"ბაიერნთან" მატჩი "არსენალისთვის" ამ სეზონში ყველაზე მნიშვნელოვანია და ლონდონელებს სწორედ ასეთი შეხვედრის წინ წაუხდათ ხასიათი - არსენ ვენგერის გუნდი ასოციაციის თასზე ქვედალიგელ "ბლექბერნთან" 0:1 დამარცხდა და ამ ტურნირს გამოეთიშა. ამრიგად, ლონდონელებმა მორიგი ტიტულის მოგების შანსი დაკარგეს, რაც იმასაც ნიშნავს, რომ ამ სეზონში იმედად მხოლოდ ჩემპიონთა ლიგა დარჩათ და სხვათა შორის, სულაც არ ფიქრობენ, რომ შესანიშნავ ფორმაში მყოფ გერმანულ გიგანტთან უშანსოდ არიან.
2005 წელს "არსენალმა" ასოციაციის თასი მოიგო და მას მერე "მეთოფეებს" ტიტული აღარ ღირსებიათ. ახლა კი ვენგერის გუნდი ფეხბურთის ისტორიაში
ამიტომაც იყო, "ემირეითსის" პუბლიკამ საყვარელ გუნდს ობსტრუქცია რომ მოუწყო, ვენგერმა კი აღიარა, რომ მისი გუნდი დღესდღეობით ყველა მატჩისთვის სათანადოდ განწყობას ვერ ახერხებს.
ვენგერი 0:0-ზეც თანახმაა, მაგრამ...
თამამად შეიძლება ითქვას, რომ ფრანგ სპეციალისტს ყველაზე რთული დროება უდგას მას მერე, რაც "არსენალში" მუშაობა დაიწყო (1996). "მეთოფეები" ორივე თასიდან გავარდნენ, პრემიერლიგაში ჩემპიონთა ლიგის ზონას 4 ქულით ჩამორჩებიან და ნელ-ნელა ეგუებიან იმას, რომ ეს ზედიზედ მერვე უტიტულო სეზონი იქნება.
შესაბამისად, უფრო და უფრო ხშირად გაისმის საუბრები ვენგერის წასვლის შესახებ და ჩემპიონთა ლიგა და 19 თებერვალს გასამართი თამაში ლამის ერთადერთია, რასაც ვენგერისთვის პოსტის შენარჩუნება შეუძლია.
"ბაიერნთან" დუელები ჩვენთვის შესანიშნავი შანსია საიმისოდ, რათა ყველას დავუმტკიცოთ, რომ "არსენალი" ცოცხალია და ჯერ კიდევ მტკიცე ხასიათი აქვს, - განაცხადა პრესკონფერენციაზე 63 წლის სპეციალისტმა, რომელიც სულაც არ ფიქრობს, რომ მისი გუნდი ბავარიულ გრანდთან აუტსაიდერია, - ჩვენ ნამდვილად შეგვიძლია "ბაიერნის" დამარცხება. 2006 წელი მახსენდება და კერძოდ ის, რომ როცა მადრიდში მივდიოდით, "რეალში" ზიდანი, ბექჰემი, რაული და გუტი თამაშობდნენ, მაგრამ ჩვენ მოვიგეთ!"
"არსენალი" პირველ მატჩს საკუთარ მოედანზე ატარებს და ფაქტია, რომ ლონდონელებმა ამ თამაშის მოსაგებად ყველაფერი უნდა გააკეთონ, რადგან გასვლით მატჩებში არასახარბიელო ისტორია აქვთ - "არსენალმა" ჩემპიონთა ლიგის პლეი ოფებში სტუმრად ბოლო რვა შეხვედრიდან შვიდი წააგო!
ვენგერმა მატჩის წინა დღეს ამიტომაც თქვა, "ბაიერნთან" საშინაო მატჩში ნომერ პირველი ამოცანა კარის მშრალად შენახვა უნდა იყოსო.
"ცუდი შედეგი არც 0:0 იქნებოდა, მაგრამ, ცხადია, გოლების გატანაც გვინდა," - დასძინა ფრანგმა.
