შალკე-რეალი 0:2 - რონალდო რაულს და მესის გაუტოლდა [VIDEO]

"შალკე"-"რეალის" შეხვედრაში ვიხილეთ ის, რასაც ველოდით. მადრიდული გრანდი სრულ უპირატესობას ფლობდა, სოლიდური ანგარიშით გაიმარჯვა და გადაწყვიტა კიდეც ორმატჩიანი დუელის ბედი.

წინ განმეორებითი პაექრობაა, მაგრამ გერმანული გუნდის ყველაზე ოპტიმისტი გულშემატკივარიც კი ვერ იოცნებებს იმაზე, რომ "შალკე" "სანტიაგო ბერნაბეუზე" სამი ბურთის სხვაობით მოიგებს.

თამაში ნელ ტემპში წარიმართა და ვერ დავიჩემებთ, რომ საინტერესო საყურებელი იყო. იგრძნობოდა, რომ "რეალს" მომატების დიდი რესურსი ჰქონდა, მაგრამ იმდენი ენერგია დახარჯა, რამდენიც დასჭირდა. პირველ ტაიმში კრიშტიანო რონალდომ შეაგდო, მეორეში მარსელომ და დასრულდა კიდეც ყველაფერი - თამამად შეგვიძლია ვთქვათ, რომ "რეალმა" მომდევნო ეტაპზე გასასვლელად გადამწყვეტი უპირატესობა მოიპოვა.

აღსანიშნავია, რომ "რეალის" პორტუგალიელმა სუპერვარსკვლავმა ჩემპიონთა ლიგაზე 58-ე მატჩი ჩაატარა და 58-ე გოლიც გაიტანა "სამეფო კლუბის" მაისურით. საერთოდ კი, რონალდომ ევროთასებზე 76-ე გოლი გაიტანა და ამ მაჩვენებლით ის რაულ გონსალესსა და ლიონელ მესის გაუტოლდა.

შალკე-რეალი 0:2
გოლები: 0:1 რონალდო (26), 0:2 მარსელო (79)
შალკე (5-3-2): ველენროიტერი - უჩიდა, ჰიოვედესი, მატიპი, ნასტასიჩი, აოგო - ჰიოგერი (80. მაიერი), ნოიშტადტერი (57. კირკხოფი), ბოატენგი - ჩუპო-მოტინგი, ჰუნტელაარი (33. პლატე)
რეალი (4-3-3): კასილიასი - კარვახალი (82. არბელოა), პეპე, ვარანი, მარსელო - ლუკას სილვა, კროოსი, ისკო (85. ილიარამენდი) - ბეილი, რონალდო, ბენზემა (78. ერნანდესი)
გაფრთხილება: ბოატენგი, ნოიშტადტერი, კირკხოფი - კროოსი
კუთხური: 2-2; ჯარიმა: 15-9; თამაშგარე: 1-3; კარში დარტყმა: 6-9 (3-4); ბურთის ფლობა: 39%-61%
მაყურებელი: 61 000

ყოველდღიური სპორტული გაზეთი "ლელო"