ბაიერნი-ბარსელონა 3:2 - სასწაული, რომელიც არ მოხდა [VIDEO]

"ბაიერნის" ფეხბურთელები მთელი კვირის განმავლობაში იმუქრებოდნენ, რომ ორმატჩიანი დუელის ბედი არ იყო გადაწყვეტილი და "ბარსელონას" "ალიანც არენაზე" ნამდვილი ჯოჯოხეთი ელოდა.

მიუნხენურმა გიგანტმა მოიგო, ბოლომდე იბრძოლა და თავი არ დაზოგა, მაგრამ მუქარა მაინც გადამეტებული გამოდგა - "ბარსამ" პირველ ტაიმში ორი გოლი შეაგდო და გადაწყვიტა კიდეც ყველაფერი. ესპანური გრანდისთვის სამი გოლის გატანა შესაძლებელია, მაგრამ ამავდროულად, საკუთარი კარის მშრალად შენახვა, პრაქტიკულად, წარმოუდგენელი. ლუის სუარესის, ლიონელ მესის და ნეიმარის განეიტრალება გერმანელებისთვისაც შეუძლებელი აღმოჩნდა.

არადა, ჯერ კიდევ მე-7 წუთი მიმდინარეობდა, როდესაც მეჰდი ბენატიამ თავური დარტყმით გახსნა ანგარიში და ტრიბუნებზე შეკრებილი 75 ათასი გულშემატკივარი აღფრთოვანებაში მოიყვანა - ფრთაშესხმული მიუნხენელები მეორე გოლის გასატანად წავიდნენ წინ, მაგრამ საპასუხო ბურთი მიიღეს და სწორედ იქ მოკვდა ინტრიგა. "ბარსას" პირველი გოლი ხსენებულმა ტრიომ გამოჭედა:

ლიონელ მესიმ ბრწყინვალე პასით "ბაიერნის" მთელი დაცვა მოჭრა და ლუის სუარესი დასარტყმელ პოზიციაზე გაიყვანა, თუმცა ურუგვაელმა პასი ამჯობინა, ნეიმარი მოძებნა და ბრაზილიელს დაუცველი კარის დალაშქვრა აღარ გასჭირვებია - 1:1. ამ ეპიზოდიდან 15 წუთში სუარესმა კიდევ ერთხელ მონახა ნეიმარი და მანაც კიდევ ერთხელ გაუტანა მანუელ ნოიერს - 1:2.

შესვენებაზე ლუის ენრიკემ სუარესი სკამზე დასვა და თამაშში პედრო ჩართო, მთლიანობაში კი, "ბარსელონამ" ბრძოლა შეწყვიტა და ინიციატივა "ბაიერნს" დაუთმო. შედეგად, მიუნხენელებმა ორი გოლი შეაგდეს, კონკრეტული შეხვედრა მოიგეს და ტრიბუნებზე შეკრებილი გულშემატკივრების გული მოიგეს.

ამად იყო, რომ გერმანული გრანდის არც ერთ ქომაგს სტადიონი ნაადრევად არ დაუტოვებია და "ბაიერნმა" სტადიონი ტაშის ფონზე დატოვა. ისიც ვთქვათ, რომ "ბაიერნის" მიერ მეორე ტაიმში გატანილი გოლები მეტად ეფექტური გამოვიდა: რობერტ ლევანდოვსკიმ ხავიერ მასკერანო შესანიშნავი მოძრაობით მოიცილა და უზუსტესი დარტყმით ბურთი მეკარისაგან მარცხენა დაბალ კუთხეში მოათავსა, თომას მიულერმა კი უძლიერესი დარტყმით უწია მიზანს.

და მაინც, ინტრიგა შენარჩუნდა მხოლოდ პირველი 15 წუთი და შეგვიძლია თამამად ვთქვათ, რომ "ბარსელონამ" მიზანს განსაკუთრებული პრობლემების გარეშე მიაღწია. ამ ეტაპზე, "ბარსა" უფრო ძლიერი აღმოჩნდა და სრულიად დამსახურებულად მოიპოვა ჩემპიონთა ლიგის ფინალის საგზური. ესპანელთა მთავარი იარაღი მაინც მესი-ნეიმარი-სუარესის ტრიო გახლავთ და ამ იარაღმა "ბაიერნთან" ორმატჩიან დუელში 5-ჯერ გაისროლა...

ახლა "ბარსელონა" დღევანდელ დაპირისპირებას დაელოდება - "რეალი" ტურინის "იუვენტუსს" მეორე ნახევარფინალში მასპინძლობს, პირველი თამაში კი 1:2 აქვს წაგებული.

ლუის ენრიკე (ბარსელონა): "ძალიან კმაყოფილი ვარ ჩემი ფეხბურთელების გარჯით. ჩვენი მიზანი სწრაფი გოლის გატანა იყო. მომენტების შექმნა თავიდანვე დავიწყეთ და 15 წუთში გავიტანეთ. პირველ ტაიმში თამაშს ვაკონტროლებდით, მაგრამ მეორეში ბევრი შეცდომა დავუშვით. მაგრამ მაინც, დღეს ჩვენ ბედნიერები ვართ. ვისთან მირჩევნია ფინალში თამაში? იმასთან, ვინც ამას უფრო დაიმსახურებს. დიდებული დროება გვაქვს, ყველა ტიტულთან ერთი მოგება გვაშორებს".

მატჩის შემდგომი კომენტარები:
ხოსეპ გვარდიოლა: დაცვაში კარგად რომ გვეთამაშა, შეიძლება არც გავვარდნილიყავით
ფილიპ ლამი: შეუძლებელია ასეთი ფეხბურთელების შეკავება 90 წუთის განმავლობაში
ნეიმარი: სულერთია, ვინ შეგვხვდება ფინალში
იყო თუ არა გოლი? - სადავო ეპიზოდი ბაიერნი-ბარსელონას მატჩზე [VIDEO]

ჩემპიონთა ლიგა. 1/2-ფინალი. საპასუხო მატჩი
ბაიერნი-ბარსელონა 3:2
(პირველი მატჩი 0:3)
გოლები: 1:0 ბენატია (7), 1:1 ნეიმარი (15), 1:2 ნეიმარი (29), 2:2 ლევანდოვსკი (59), 3:2 მიულერი (74)
ბაიერნი (4-4-2): ნოიერი - რაფინია, ბოატენგი, ბენატია, ბერნატი - ლამი (68. როდე), ჩაბი ალონსო, ტ. ალკანტარა, შვაინშტაიგერი (87. ხავი მარტინესი) - მიულერი (87. გიოტცე), ლევანდოვსკი
ბარსელონა (4-3-3): ტერ შტეგენი - დანი ალვეში, პიკე, მასკერანო, ალბა - რაკიტიჩი (72. მატიო), ბუსკეტსი, ინიესტა (75. ჩავი) - ნეიმარი, მესი, სუარესი (46. პედრო)
გაფრთხილება: რაფინია, ალონსო, ტიაგო, ლევანდოვსკი, როდე - რაკიტიჩი, პედრო
კუთხური: 5-1; ჯარიმა: 19-12; თამაშგარე: 3-3; კარში დარტყმა: 16-4 (8-4); ბურთის ფლობა: 53%-47%
მაყურებელი: 75 000.

ყოველდღიური სპორტული გაზეთი "ლელო"