ჩემპიონთა ლიგა. I ტური. D ჯგუფი: "იუვენტუსის" სიურპრიზი [VIDEO]

დღის ცენტრალური შეხვედრა ტურინის "იუვენტუსის" სცენარით დაიწყო და დამთავრდა. მართალია, თავიდან "სიტი" უფრო აქტიური გახლდათ, მაგრამ ეს იმიტომ, რომ "ბებერმა ქალბატონმა" დაუთმო მეტოქეს ბურთი - აჰა და შეუტიეო.

განსაკუთრებით კარგად ეს მანჩესტერელებს არ გამოსდიოდათ, თუ იმას არ ჩავთვლით, რომ სტეფანო სტურაროს შეცდომას თავიდანვე რეალური მომენტი მოჰყვა, მაგრამ ჯანლუიჯი ბუფონი ადგილზე იყო. საერთოდ ჯიჯიმ რამდენჯერმე იხსნა თავისი გუნდი და ისევ დაამტკიცა, რომ "ნუმერო უნოა".

"ქალაქელებმა" მაშინ გაიტანეს, როდესაც ექსპერიმენტული შემადგენლობით მოთამაშე და ზაფხულში სრულად გადახალისებულ-გადასხვაფერებული "იუვე" გააქტიურდა. თუმცა გოლი ძალიან უცნაურ ვითარებაში გავიდა და თან ის "სიტის" არ გაუტანია... ვენსან კომპანიმ უნამუსოდ კი იზეიმა, მაგრამ ბელგიელი ჯორჯო კიელინის ჩამოეკიდა და ჯარიმა იყო, თანაც ბურთი იტალიელის თავიდან აღმოჩნდა ბუფონის კარში. დამირ სკომინამ გოლი ჩათვალა, სტუმართა პროტესტმა არ გაჭრა.

ცოტა ხანში ჯიჯიმ ერთი შეტევისას ორი დარტყმა მოიგერია და გარდამტეხი მომენტიც ეს იყო. მერე პოლ პოგბამ "პირლოს პასი" "დაუხატა" მარიო მანჯუკიჩს, მან კი ჯო ჰარტს აუღებელი დაურტყა.

ისევე როგორც ულამაზესი და მიუწვდომელი გახლდათ ალვარო მორატას გამაჯვების დარტყმა. მასიამილიანო ალეგრიმ ტაქტიკურადაც აჯობა მანუელ პელეგრინის, რომელსაც არ შავი დღისთვის განაცხადში შეყვანილი სერხიო აგუეროს გამოშვებამ უშველა და არც იმან, რომ უმაქნისი სტერლინგი კევინ დე ბრუინით ჩაანაცვლა, მაგრამ ამაოდ.

ჩეხ არბიტრს პაველ კრალოვეცს კი გერმანია და კონკრეტულად "გლადბახი" ალბათ ძალიან სძულს. მან ბორუსიელთა კარში 3 პენალტი დანიშნა, რომელთაგანაც "სევილიამ" პირველი და მესამე გამოიყენა. ბოლოს კი შეცვლაზე რამდენიმე წამის შესულმა კონოპლიანკამ დასვა წერტილი და კრალოვეცის გასახარად, სევილიელებმა დამაჯერებლად მოიგეს. ხუმრობა იქით იყოს და უნაი ემერის გუნდს გამარჯვება ეკუთვნოდა.

სიტი-იუვენტუსი 1:2
გოლები: 1:0 კიელინი (57-ს.კ.), 1:1 მანჯუკიჩი (70), 1:2 მორატა (81)
სიტი (4-2-3-1): ჰარტი - სანია, კომპანი (75. ოტამენდი), მანგალა, კოლაროვი - იაია ტურე, ფერნანდინიო - ნასრი (84. აგუერო), სტერლინგი (71. დე ბრუინი), სილვა - ბონი
იუვენტუსი (4-4-2): ბუფონი - ლიხტშტაინერი, ბონუჩი, კიელინი, ევრა - კუადრადო, ერნანეში, პოგბა, სტურარო - მორატა (85. ბარძალი), მანჯუკიჩი (78. დიბალა)
გაფრთხილება: -
კუთხური: 6-1; ჯარიმა: 20-9; თამაშგარე: 0-3; კარში დარტყმა: 13(5)-10(3); ბურთის ფლობა: 56%-44%.
მაყურებელი: 50 363

სევილია-გლადბახი 3:0
გოლები: 1:0 გამეირო (47-პენ.), 2:0 ბანეგა (66-პენ.), 3:0 კონოპლიანკა (84)
გამეირომ ვერ გაიტანა პენალტი (50)
სევილია (4-2-3-1): რიკო - კოკე, ანდრეოლი, კოლოჯეიჩაკი, ტრემულინა - კრიხოვიაკი, ნ'ზონზი - რეიესი (83. კონოპლიანკა), ბანეგა (76. კრონ-დელი), ვიტოლო - გამეირო (71. იმობილე)
გლადბახი (4-4-2): სომერი - კორბი, ბროუერსი, იანჩკე, ვენდტი - ჰანი (73. შულცი), შტინდლი (67. დაუდი), ნორდტვეიტი, ტრაორე - რაფაელი (83. დრმიჩი), აზარი
გაფრთხილება: რეიესი, ნ'ზონზი - ბროუერსი, სომერი, შტინდლი
კუთხური: 5-1; ჯარიმა: 14-14; თამაშგარე: 4-1; კარში დარტყმა: 19(6)-9(1); ბურთის ფლობა: 58%-42%.
მაყურებელი: 36 959

მომდევნო ტური
30 სექტემბერი:
გლადბახი-სიტი, იუვენტუსი-სევილია.

ყოველდღიური სპორტული გაზეთი "ლელო"