მეტი ინტრიგა რაღა გვინდა - გრანდების ომში ხოსეპ გვარდიოლა მშობლიურ "კამპ ნოუს" მტრის სტატუსით სტუმრობს. თუკი "ბარსას" რომელიმე გუნდის უნდა ეშინოდეს, პირველ რიგში, ეს გუნდი "ბაიერნია". თუ რატომ, ქვემოთ თავად დარწმუნდებით...პეპ გვარდიოლა, საერთო ჯამში (აკადემიის ჩათვლით), 23 წელიწადი მწვრთნელობდა და ფეხბურთელობდა "ბარსელონაში". და აი, ათეისტი და კატალონიის დამოუკიდებლობის მომხრე გვარდიოლა მშობლიურ სტადიონზე მეტოქედ ჩადის. მისი ამოცანაა, "ბარსა" ჩემპიონთა ლიგის ნახევარფინალიდან დაიფრინოს, ბერლინის ფინალის საგზური კი მის ახალ გუნდს, მიუნხენის "ბაიერნს" მოუპოვოს.
"ბარსელონას" კი ორი წლის წინანდელი წყენისთვის შურისძიება სწყურია
ნახევარფინალში ორივე კლუბმა ტრიუმფით შემოაღწია - "ბარსამ" ქვა-ქვაზე არ დატოვა "პარი სენ-ჟერმენისგან", რომელსაც ორი მატჩის ჯამში 5:1 აჯობა, ხოლო პეპის "ბაიერნმა" "პორტუს" მწარედ ანანა 1:3 მარცხი პორტუგალიაში - "ალიანს არენაზე" 6:1 გაანადგურა.
ჰაინკესის ტრიუმფი
"კამპ ნოუზე" "ბაიერნმა" ოთხჯერ ითამაშა და... სამჯერ იმარჯვა! მათ შორის, აღსანიშნავია ჩემპიონთა ლიგის ნახევარფინალური მატჩი 2012/13 წლების სეზონში - 3:0. ჰაინკესის გუნდს პირველ თამაშში უკვე ყველაფერი გადაწყვეტილი ჰქონდა, "ბაიერნმა" 4:0 მოიგო, მაგრამ კატალონიელთათვის მაინც მძიმედ ასატანი იყო შინ გამანადგურებელი მარცხი. ამიტომაც ახლა ესპანეთის ამ კუთხეში ყველა რევანშზე ლაპარაკობს. გერმანიაში თომას მიულერმა ბენეფისი მოიწყო, დუბლი შეასრულა, თითო გოლი კი მარიო გომესმა და არიენ რობენმა გაიტანეს.
რობენმა და მიულერმა ბარსელონაშიც გაიტანეს, ერთიც ჟერარდ პიკემ (ავტოგოლი) დაამატა. მაშინ ჰაინკესის ვიზავი დროებითი თავკაცი ჟორდი როურა იყო, ახლა კი ერთმანეთის პირისპირ ღირსეული მეტოქეები დგანან - პეპ გვარდიოლას ლუის ენრიკე დაუხვდება.
რეჰაგელის ტრიუმფი
ამ ორი კლუბის გზები კიდევ ერთხელ გადაიყარა ნახევარფინალურ ეტაპზე, ეს უფრო ადრე, უეფას თასზე (1996 წელს) იყო. მაშინ ორი მატჩის ჯამში "ბაიერნმა" 4:3 იმარჯვა. ოტო რეჰაგელის გუნდმა გერმანიაში 2:2 ითამაშა მიუნხენის "ოლიმპიაშტადიონზე". ბარსელონაში "ბაიერნმა" 2:1 იმარჯვა. მაშინდელ "ბარსაში" პეპი თამაშობდა, ასევე, კარლოს ბუსკეტსი, სერხიო ბუსკეტსის მამა. გვარდიოლას ტრიუმფი
ორმატჩიან დაპირისპირებებში "ბარსელონამ" მხოლოდ ერთხელ აჯობა "ბაიერნს" და მაშინ "ბარსას" მწვრთნელი სწორედ გვარდიოლა იყო. 2008/09 წლების სეზონში გუნდები ერთმანეთს მეოთხედფინალში დაუპირისპირდნენ. ლიონელ მესიმ დუბლი შეასრულა, "ბარსამ" 4:0 მოიგო, საპასუხო მატჩი კი 1:1 დასრულდა. კიდევ ერთი დაპირისპირება გავიხსენოთ - 1998/99 წლების სეზონში, გუნდები ჯგუფურ ეტაპზე გადაეყარნენ ერთმანეთს. ლუის ენრიკე თამაშობდა იმ გუნდში, რომელიც მიუნხენში 0:1 დამარცხდა. "კამპ ნოუზეც" "ბაიერნმა" იძალა, მიუხედავად იმისა, რომ აგებდა - 2:1.