უილშირის იმედად
ლონდონელთა ერთ-ერთი უმთავრესი იმედი 21 წლის ჯეკ უილშირია, რომელიც თითქმის ერთწლიანი იძულებითი პაუზის შემდეგ დაბრუნდა და ფორმაც აღიდგინა.
უილშირმა "ბლექბერნთან" მოედანზე 18 წუთი დაჰყო, ბრაზილიასთან ამხანაგურ მატჩში კი (2:1) ინგლისის ნაკრებში ძალიან კარგად იასპარეზა.
"უილშირს შეუძლია, რომ მსოფლიოში საუკეთესო საყრდენი ნახევარმცველი გახდეს", - შეგირდს აქებს ვენგერიც. თავად ფეხბურთელს კი მიაჩნია, რომ "ბაიერნთან" დუელებში "არსენალმა" ლონდონის "ჩელსის" უნდა მიბაძოს.
ეს ის შემთხვევაა, როცა ჩვენთვის "ჩელსი" მისაბაძი მაგალითი უნდა იყოს. მართალია, წინა სეზონში "ჩელსის" ძალიან უჭირდა და ხშირ შემთხვევებში გაუმართლა კიდეც, მაგრამ ამ გუნდმა ხასიათი გამოავლინა და მედგრად იბრძოლა. ჩვენც ასე უნდა ვითამაშოთ!" - აცხადებს უილშირი.
მერტე და პოლდი ყურადღების ცენტრში
ყურადღების ცენტრში მოექცევიან ლონდონელთა გერმანელი ფეხბურთელებიც - პერ მერტეზაკერი და ლუკას პოდოლსკი, რომლებიც ვენგერმა "ბლექბერნთან" სწორედ იმიტომ დაასვენა, რომ "ბაიერნთან" დაპირისპირებას სრულ მზადყოფნაში შეხვედროდნენ.
მერტე და პოლდი დღეს აუცილებლად ძირითად შემადგენლობაში იქნებიან.
ლონდონელებს ამ სეზონში გიბსის ტრავმის გამო განსაკუთრებით მარცხენა ფლანგზე უჭირთ და მართალია, "მალაგადან" ნაჩო მონრეალი გადაიბირეს, მაგრამ ამ უკანასკნელს ჩემპიონთა ლიგაში თამაშის უფლება არ აქვს.
რაკი ანდრე სანტოსი ბრაზილიაში გაუშვა, "ბაიერნთან" დაცვის მარცხენა ფლანგზე, სავარაუდოდ, თომას ვერმაელენს ათამაშებს. 18 თებერვლის საღამომდე კითხვის ნიშნის ქვეშ იყო ცენტრალური მცველის, ლორან კოშელნის ასპარეზობაც და თუ "არსენალს" ეს უკანასკნელიც დააკლდა, მაშინ ვენგერს დაცვაში საკადრო პრობლემა ექნება. ასეთ შემთხვევაში არსენი დაცვის ცენტრში, მერტეზაკერთან ერთად, ალბათ ვერმაელენს გაამწესებს.
ჰაინკესი: სიფრთხილე გვმართებს!
ხუთი გამარჯვება, ბურთების შეფარდება 13:0 - "ბაიერნმა" სეზონის ნახევარი იდეალურად დაიწყო და გერმანიაში ქვას ქვაზე არ ტოვებს. ახლა კი ბავარიულ გიგანტს "არსენალი" გამოსცდის. მიუნხენელები ლონდონში თავდაჯერებულები გაემგზავრნენ, თუმცა რეკორდმაისტერის მთავარმა მწვრთნელმა იუპ ჰაინკესმა შეგირდებს მოუწოდა, ნუ დაგაბრმავებთ ის, რომ ლონდონური კლუბი "ბლექბერნთან" დამარცხდაო.
"ამ გუნდით აღფრთოვანებული ვარ. დიდი ხანია, "ბაიერნით" ასე კმაყოფილი არ ვყოფილვარ, მაგრამ აქამდე ჩვენს შესაძლებლობებს მხოლოდ ბუნდესლიგაში ვამტკიცებდით, ახლა კი ჩემპიონთა ლიგაშიც უნდა გავიბრწყინოთ," - განაცხადა ლონდონში გამგზავრებამდე "ბაიერნის" ვიცე-პრეზიდენტმა კარლ-ჰაინც რუმენიგემ.
