იუვენტუსი-დორტმუნდი 2:1 - ყველაფერი გერმანიაში გადაწყდება [VIDEO]

ტურინული მატჩი უფრო დაძაბული გამოვიდა, ვიდრე სანახაობრივი; მთლიანობაში კი, მაინც საინტერესო დაპირისპირება ვიხილეთ.

მატჩის პირველი 15 წუთი ტურინელთა უპირატესობით წარიმართა, რასაც კარლოს ტევესის გოლი მოჰყვა - იმ ეპიზოდში დორტმუნდელთა მეკარე შეცდა, რომელმაც ალვარო მორატას დარტყმული ისე მოიგერია, ფაქტობრივად, ცარიელი კარის წინ მდგარ არგენტინელს ჩააბარა.

სულ რაღაც 5 წუთში საპასუხო შეცდომა უკვე ჯორჯო კიელინიმ დაუშვა, რომელსაც ცუდ დროს აუსრიალდა ფეხი, მარკო როისი ჯანლუიჯი ბუფონთან პირისპირ დატოვა და მასაც ანგარიშის გაქვითვა აღარ გასჭირვებია. როისის გოლმა სტუმრებს თავდაჯერება შეჰმატა და თამაში მათი უპირატესობით გაგრძელდა...

დორტმუნდელები ბურთსაც უფრო მეტად ფლობდნენ და გატანაც შეეძლოთ, მაგრამ ტაიმის მიწურულს გოლი სწორედ მათ კარში გავიდა - ტურინელთა იშვიათ შეტევას პოლ პოგბას შესანიშნავი გადაცემა და ალვარო მორატას ზუსტი დარტყმა მოჰყვა - 2:1.

მეორე ტაიმში ზედმეტი რისკისგან ორივე გუნდი თავს იკავებდა და სახიფათო მომენტებიც უფრო ნაკლებად იქმნებოდა. თამაშის მიწურულს, დორტმუნდელებს თითქოს, დაღლა დაეტყოთ და მასპინძლებსაც შეექმნათ ერთი-ორი მეტ-ნაკლებად სახიფათო მომენტი.

და მაინც, მეორე ტაიმში უკვე ორივე გუნდს ეტყობოდა, რომ მთავარი საკუთარი კარის უსაფრთხოება იყო. წინ მეორე მატჩია და ყველაფერი გერმანიაში გაირკვევა.

ჩემპიონთა ლიგა. 1/8 ფინალი. I მატჩი
იუვენტუსი-ბორუსია 2:1
გოლები: 1:0 ტევესი (13), 1:1 როისი (18), 2:1 მორატა (42)
იუვენტუსი (4-3-1-2): ბუფონი - ლიხტშტაინერი, ბონუჩი, კიელინი, ევრა - მარკიზიო, პირლო (37. პერეირა), პოგბა - ვიდალი (86. პადოინი) - ტევესი (89. კომანი), მორატა
ბორუსია (4-2-3-1): ვაიდენფელერი - პიშჩეკი (32. გინტერი), პაპასტატოპულოსი (46. კირხი), ჰუმელსი, შმელცერი - გიუნდოგანი, შაჰინი - მხითარიანი, როისი, ობამეიანგი - იმობილე (76. ბლაშჩიკოვსკი)
გაფრთხილება: ვიდალი, პერეირა (იუვენტუსი)
კუთხური: 8-4; ჯარიმა: 8-10; თამაშგარე: 4-2; კარში დარტყმა: 11-9 (4-3); ბურთის ფლობა: 48%-52%
მაყურებელი: 42 000

ყოველდღიური სპორტული გაზეთი "ლელო"