ვინ როგორ ფორმაშია
"ბარსელონა" ჩემპიონთა ლიგის (თასის) ოთხგზის გამარჯვებულია, კატალონიური გრანდი ფინალში გასვლას მერვედ აპირებს. "ბარსამ" ლიგის ახლანდელ სეზონში ხუთივე თამაში მოიგო "კამპ ნოუზე", მათ შორის, მეოთხედფინალური დაპირისპირება "პარი სენ-ჟერმენთან" - 2:0. ლიგაზე შინ "ბლაუგრანა" ბოლოს 2013 წლის 1-ელ მაისს დამარცხდა, რა თქმა უნდა, "ბაიერნთან". ჩემპიონთა ლიგის ბოლო 32 საშინაო მატჩში ეს "ბარსას" ერთადერთი მარცხია, 25 მოგებისა და 6 ფრის წილ. "ბლაუგრანას" დაპირისპირებები ბუნდესლიგის კლუბებთან სტატისტიკაში ასეა ასახული: 19 მოგება, 1 ფრე, 7 წაგება.
ჩემპიონთა ლიგის 5-გზის გამარჯვებული "ბაიერნი" ფინალში მე-11 გასვლას ეშურება. შარშან ამავე ეტაპზე მიუნხენური კლუბი მადრიდის "რეალთან" შერცხვა, ორი მატჩის ჯამში - 0:5. "ბაიერნი" ცოტა მოიკოჭლებს ბოლო დროს ლიგაზე საგარეო მატჩებში - გვარდიოლას გუნდმა 1 ფრედ დაასრულა და 2 წააგო. ბოლოს "ბაიერნმა" სტუმრად "რომასთან" დაპირისპირებაში იმარჯვა, მაგრამ გამარჯვებაც არის და გამარჯებაც - "რეკორდმაისტერმა" 7:1 მოიგო.
მწვრთნელები და ფეხბურთელები
* გვარდიოლამ მწვრთნელობის 4 ოქროს წელიწადი გაატარა "ბარსელონაში". მან გუნდს 14 ტიტული მოუტანა, მათ შორის, ორჯერ ჩემპიონთა ლიგა მოაგებინა. * როგორც "ბარსას" ფეხბურთელმა, გვარდიოლამ 6-ჯერ მოიგო ლა ლიგა, ხოლო 1992 წელს ჩემპიონთა თასი მოიპოვა.
* ტიაგო ალკანტარა "ბაიერნის" ფეხბურთელია, მისი უმცროსი ძმა რაფაელი კი - "ბარსელონასი".
ლუის ენრიკე: სიურპრიზები პეპისგან
ლუის ენრიკე (ბარსელონა): "ეს დიდი დაპირისპირებაა დიდი გუნდის წინააღმდეგ. პოზიტიურად ვართ განწყობილნი. პეპს კარგად ვიცნობ და დარწმუნებული ვარ, მისგან ბევრ სიურპრიზს უნდა ველოდოთ, რომლებიც საქმეს გაგვირთულებენ. მთელი სეზონი ასე ვართ, ჩვენს პრობლემებს მეტოქეთა სიურპრიზები ემატებოდა და ჩვენ მათი გადალახვა გვიწევდა. ჩემი აზრით, "ბაიერნმა", რაც ის გვარდიოლამ ჩაიბარა, ოდნავ საფეხბურთო სტილი იცვალა. მან ყველა პოზიტივი დატოვა წარსულიდან და დაამატა თავისი. რად უნდა ლაპარაკი, "ბაიერნი" ევროპის ერთ-ერთი საუკეთესო კლუბია. ჩვენ არ ვართ კონცენტრირებულნი პეპის დამარცხებაზე, ჩვენი მისიაა "ბაიერნის" დამარცხება. ძალიან მიყვარს სიტყვა ჰეთ-თრიკი, თუმცა კარგად მესმის, რომ სეზონის ბოლოს სამის ნაცვლად შეიძლება უტიტულოდაც დავრჩეთ.