"ლონდონისკენ ლონდონის გავლით!" - ასე ჟღერს მიუნხენელთა საჩემპიონთალიგო დევიზი ამ სეზონში, რადგან ევროპის ელიტარული საკლუბო ლიგის ფინალი 25 მაისს სწორედ ინგლისის დედაქალაქში, "უემბლიზე" უნდა გაიმართოს.
"ამ თასის მოგება ძალიან მინდა და თან, რაც შეიძლება, სწრაფად! სწორედ ამიტომ ჩემი მიზანი წელს ისაა, რომ ეს არ იყოს ჩვენი ბოლო ვიზიტი ლონდონში," - აცხადებს თომას მიულერი "კიკერისთვის" მიცემულ ინტერვიუში. 23 წლის მიულერი ჩემპიონთა ლიგის თასთან შარშანაც ძალიან ახლოს იყო, მაგრამ მიუნხენში გამართულ ფინალში მის მიერ 83-ე წუთზე გატანილი გოლი რეკორდმაისტერს არ ეყო და გეხსომებათ, ფინალი "ჩელსიმ" მოიგო.
"არსენალი" ძალიან კარგად უტევს და მინდა, ჩემი შეგირდები კიდევ ერთხელ გავაფრთხილო - ნუ დაბრმავდებიან იმით, რომ ლონდონელები "ბლექბერნთან" დამარცხდნენ და ამ სეზონში არსახარბიელოდ გამოიყურებიან. გადახედეთ იმ ფეხბურთელებს, რომლებიც ლონდონელთა წინა ხაზზე მოქმედებენ და მიხვდებით, რომ "არსენალთან" ურთულესი მატჩები გველის: პოდოლსკი, უოლკოტი, კასორლა, ჟირუ - მათ ნებისმიერის გამწარება შეუძლიათ," - ეს კი ჰაინკესის სიტყვებია, რომელსაც "ვოლფსბურგთან" მოპოვებული გამარჯვების (2:0) შემდეგ, რითაც "ბაიერნმა" ბუნდესლიგაში 15-ქულიანი უპირატესობა შეინარჩუნა, ხავი მარტინესი უბრუნდება. ესპანელი საყრდენი ნახევარმცველი ძირითად შემადგენლობაში ლუის გუსტავოს შეცვლის.
ჩემპიონთა ლიგა. 1/8-ფინალი. I მატჩი
არსენალი-ბაიერნი 23:45
სავარაუდო შემადგენლობები
არსენალი (4-2-3-1): შჩესნი - სანია, მერტეზაკერი, კოშელნი, ვერმაელენი - უილშირი, არტეტა - უოლკოტი, კასორლა, პოდოლსკი - ჟირუ.
ბაიერნი (4-2-3-1): ნოიერი - ლამი, ვან ბუიტენი, დანტე, ალაბა - ხავი მარტინესი, შვაინშტაიგერი - თ. მიულერი, კროოსი, რიბერი - მანჯუკიჩი.
არბიტრი: სვეინ ოდვარ მოენი (ნორვეგია)
ურთიერთშეხვედრები
09.03.2005
არსენალი-ბაიერნი 1:0
გოლი: 1:0 ანრი (66)
22.02.2005
ბაიერნი-არსენალი 3:1
გოლები: 1:0 პისარო (4), 2:0 პისარო (58), 3:0 სალიჰამიჯიჩი (65), 3:1 კოლო ტურე (88)
14.03.2001
ბაიერნი-არსენალი 1:0
გოლი: 1:0 ელბერი (10)
05.12.2000
არსენალი-ბაიერნი 2:2
გოლები: 1:0 ანრი (4), 2:0 კანუ (55), 2:1 ტარნატი (56), 2:2 შოლი (66)
ყოველდღიური სპორტული გაზეთი "ლელო"
ასევე იხილეთ:
იუპ ჰაინკესი: "არსენალის" შეუფასებლობა არ შეიძლება
პორტუ VS მალაგა - დარჩება "მალაგა" დაუმარცხებელი?
