უკრაინელებსა და ინგლისელებსაც ახმახი ბიჭები ჰყავდათ, ფეხბურთის თამაშში კი ბრიტანელები აღემატებოდნენ მოწინააღმდეგეებს. უკრაინამ თავიდანვე დაუთმო ინიციატივა მეტოქეს, თუმცა ეს იმას როდი ნიშნავდა, რომ იშტაზე არ იყო. საბოლოოდ გაიმარჯვა იმან, სადაც უფრო მეტი ნიჭიერი ფეხბურთელი დავინახეთ.17-წლამდელთა ინგლისი არ ჰგავდა ინგლისის ეროვნულ ნაკრებს. ეს გუნდი სხვა მოდელია. კარგა ხანია, ინგლისელები აღარ თამაშობენ იმ ბრიტანულ სტილში, ჩაწოდებებს და თავურებს რომ ვეძახით. ინგლისელი თინეიჯერები კი სულაც უფროსებისგან განსვავებულ ფეხბურთზე ფიქრობენ. ასე ჩანდა 26 მარტს "დინამო არენაზე".
დღეს ესპანური მოდელია მოდაში და კონსერვატორული ინგლისიც
უკრაინის ნაკრების მწვრთნელი ალექსანდრ პეტრაკოვი ნამატჩევს მხოლოდ შედეგით როდი გახლდათ უკმაყოფილო. არბიტრი გააკრიტიკა, მოედანზე იუნიორები იყვნენ და მსაჯი ასეთ რამეებს რომ სჩადის, როგორ შეიძლებაო. პეტრაკოვმა ისიც კი თქვა, შესაძლოა, ამ არბიტრს, ზოგადად, უკრაინა არ უყვარსო. უკრაინელთა მწვრთნელმა მომდევნო შეხვედრისთვის იმედი გამოთქვა, ესპანეთთან ბულგარელი მსაჯი იქნება და ალბათ, ის აღარ გასწირავს უკრაინასო.
არბიტრმა მართლაც არ დაინდო ტარას კაჩარაბა, რომელიც მეტოქეს უკნიდან ეუხეშა და გააძევა. ინგლისი ისედაც უპირატესობას ფლობდა და როგორც კი კაცნაკლული მეტოქე მოიხელთა, უფრო თავდაჯერებულად ათამაშდა. თქმა რად უნდა, არბიტრის გადაწყვეტილებამ ბრიტანელებს საქმე გაუადვილა.
პირველი საგოლე შანსი კალუმ რობინსონს ჰქონდა - ახლო მანძილიდან ვერ გაახვია ბურთი ბადეში. არანაკლები შესაძლებლობა გაანიავა უკრაინელთა თავდამსხმელმა დმიტრო ბილონოჩმა, რომელიც კონტრშეტევაზე მეკარესთან პირისპირ აღმოჩნდა და მიზანი ვეღარ გაისწორა.
პირველი ტაიმის ბოლო წუთზე სვიფტჯონმა ძელს გაარტყა - ასე იყო საქმე შესვენებამდე.
დაცვაში ჩამჯდარ უკრაინას სულ უფრო და უფრო უჭირდა იერიშების მოგერიება და მოსახდენიც მოხდა - კალუმ ჩამბერსმა ახლოდან იხეირა.
ბრიტანელებს ანგარიშის გაზრდაც შეეძლოთ. ჩუბა აკპომი მეკარესთან მარტო კი დარჩა, მაგრამ ბოგდან სარნავსკიმ ბურთი კუთხურზე მოიგერია.
კაცნაკლულმა უკრაინამ ორჯერ გაიბრძოლა, ორივეჯერ შორეული დატყმით სცადა ბედი, თუმცა უშედეგოდ.
ინგლისელების თამაშს ალბინოსი 11 ნომერი, უილიამ ჰაგისი წარმართავდა, ბურთს ჩინებულად ფლობდა, ნათელი გონებისა და ტექნიკის ხარჯზე ყველაფერს ფრიადზე ასრულებდა. 10 ნომერი აკპომი მოსვენებას არ აძლევდა მეტოქის დაცვას. ისეთი თავდამსხმელია, კაცის მოტყუებაც რომ იცის და კარზეც რომ არის დაგეშილი. 14 ნომერი ჯორდან გრემი ბრაზილიელივით ფინტაობდა. ამ სამეულს უკვე შეუძლია, რომ ხალხი სტადიონზე მიიყვანოს და ეს ალბათ ბევრს ნიშნავს.
ინგლისელთა დამრიგებელმა ჯონ პიკოკმა პრესკონფერენციაზე ზოგად ფრაზებს ისიც მიაყოლა, პირველი თამაში ყოველთვის რთულია და მოხარული ვარ, უკრაინისდარ მუშა გუნდთან რომ მოვიგეთო. საქართველოს ნაკრებზე კი პიკოკმა გვითხრა, ესპანეთთან ნათამაშები ფრეს გარეშეც ვიცით, რომ კარგი გუნდია და საერთოდ, ელიტრაუნდში ყველაზე ძლიერი ჯგუფი ჩვენი არისო.
უკრაინელთა ბრაზიანმა მწვრთნელმა კი, მსაჯობის გარდა, იმაზეც დაიჩივლა, უკრაინაში სეზონი 7 აპრილს განახლდება და ბუნებრივია, ეს ჩვენი ფეხბურთელებისთვის ხელისშემშლელი ფაქტორია; ამიტომაც ვითამაშეთ მეორე ნომრადო.
26 მარტი. თბილისი. "დინამო არენა". 2 000 მაყურებელი
ინგლისი-უკრაინა 1:0
1:0 ჩამბერსი (56, აკპომის პასით)
ინგლისი უკრაინა
4-2-3-1 4-2-3-1
უილისი სარნავსკი
გორდონი ბურდა
ჰაიდენი კაჩარაბა
ინისი ლუხტანოვი
შაუ სობოლი
კ. ჩამბერსი ლაზაროვიჩი
სვიფტჯონი ტანკოვსკი
გრემი ხარატიმი
ჰაგისი ბილონოჩი
აკპომი მირანიანი
რობინსონი რადჩენკო
მწვრთნელი: მწვრთნელი:
ჯ.პიკოკი ა.პეტრაკოვი
ინგლისი
65. რობინსონი - ჯები
65. ჰაგისი - ბენეტი
74. კ.ჩამბერსი - ვუდლანდი
სათადარიგოები: ანგუსი, ლ.ჩამბერსი, უოლესი, უები
უკრაინა
36. რადჩენკო - პოლეჩენკო
58. ლუხტანოვი - ტკაჩუკი
სათადარიგოები: სტავიცკი, ტიშენკო, გაბელოკი, ვეტროვი, იარემჩუკი
გაფრთხილება: კაჩარაბა(18,35), სობოლი (34), ლუხტანოვი (51), სარნავსკი (56), ჯები (80)
გაძევება: კაჩარაბა (35)
არბიტრი: მ. ჰამეტერი(ავსტრია)
ყოველდღიური სპორტული გაზეთი "ლელო"
