი სადამსჯელო ღონისძიებები ჩაატარა - "სელტიკს" არცერთი შეცდომა არ აპატია.
დასკვნა
გლაზგოელებმა 90 წუთის განმავლობაში შეუჩერებლად ირბინეს, გოლები კი "იუვენტუსმა" გაიტანა. ტურინული კლუბის გამარჯვება ლოგიკურია, მაგრამ "სელტიკი" 0:3-ს მართლაც არ იმსახურებდა.
სელტიკი-იუვენტუსი 0:3
გოლები: 0:1 მატრი (3), 0:2 მარკიზიო (77), 0:3 ვუჩინიჩი (83)
სელტიკი (4-1-2-2-1): ფორსტერი - ლუსტიგი (59. მეტიუსი), კ. ვილსონი, ამროუზი, ისაგირე - მულგრიუ - ბრაუნი (80. კაიალი), ვანიამა - ფორესტი, კომონსი (73. ვოტი) - ჰუპერი.
იუვენტუსი (3-5-2): ბუფონი - ბარძალი, ბონუჩი, კასერესი - ლიხტშტაინერი, ვიდალი, პირლო, მარკიზიო, პელუზო (69. პადოინი) - მატრი (81. პოგბა), ვუჩინიჩი (86. ანელკა).
გაფრთხილება: ჰუპერი, ფორესტი, ბრაუნი - ლიხტშტაინერი, პადოინი, მარკიზიო
მაყურებელი: 57 917
Video
სელტიკი - იუვენტუსი 0:3
სელტიკი - იუვენტუსი 0:3
ყოველდღიური სპორტული გაზეთი "ლელო"
ასევე იხილეთ:
სელტიკი-იუვენტუსი 0:3 - რა მნიშვნელობა აქვს, ვინ გაიტანა, "იუვე" წინ მიიწევს [VIDEO]
