ჩემპიონთა ლიგა. 1/8 ფინალი. I მატჩი: პირველი რაუნდი "ბენფიკამ" მოიგო [VIDEO]

"ზენიტმა" ჯგუფური ეტაპი ბრწყინვალედ ჩაატარა და მერვედფინალის საგზური ნაადრევად მოიპოვა. რუსებმა ზედიზედ 5 მატჩი მოიგეს, შესანიშნავი თამაში აჩვენეს და შესაბამისად, ბევრი "ბენფიკასთან" დუელში ფავორიტად მიიჩნევს. თუმცა, ლისაბონურმა მატჩმა დაგვანახვა, რომ არც მთლად ასეა საქმე და "ბენფიკა" იოლად არაფერს დათმობს.

მეტიც, პორტუგალიელებმა სოლიდური უპირატესობა მოიპოვეს და განმეორებითი მატჩის წინ, კარგი ფორა შეიქმნეს. დიახ, მოგება და თანაც საკუთარი კარის მშრალად შენახვა, სახუმარო საქმე ნამდვილად არაა.

მატჩი მასპინძელთა უპირატესობით წარიმართა და ამაზე სტატისტიკაც ნათლად მეტყველებს - ლისაბონელები უფრო ხშირად ფლობდნენ ბურთს, მეტოქის კარის მიმართულებითაც მეტჯერ დაარტყეს და შესაბამისად, მეტი სახიფათო მომენტიც შექმნეს. სტატისტის როლში არც სტუმრები იყვნენ და რამდენჯერმე მწვავედ მათაც შეუტიეს.

რაც უფრო ახლოვდებოდა მატჩის დასასრული, გუნდები სულ უფრო ნაკლებად რისკავდნენ და ყველაფერი უგოლო ფრისკენ მიდიოდა - თუმცა, მსაჯის მიერ კომპენსირებულ დროში, ჟონასმა გამოიდო თავი და გამარჯვების გოლი გაიტანა.

პორტუგალიელებმა სტანდარტული მდგომარეობა გამოიყენეს - ნიკოლას გაიტანის ჩაწოდებას სწორედ ჯონასის ზუსტი თავური მოჰყვა და ტაბლოზეც 1:0 აკიაფდა. დამატებულ წუთებზე, "ზენიტისთვის" კიდევ ერთი ცუდი ამბავი მოხდა - მოედნიდან დომენიკო კრიშიტო გააძევეს, რომელიც განმეორებით შეხვედრას გამოტოვებს

მოკლედ, გამარჯვება "ბენფიკას" დარჩა, თუმცა ყველაფერი სანკტ-პეტერბურგში გაირკვევა, სადაც "ზენიტი" ჩამორჩენის აღმოფხვრას შეეცდება. რუსებმა უნდა შეუტიონ, მაგრამ ამასთან, არც დაცვაში მართებთ მოდუნება, რადგან ერთი გოლის გაშვება კატასტროფის ტოლფასი იქნება. ვნახოთ, წინ საინტერესო პაექრობა გველის...

ბენფიკა-ზენიტი 1:0
გოლი: 1:0 ჟონასი (90)
ბენფიკა (4-2-3-1): ჟულიო სეზარი - ალმეიდა, ლინდელოფი, ჟარდელი, ელიზეუ - სამარისი, სანჩესი - პიცი (71. კარჩელა), ჟონასი, გაიტანი - მიტროღლუ (63. ხიმენესი)
ზენიტი (4-2-3-1): ლოდიგინი - ანიუკოვი, გარაი, ლომბერტსი, კრიშიტო - ვიტსელი, გარსია - შატოვი (81. ჟირკოვი), ჰალკი, დანი (87. მაურისიო) - ძიუბა (74. კოკორინი)
გაფრთხილება: ალმეიდა, ჟარდელი, პიცი, ჟონასი - ვიტსელი, გარსია
გაძევება: კრიშიტო (90. ზენიტი)
კუთხური: 5-3; ჯარიმა: 14-12; თამაშგარე: 3-7; კარში დარტყმა: 12-5 (6-2); ბურთის ფლობა: 61%-39%.
მაყურებელი: 48 000