ჩელსი VS პსჟ - შავი სამკლავურებით

* პირველი დაპირისპირება პარიზში 1:1 დასრულდა (კავანი, ივანოვიჩი).
* ფრანგი ფეხბურთელები სამი ცნობილი ფრანგი სპორტსმენის ავიაკატასტროფაში დაღუპვის გამო შავი სამკლავურებით გამოვლენ.
* ამ უქმეებზე "ჩელსის" არ უთამაშია, პრემიერლიგაში ტური არ იყო.
* ამ უქმეებზე პსჟ-მ 4:1 მოუგო "ლანსს" (დავიდ ლუისი, იბრაჰიმოვიჩი, მატუიდი, პასტორე).

დღის მთავარი დაპირისპირება უთუოდ "სტემფორდ ბრიჯზეა", სადაც ჟოზე მოურინიოს "ჩელსი" შეეცდება სანუკვარი ტიტულისთვის ბრძოლის გაგრძელებას. ტიტულისკენ გზაზე კი ლორან ბლანის პსჟ-ია.

პირველ შეხვედრაში "ჩელსიმ" მისაღები ანგარიში დაიბევა - 1:1. ფრე, თანაც სტუმრად გატანილი გოლით.

თუმცა, ცხადია, როცა ზლატან იბრაჰიმოვიჩთან და კომპანიასთან გაქვს საქმე, წინასწარ თავს გამარჯვებულად ვერ გამოაცხადებ.

შეგახსენებთ, რომ 2013/14 წლების ჩემპიონთა ლიგაზე ეს გუნდები მეოთხედფინალურ სტადიაზე გადაეყარნენ ერთმანეთს. მაშინ "ჩელსიმ" სტუმრად გატანილი გოლის წყალობით გააგრძელა გზა, რადგან პარიზში 1:3 წააგო და ლონდონში 2:0 იმარჯვა.

ლორან ბლანი (პსჟ): "ჩვენ "ჩელსის" წინააღმდეგ ერთი გოლი მაინც უნდა გავიტანოთ, თუ გვსურს შემდეგ ეტაპზე გასვლა. ჩვენ გაცილებით მეტი გამოცდილება გვაქვს ლიგაზე, ვიდრე ეს შარშან "ჩელსისთან" დაპირისპირებაში გვქონდა. "ჩელსისაც" გაცილებით კარგად ვიცნობთ. პირველ თამაშში მათ მეკარეს, ტიბო კურტუას ფანტასტიკური დღე ჰქონდა. იმედი მაქვს, რომ ხვალ ბელგიელი ერთ-ორ შეცდომას მაინც დაუშვებს. ყველაფერი ჩვენს ხელშია. თუ გვსურს წინსვლა, უნდა შევუტიოთ და მოვიგოთ".

11 მარტი. ლონდონი (დიდი ბრიტანეთი). "სტემფორდ ბრიჯი". 23:45
ჩელსი-პსჟ
პირველი თამაში: 1:1
დისკვალიფიკაცია: არავინ
ტრავმა: მიკელი, მატიჩი (?) - ორიე, დიაუ, ლუკასი, კაბაი (?)
სავარაუდო შემადგენლობები
ჩელსი (4-2-3-1): კურტუა - ივანოვიჩი, კეჰილი, ტერი, ასპილიკუეტა - რამირესი, მატიჩი - ვილიანი, ფაბრეგასი, აზარი - დიეგო კოშტა
პსჟ (4-3-3): სირიგუ - ვან დერ ვილი, მარკინიოსი, ტიაგო სილვა, მაქსველი - ვერატი, დ. ლუისი, მატუიდი - ლავეცი, იბრაჰიმოვიჩი, კავანი
მსაჯი: ბიორნ კუიპერსი (ჰოლანდია)

ყოველდღიური სპორტული გაზეთი "ლელო"