საქართველოს 19-წლამდელთა ნაკრებს, რომელიც მაისში ევროპის ჩემპიონატის ელიტ-რაუნდში იასპარეზებს, ახალი მთავარი მწვრთნელი ჰყავს. ფეხბურთის ფედერაციის პრესსამსახურის ცნობით, გუნდი ოთარ კორღალიძეს ჩააბარეს. შეგახსენებთ, რომ კორღალიძემდე საქართველოს 19-წლამდელთა ნაკრებს გიორგი დევდარიანი თავკაცობდა (რომელიც იანვარში თბილისის "დინამოს" მთავარი მწვრთნელი გახდა); თუმცა ამ ცოტა ხნის წინ დევდარიანმა საგანგებო განცხადება გააკეთა და თანამდებობიდან გადადგა.
საქართველოს 19-წლამდელთა ნაკრების ახალ მთავარ მწვრთნელს ოთარ კორღალიძეს მცირე ინტერვიუ ჩამოვართვით.
- რა გეგმებით მოდიხართ ნაკრებში, რა ცვლილებებს გეგმავთ?
- არა მგონია, დიდი ცვლილებები საჭირო იყოს. ძირითადი ბირთვი იგივე დარჩება, რაც
- ვინ იქნებიან თქვენი ასისტენტები?
- გადაწყვეტილი მხოლოდ ისაა, რომ ლევან ბარათაშვილი დამეხმარება. მეკარეთა მწვრთნელის კანდიდატურაზე კი ჯერ ისევ ვფიქრობთ.
- 19-წლამდელების ბირთვს ის ფეხბურთელები შეადგენენ, რომლებიც გიორგი დევდარიანის ხელში გაიზარდნენ. მათი უფროსი მეგობარიც იყო და ასეთი გუნდის გაძღოლა, ალბათ, საკმაოდ ფაქიზი საქმეა...
- ცხადია, ამაზე ვფიქრობდი, როდესაც ფედერაციამ ნაკრების გაწვრთნა შემომთავაზა. მაგრამ მეც არ ვარ გადამთიელი, მოთამაშეებთან ასევე მეგობრული და იგივე საფეხბურთო პრინციპების მიმდევარი ვარ.
- საკონტროლო მატჩები თუ დაგეგმეთ?
- პირველ შეკრებას 12 ან 13 მარტს თბილისში დავიწყებთ, 20 მარტს კი კვიპროსში ამ ქვეყნის 19-წლამდელებს შევხვდებით. მეორე შეკრება გვექნება აპრილში. სავარაუდოდ, 20 აპრილს პორტუგალიაში გავემგზავრებით და მეორე ამხანაგურ შეხვედრას ჩავატარებთ.
P.S. შეგახსენებთ, რომ უეფას შტაბბინაში ჩატარებულ წილისყრაზე საქართველოს 19-წლამდელთა ნაკრების ჯგუფში მოხვდნენ ხორვატია, ავსტრია და ბოსნია. ტურნირს კი 25-30 მაისს ხორვატია უმასპინძლებს.
ოთარ კორღალიძე (დოსიე)
დაიბადა თბილისში 1959 წლის 2 სექტემბერს. იყო საკმაოდ წარმატებული მოთამაშე და ქართველი ფეხბურთელებიდან, ალბათ, ყველაზე მეტ კლუბში უთამაშია. 23-წლიანი კარიერის განმავლობაში 11 ქართული და უცხოური კლუბის ფორმა მოურგია, კარიერა კი 41 (?!) წლის ასაკში დაასრულა.
ბევრისთვის უცნობია, რომ ჩვენმა თავდამსხმელებმა ევროპულ ლიგებში საუკეთესო შედეგი ორჯერ აჩვენეს: 1991-92 წლების სეზონში მეტოქეთა კარი ოთარ კორღალიძემ 40-ჯერ აიღო, შემდეგ სეზონში კი მერაბ მეგრელაძემ - 41-ჯერ. მაგრამ "ოქროს ბურთის" პრიზი 5 წელიწადი არ თამაშდებოდა და ამის გამო კორღალიძე-მეგრელაძეს ეს პოპულარული ჯილდო არ მიუღიათ.
მოთამაშის კარიერა
1977 გურია (ლანჩხუთი) 18 (3)
1980 დინამო (თბილისი) 0 (0)
1981 ლოკომოტივი (თბ) ? (?)
1982-1986 ტორპედო (ქუთაისი) 154 (42)
1987-1988 დინამო (თბილისი) 29 (4)
1988-1989 გურია (ლანჩხუთი) 57 (8)
1990-1992 გურია (ლანჩხუთი) 84 (75)
1992-1993 ალაზანი (გურჯაანი) 27 (23)
1993 გურია (ლანჩხუთი) 5 (4)
1993-1994 კაზინო (ავსტრია) 3 (0)
1994-1995 ვინერი (ავსტრია) 17 (3)
1995 დინამო (თბილისი) 5 (1)
1995 ნეფთჩი (ბაქო) 4 (2)
1995-1996 ფლორა (ესტონეთი) 8 (3)
1996 გურია (ლანჩხუთი) 13 (2)
1997 ოდიში (ზუგდიდი) 3 (0)
2000 კურესაარე (ესტონეთი) 1 (0)
სამწვრთნელო კარიერა
ოთარ კორღალიძემ სამწვრთნელო კარიერა 1997 წელს დაიწყო და 2010 წლის ჩათვლით, ათამდე სხვადასხვა გუნდში მუშაობდა:
1997-99 - "არსენალი" თბილისი (მთავარი მწვრთნელი)
1999-2000 - "დინამო" თბილისი (მთავარი მწვრთნელი)
2000-01 - "ფლორა" ტალინი (ასისტენტი)
2001-02 - "ლოკომოტივი" თბილისი (ასისტენტი)
2002-04 - "დინამო 2" თბილისი (მთავარი მწვრთნელი)
2003-04 - საქართველოს 19-წლამდე ნაკრების მთავარი მწვრთნელი
2005-06 - "კახეთი" თელავი (მთავარი მწვრთნელი)
2006-08 - "ზოოვეტი" თბილისი (მთავარი მწვრთნელი)
2008-09 - "სიონი" ბოლნისი (მთავარი მწვრთნელი)
2009-10 - "ოლიმპი" რუსთავი (მთავარი მწვრთნელი)
ყოველდღიური სპორტული გაზეთი "ლელო"