დაცვა და შეტევა - ორივე ძალზე მნიშვნელოვანი იქნება. უნდა გავიტანოთ და არ უნდა გავუშვათ. ეს კი იმას ნიშნავს, რომ სრულყოფილი გუნდი უნდა ვიყოთ, რომ წარმატებას მივაღწიოთ. ორივე სამუშაო, დაცვაც და შეტევაც, კარგად უნდა შევასრულოთ. ფანების იმედიც გვაქვს, მათ გარეშე "ბაიერნის" დამარცხება გაგვიჭირდება.
არა მგონია, პეპმა არ იცოდეს, რას ვაპირებთ თამაშზე. ორივე გუნდი ბურთისთვის იბრძოლებს და თამაშში გამოჩნდება, ვინ აჯობებს. ეს უნდა იყოს ევროპის ერთ-ერთი ყველაზე თვალსასეირო დაპირისპირება".
პეპ გვარდიოლა: წავართვათ "ბარსას" ბურთი
ხოსეპ გვარდიოლა (ბაიერნი): "დიდებულია აქ დაბრუნება. ბარსელონაში მე ძალიან ბევრი მოგონება დამრჩა. განსაკუთრებული დღეებია ჩემთვის, რადგან "ბარსელონაში" ბევრი წელიწადი გავატარე. მიხარია, რომ აქ ვარ ჩემპიონთა ლიგის ნახევარფინალში და მიმაჩნია, რომ ჩემს გუნდს ბერლინში გამგზავრების კარგი შანსი აქვს. ოთხი სეზონი ვწვრთნიდი "ბარსას" და მეს მერე პირველად ვარ. კარგად ვიცოდი, რომ აქედან წასვლის შემთხვევაში, "კამპ ნოუზე" მეტოქედ დაბრუნების შანსი დიდი იყო, მაგრამ ეს არის ჩვენი პროფესია. ჩემი მიზანია, "ბაიერნმა" აქაც და მიუნხენშიც კარგად ითამაშოს.
"ბარსელონას" კარგად ვიცნობ და ვიცი, რა ძნელია, მათ რიგებში სისუსტეების მოძებნა. ფეხბურთელები დიდი ხანია, ერთად არიან, ისინი ერთმანეთს მოედანზე თვალდახუჭულნი უგებენ.
ჯერჯერობით, არავის უჯობნია "ბარსასთვის" ბურთის ფლობაში. ეს გუნდი სწორედ ბურთის ფლობისთვისაა შექმნილი. ყველაზე რთული სწორედ მისთვის ბურთის წართმევა იქნება.
ჩემი აზრით, "ბარსასთვის" უფრო დიდი უპირატესობაა, ამ კლუბში ყველამ ყველაფერი იცის შენზე, მე კი "ბარსაზე" ბევრის ცოდნას ბევრ ვერაფერში გამოვიყენებ".
6 მაისი. ბარსელონა (ესპანეთი). "კამპ ნოუ". 22:45
ბარსელონა-ბაიერნი
დისკვალიფიკაცია: არავინ
ტრავმა: მატიო, ვერმალენი (?) - ალაბა, რობენი, ბადშტუბერი, შტარკე, ბერნატი (?), რიბერი, ლევანდოვსკი (?), როდე
სავარაუდო შემადგენლობები
ბარსელონა (4-3-3): ტერ შტეგენი - დანი ალვეში, პიკე, მასკერანო, ალბა - რაკიტიჩი, ბუსკეტსი, ინიესტა - მესი, სუარესი, ნეიმარი
ბაიერნი (4-3-3): ნოიერი - რაფინია, ბოატენგი, ბენატია, ბერნატი - ლამი, ჩაბი ალონსო, ტ. ალკანტარა - მიულერი, ლევანდოვსკი, გიოტცე
მსაჯი: ნიკოლა რიცოლი (იტალია)
ყოველდღიური სპორტული გაზეთი "ლელო"
ბარსსსა!