არსენალი VS მონაკო - არსენ ვენგერის შეხვედრა წარსულთან

* "არსენალი" და "მონაკო" ევროთასებზე ერთმანეთს პირველად ხვდებიან.
* არსენ ვენგერი ხვდება გუნდს, რომელსაც 1994 წლამდე 7 წელი ედგა სათავეში.
* "მონაკოს" დაცვა დიდებულად თამაშობს, ბოლო 14 თამაშში მხოლოდ სამი გოლი გაუშვა.

საოცარია, მაგრამ ფაქტია - დღევანდელ წყვილში მეორეადგილოსანი "არსენალია" ფავორიტი და სავსებით დამსახურებულადაც - ინგლისელებმა ჯგუფურ ეტაპზე პირველადგილოსან "მონაკოზე" 2 ქულით მეტი დააგროვეს.

თანაც, ფრანგული სამთავროს გუნდს ჯგუფურ ეტაპზე სულ 4 გოლი აქვს გატანილი და აქედან არცერთია მათი ფორვარდების ანგარიშზე!

არსენ ვენგერი (არსენალი):
"უკვე 18 წელია, "არსენალის" მწვრთნელი ვარ და მეტოქის შეფასება არ მესწავლება, მით უფრო, ასე ნაცნობი მეტოქის - "მონაკომ" ჯგუფურ ეტაპზე 4 გოლი გაიტანა და მხოლოდ ერთი გაუშვა. გუნდი დიდებულად იცავს თავს.

ასე რომ, ამ მატჩშიც ველი, რომ "მონაკო" თავს კარგად დაიცავს. ამასთან, მეტოქე ძალიან სახიფათოა კონტრშეტევებზე.

"მონაკო" იყო ჩემი პირველი შანსი დიდ გუნდში. ახალგაზრდა ვიყავი და ყოველთვის მადლიერი ვარ იმ წლების, რომლებიც ამ გუნდში გავატარე.

დავუბრუნდეთ "არსენალს". ზედიზედ 17 წელი გავატარეთ ლიგაზე, თუმცა ეს არ იყო იოლად მისაღწევი. დარწმუნებული ვარ, ხვალინდელ თამაშს ერთი გოლი გადაწყვეტს. წინ მძიმე ბრძოლაა".

ლეონარდო ჟარდიმი (მონაკო):
"მონაკოს" მწვრთნელმა პრობლემებზე არ უნდა იწუწუნოს, მან უნდა მოაგვაროს ეს პრობლემები. საკადრო პრობლემები გვაქვს, მაგრამ ბიჭები მოედანზე თავს დადებენ, რომ ეს არ ვიგრძნოთ.

ყველა ჩვენს კარგ დაცვაზე საუბრობს. კი, ეს ჩვენთვის შექებაა, მაგრამ შეტევაც კარგად შეგვიძლია. უნდა შევუტიოთ, რომ ინგლისში გოლი გავიტანოთ, ეს ძალზე მნიშვნელოვანი იქნება.

მინდა ვთქვა, რომ "არსენალი" უმატებს და ის უკეთესი გუნდია, ვიდრე 2-3 წლის იყო. მეტოქეს ძალიან კარგი შემტევები ჰყავს. ჩვენ დავამარცხეთ "არსენალი" წინასასეზონო შეკრებაზე, მაგრამ ეს, უბრალოდ, ამხანაგური მატჩი იყო, ხვალ სულ სხვა თამაში იქნება".

ჩემპიონთა ლიგა. 1/8 ფინალი. I მატჩი
25 თებერვალი. ემირეიტსი (ლონდონი). 23:45
არსენალი-მონაკო
დისკვალიფიკაცია: - ტულალანი
ტრავმა: არტეტა, დებიუში, დიაბი, ოქსლეიდ-ჩემბერლენი (?), რემზი (?) - ბაკაიკო (?), კარვალიო (?), მოუტინიო (?), რაგი (?)
მსაჯი: დენიზ აითექინი (გერმანია)

სტატისტიკა
როგორ მოვიდნენ აქამდე

არსენალი - მონაკო
D ჯგ. II ადგ. 13 ქ - ჩ ჯგ. I ადგ. 11 ქ
0:2 დორტმუნდი (ს) - 1:0 ლევერკუზენი (შ)
4:1 გალათასარაი (შ) - 0:0 ზენიტი (ს)
2:1 ანდერლეხტი (ს) - 0:0 ბენფიკა (შ)
3:3 ანდერლეხტი (შ) - 0:1 ბენფიკა (ს)
2:0 დორტმუნდი (შ) - 1:0 ლევერკუზენი (ს)
4:1 გალათასარაი (ს) - 2:0 ზენიტი (შ)

არსენალი
მეკ: შჩესნი (6 თ), მარტინესი (2), ოსპინა (1)
მცვ: მერტეზაკერი (7), ჩემბერსი (7), მონრეალი (5), გიბსი (5, 1), კოშელნი (4), დებიუში (3), ბელერინი (2), ოკონორი (1)
ნახ: ფლამინი (7), კასორლა (7), რემზი (6, 2), უილშირი (5), არტეტა (4, 1), როსიცკი (3), იოზილი (3), ზელალემი (1), მეიტლენდ-ნილსი (1)
თავ: ოქსლეიდ-ჩემბერლენი (8, 1), სანჩესი (7, 4), პოდოლსკი (5, 3), უელბეკი (4, 3), კემპბელი (3), სანოგო (2, 1)

მონაკო
მეკ: სუბაშიჩი (6 თ)
მცვ: ფაბინიო (6, 1), რაგი (6), კარვალიო (5), კურზავა (4), აბდენური (2, 1), უოლესი (2), ეჩიეჯილე (1)
ნახ: ოკამპოსი (6, 1), ტულალანი (6), ფერეირა კარასკო (6), მოუტინიო (6, 1), დირარი (6), კონდობია (4), ბაკაიოკო (3), სილვა (3)
თავ: ბერბატოვი (5), მარტიალი (3), ჟერმენი (2), ტრაორე (2)

შენიშვნა: "არსენალი" გათამაშებაში საკვალიფიკაციო პლეი ოფიდან ჩაერთო

ყოველდღიური სპორტული გაზეთი "ლელო"