9.12. თბილისი. "მიხეილ მესხი"საქართველო (U16)-ირანი (U16) 2:0
გოლები: 1:0 კერძევაძე (8), 2:0 ჯობავა (77)
საქართველო: ქურდაძე, ბაღდავაძე, ა. არველაძე, მალანია, გაბედავა (78. გელაშვილი), ჯაფიაშვილი, ჯობავა, გოროზია (66. ბუნტური), კერძევაძე (79. მესხი), ლაშხია, კობახიძე (68. შულარია)
მწვრთნელი: გ. შეყილაძე
ირანი: სედგეიანი, ჰოსინი, ჰაგზადე, ნასრი (41. ჰაშემი), ობეიდიორი (41. მოგთადეი), ჯაფერი, ვეჯდანი, ბაიოჯი (65. იასინი), რიგი, მოჰარამი (52. შოჯაქი), ბაიზაჯი
მწვრთნელი: ა. დოსტი
არბიტრი: გ. კიკაჩეიშვილი
საქართველოს 16-წლამდელთა ნაკრებმა გუშინ ვაკეში ირანელ თანატოლებს ამხანაგურად უმასპინძლა და ორბურთიანი სხვაობით აჯობა.
შეხვედრის პირველი ნახევარი
სიცივის მიუხედავად, სტადიონზე ქომაგები მაინც იყვნენ - ქართველ მოზარდებს "ჯვაროსნების" გულშემატკივართა კლუბის წევრები ამხნევებდნენ, ირანელებს _ თბილისში დროებით მცხოვრები მათი თანამემამულეები.
როგორც გელა შეყილაძემ გვითხრა, ნაკრების სამწვრთნელო შტაბი სასელექციო პროცესს აქტიურად განაგრძობს და ამ მიზნით გუშინ შვიდი ახალი ფეხბურთელი გამოიცადა, რომელთაგან სამი საქართველოს 15-წლამდელთა ნაკრების წევრია. ახალწვეულთა უმრავლესობით შეყილაძე კმაყოფილი დარჩა.
შეგახსენებთ, ეს გუნდი გაისად, შემოდგომაზე ევროპის 17-წლამდელთა ჩემპიონატის პირველ შესარჩევ ეტაპზე ითამაშებს. ჯგუფს თბილისი უმასპინძლებს და შეყილაძეს აუცილებლად მიაჩნია, რომ საკონტროლო მატჩების უმეტესობა ნაკრებმა აქ ჩაატაროს. გუშინდელი კი ამ ნაკრებისთვის საქართველოში ჩატარებული პირველი საერთაშორისო სპარინგი იყო.
მატჩის შეყილაძისეული შეფასება კი ასეთია:
"მოხარული ვარ, რომ ორი მნიშვნელოვანი ამხანაგური შეხვედრის ჩატარების საშუალება მოგვეცა. ირანის ნაკრები საკმაოდ ძლიერი სპარინგპარტნიორი აღმოჩნდა - სწრაფ და აგრესიულ ფეხბურთს თამაშობს და პრობლემებიც შეგვიქმნა. ამ შეხვედრაში შედეგს გადამწყვეტი მნიშვნელობა არ აქვს, მაგრამ გამარჯვება მაინც სასიამოვნოა. დიდი სამუშაო გველის. იმედი მაქვს, ნაკლოვანებებს გამოვასწორებთ და ევროპის ჩემპიონატის საკვალიფიკაციო ტურნირს სრულ მზადყოფნაში შევხვდებით".
ქართველი და ირანელი 16-წლამდელების მეორე სპარინგი კვლავ "მიხეილ მესხზე" გაიმართება.
ყოველდღიური სპორტული გაზეთი "ლელო"
