ბრეივ ჰარტი და პელეგრინის ჩართული წამზომი

"სიტიმ" ბარსელონაში სასწაული ვერ მოახდინა და ჩემპიონთა ლიგაზე პრემიერლიგის ბოლო იმედი სერხიო აგუეროს გამოუყენებელ პენალტთან ერთად გაქრა.

თუმცა ამ თერთმეტმეტრიანს გვერდს თუ ავუვლით, კატალონიელები ძალიან დიდ უპირატესობას ფლობდნენ და მანჩესტერელები, რასაც ჰქვია, დაიჩაგრნენ.

"ვფიქრობ, მანუელ პელეგრინის დრო ნელ-ნელა იწურება. წამოვა დიეგო სიმეონე "ატლეტიკოდან" ან კარლო ანჩელოტი "რეალიდან"? ასეთი ტიპის სპეციალისტი მოუხდებოდა "სიტის" - ამბობს რობი სევიჯი.

ჩილელს კრიტიკა არც სხვებისგან აკლია, თუმცა თავად სიმშვიდეს ინარჩუნებს და როგორც ჩანს, ფეხბურთელების მხარდაჭერაც აქვს.

"ჩვენ მწვრთნელის გვერდით ვართ. იგი ბრწყინვალე სპეციალისტია და წინა სეზონში ორი ტიტული მოგვაგებინა" - თქვა ჯო ჰარტმა.

სხვათა შორის, ინგლისის ნაკრების გოლკიპერმა "კამპ ნოუზე" 10 "სეივი" მიითვალა, რაც მიმდინარე ჩემპიონთა ლიგაზე საუკეთესო შედეგია. ჰარტი რომ არა, "ქალაქელები" ბევრად უფრო დიდი სხვაობით დამარცხდებოდნენ.

მანუელ პელეგრინი: "ჩვენი თამაშით კმაყოფილი არ დავრჩი. "ბარსელონამ" ძალიან კარგად ითამაშა, ბრწყინვალე მესის დირიჟორობით. არ ვფიქრობ, რომ ჩემპიონთა ლიგიდან გამოვარდნა ნიშნავდეს იმას, რომ სეზონი ჩავაგდეთ, მაგრამ ეს უაღრესად არასასიამოვნოა. სამწუხაროდ, არ გაგვიმართლა და "ბარსელონასთან" მოგვიხდა თამაში, რომელიც ამჟამად უფრო ძლიერი გუნდია".

ფეხბურთის ექსპერტად გარდაქმნილმა ექსმოთამაშე სავიჯმა კი ბევრის სათქმელი თქვა და აღნიშნა - "სიტიში" ზაფხულში სერიოზული წმენდაა აუცილებელი და შემადგენლობა მნიშვნელოვან გადახალისებას საჭიროებსო.

"კომპანი ბოლო სამი წლის განმავლობაში საუკეთესო მცველია და დაცვის ცენტრში მუდმივი პარტნიორი სჭირდება. თუმცა თავად იგიც ცუდად გამოიყურებოდა ბოლო დროს. იაია ტურეც ვერ ბრწყინავს ბოლო პერიოდში, ან როგორი იქნება მისი მომავალი?" - იკითხა სევიჯმა.

სევიჯს თითქმის ყველაფერში ეთანხმება კრის უადლი, რომელიც მიიჩნევს, რომ აგუეროს, დავიდ სილვას, იაია ტურეს, პაბლო საბალეტასა და ჯო ჰარტის გარდა, ყველას გაშვება თავისუფლად შეიძლება.

ყოველდღიური სპორტული გაზეთი "ლელო"