"ბარსელონას" შანსები ისედაც მიზერული იყო და მას შემდეგ, რაც ლიონელ მესის თადარიგში დატოვების შესახებ გაცხადდა, ყველა კითხვას გაეცა პასუხი - არგენტინელის გარეშე კატალონიური გრანდი 4-ბურთიანი ფორის აღმომფხვრელი არ იყო, თუმცა რომელ აღმოფხვრაზეა ლაპარაკი...დიდი ეპოქის დასასრული?
მიუნხენის "ბაიერნმა" კიდევ ერთხელ დაამტკიცა, რომ ამ მომენტში "ბარსელონაზე" უკეთესი გუნდია. მიუნხენურმა გიგანტმა ყველა კომპონენტში დაჯაბნა მეტოქე და ორი მატჩის ჯამში, გამანადგურებელი ანგარიშით გაიმარჯვა.
მომენტების აღწერას აღარ მოვყვებით, რადგან სათქმელი ბევრიც არაფერია... მასპინძლები უღონოდ ცდილობდნენ მანუელ ნოიერის კართან ვითარების გამწვავებას, მიუნხენელებს კი თითქოს ნახევარი
ერთი ეგაა, სტუმრებს ეს ნაკლებად სჭირდებოდათ და დიდი ძალებით არც გადასულან შეტევაში, თუმცა გოლები კი მაინც ოხრად შეყარეს.
გერმანელების იერიშები გაცილებით მწვავე იყო და შეხვედრის 48-ე წუთზე გახსნეს კიდეც ანგარიში - არიენ რობენი ჩვეულ სტილში შეიჭრა მეტოქის საჯარიმოში, ფლანგიდან ცენტრისკენ წაიღო ბურთი, ერთ მცველს უპრობლემოდ აუარა გვერდი და უძლიერესი დარტყმით ვალდესი უშანსოდ დატოვა.
ალბათ, სწორედ ამ მომენტში გადაიფიქრა ტიტო ვილანოვამ ლიონელ მესის მოედანზე შეყვანა, რადგან უკვე არავითარი აზრი აღარ ჰქონდა... "ბარსა" 6 გოლის გამტანი ნამდვილად არ იყო, თვით მესისთან ერთადაც კი.
იხილეთ ვიდეო
ესპანელთა საცოდაობა რობენის გოლით არ დასრულებულა - 72-ე წუთზე, ფრანკ რიბერი გაიჭრა ფლანგზე, ჩააწოდა კიდეც, პიკემ კი ბურთი საკუთარ კარში ჩაჭრა, 0:2.
ამ ეპიზოდიდან სულ რაღაც 4 წუთი იყო გასული, როდესაც თომას მიულერმაც გაიტანა და შეხვედრის საბოლოო ანგარიში დააფიქსირა, 0:3 და 7:0 ორი მატჩის ჯამში. ეს თითქოს მეტისმეტი იყო, რადგან ყველაფრის მომგები გუნდის ასეთ დღეში ხილვა მთლად სასიამოვნო ნამდვილად არაა, შესაძლოა, თვით "ბაიერნის" ქომაგებისთვისაც კი.
იხილეთ ფოტოგალერეა
ქებათა ქება კატალონიელ გულშემატკივრებს, რომლებსაც ერთი წუთითაც არ უფიქრიათ თავისი გუნდისთვის ობსტრუქციის მოწყობა, ბოლომდე უქომაგეს თავისიანებს და მეტოქეც ტაშით შეამკეს.
მიუნხენის "ბაიერნმა" "ბარსელონა" კიდევ უფრო დამაჯერებლად გაიარა, ვიდრე "იუვენტუსი" და სრულიად დამსახურებულად გავიდა ფინალში.
ფაქტია, რომ იუპ ჰაინკესმა უძლიერესი გუნდი შექმნა, რომლის თამაშის ხილვაც ბევრად უფრო საინტერესო იქნებოდა პეპ გვარდიოლას "ბარსასთან", გუნდთან, რომელიც ყველას უგებდა და ყველაფერს იგებდა.
წინ გერმანული ფინალია, მიუნხენის "ბაიერნი" დორტმუნდის "ბორუსიას" წინააღმდეგ და მიუხედავად იმისა, რომ ბავარიელები მეგა-გუნდის შთაბეჭდილებას ტოვებენ, არ უნდა დაგვავიწყდეს, რომ ბოლო წლებში სტატისტიკა დორტმუნდელთა სასარგებლოდ მეტყველებს - ნებისმიერ შემთხვევაში, წინ ძალიან საინტერესო ჯახი გველის.
პეპ გვარდიოლა კი დღეს "ბარსელონას" უფრო სჭირდება, ვიდრე "ბაიერნს"...
მატჩის შემდგომი კომენტარები:
ანდრეს ინიესტა: ძალიან ძნელია იმის გააზრება, რომ უძლური ხარ
ტიტო ვილანოვა: "ბაიერნის" ფეხბურთელები ჯანზე არიან, ჩვენ კი - პირიკით
იუპ ჰაინკესი: პირველივე წუთებიდან ბრწყინვალედ ვთამაშობდით
ბასტიან შვაინშტაიგერი: გერმანული ფინალი - მთელი ბუნდესლიგის წარმატებაა
არიენ რობენი: ასე მოუგო გუნდს, რომელიც ბოლო 5 წელია დომინირებს ევროპაში, ძალიან მაგარია
ჩავი: "ბაიერნი" ძალიან მაღალ დონეზე თამაშობს ტექნიკური, ფიზიკური, ტაქტიკური და ფსიქოლოგიური თვალსაზრისით
ჟერარდ პიკე: არ მგონია, რომ მესის მონაწილეობა რადიკალურად შეცვლიდა რამეს
დაპირისპირება ჟერარდ პიკესა და სანდრო როსელს შორის
ჩემპიონთა ლიგა. 1/2-ფინალი. განმეორებითი მატჩი
ბარსელონა-ბაიერნი 0:3 (0:4)
გოლები: 0:1 რობენი (48), 0:2 პიკე (72-საკ. კარში), 0:3 მიულერი (76).
ბარსელონა (4-3-3): ვალდესი – დანი ალვეში, პიკე, ბარტრა (87. მონტოია), ადრიანო – ჩავი (55. სანჩესი), სონგი, ინიესტა (65. ალკანტარა) – ფაბრეგასი, დავიდ ვილია, პედრო.
ბაიერნი (4-2-3-1): ნოიერი – ლამი (77. რაფინია), ბოატენგი, ვან ბუიტენი, ალაბა – ხავი მარტინესი (74. ტიმოშჩუკი), შვაინშტაიგერი (67. ლუიზ გუსტავო) – რობენი, მიულერი, რიბერი – მანჯუკიჩი.
გაფრთხილება: დანი ალვეში, პიკე - რობენი.
კუთხური: 4-0; ჯარიმა: 11-14; თამაშგარე: 0-4; კარში დარტყმა: 10-6(4-2); ბურთის ფლობა: 60%-40%.
მაყურებელი: 98 000
ყოველდღიური სპორტული გაზეთი "ლელო"
ასევე იხილეთ:
ბაიერნი-ბარსელონას გამოხმაურება: ფანტასტიშ!
ბაიერნი-ბარსელონა 4:0 - დიდი ნაბიჯი ფინალისკენ, ძალების დაზოგვით [VIDEO]
