28.08. თბილისი. ბორის პაიჭაძე. 3000 მაყურებელიდინამო-ზესტაფონი 2:2
0:1 გორგიაშვილი (19), 0:2 დვალი (61. აფციაურის პასით), 1:2 ხისკო (76. კოტოს პასით), 2:2 ხისკო (90+2. რეხვიაშვილის პასით)
დინამო ზესტაფონი
4-1-4-1 4-2-3-1
ლორია მამალაძე
რეხვიაშვილი ღონღაძე
თომაშვილი ონიანი
კაკუბავა კობახიძე
ოდიკაძე ალადაშვილი
კვეკვესკირი გორგიაშვილი
ალვარო ბაბუნაშვილი
ჯიღაური გრიგალაშვილი
რობერტინიო ჭანკოტაძე
იაგუე აფციაური
კახელიშვილი ს. ლომია
მწვრთნელი: მწვრთნელი:
ა. გარსია გ. ჭიაბრიშვილი
დინამო
46. კახელიშვილი - ხისკო
62. ჯიღაური - კოტო
69. კვეკვესკირი - კოშკაძე
სათადარიგოები: გრიშიკაშვილი, ჰომოლა, ბერაია, თექთურმანიძე
ზესტაფონი
46. ღონღაძე - ძარია
46. ჭანკოტაძე - ელიავა
54. ლომია - დვალი
სათადარიგოები: რ. კვასხვაძე,
გაფრთხილება: ალადაშვილი (10), ლორია (19), კაკუბავა (19), ბაბუნაშვილი (31), კობახიძე (45), იაგუე (54), ელიავა (74), დვალი (83).
არბიტრი: ლ. კვარაცხელია
ევროთასებზე გამოსვლას გამოთხოვებული და ხასიათწამხდარი გუნდების თამაში არც ისეთი ურიგო სანახავი გამოდგა, როგორიც შეიძლებოდა გვევარაუდა. ვერ ვიტყვით, რომ ტემპი მაღალი იყო, მაგრამ მატჩს დრამატულობა, მოულოდნელობა და ინტრიგა უდავოდ ახლდა.
ორივე გუნდს აკლდა ან თადარიგში ჰყავდა რამდენიმე წამყვანი მოთამაშე, რაც მწვრთნელებმა მათი დაღლით თუ მცირე ტრავმებით ახსნეს. შეხვედრა კი "დინამომ" უფრო აქტიურად დაიწყო, მაგრამ ვერაფერს გახდა, "ზესტაფონის" კართან მიახლოება და მწვავე შეტევის განხორციელება თბილისელებს უჭირდათ. სტუმრები კი ეფექტურ კონტრშეტევებს მიმართავდნენ.
მე-8 წუთზე გიორგი ჭანკოტაძემ მაკრატელათი სცადა მასპინძელთა კარის აღება, მაგრამ გიორგი ლორიამ საიმედოდ ითამაშა.
"დინამომ" მე-17 წუთზე გაიტანა, გიორგი კახელიშვილის დარტყმის შემდეგ ზურაბ მამალაძემ ბურთი ვერ მოიხელთა და დამატებაზე იაგუემ ივარგა, მაგრამ არბიტრმა ლევან კვარაცხელიამ თამაშგარე დააფიქსირა.
"ზესტაფონის" საპასუხო შეტევა შედეგიანი გამოდგა: თორნიკე გორგიაშვილი სწრაფად და ეფექტურად გასცდა მცველებს, საჯარიმოში შეიჭრა და უძლიერესად დაარტყა - ხარიხიდან ჩასხლეტილმა ბურთმა კარის ხაზი არ გადაკვეთა, მაგრამ კვარაცხელიამ ლაინსმენთან მოთათბირების შემდეგ მოედნის ცენტრისკენ გაიშვირა ხელი და დინამოელთა რისხვაც დაიმსახურა.
ბუნებრივია, უმალ ის გაგვახსენდა, ჩვენი ფეხბურთის ფედერაციის პრეზიდენტი ზვიად სიჭინავა უეფას ვიდეორეფერის საქართველოში დანერგვას რომ სთავაზობდა. ცოდვაა იმის თქმა, მსაჯებმა გოლი განზრახ არ ჩათვალეს, "დინამოს" დაჩაგვრა სურდათო. შეუიარაღებელი თვალით ძნელი გადასაწყვეტი იყო, სად დაეშვა ბურთი, მხოლოდ ვიდეოგამეორებისას გამოჩნდა, რომ კარის ხაზი არ გადაუკვეთია.
გოლმა სტუმრები შეაგულიანა. 30-ე წუთზე საბა ლომიამ თორნიკე აფციაურს თბილისელთა საჯარიმოსთან ბურთი გადააწოდა, მისი დარტყმა კი ლორიამ მოიგერია.
"დინამოს" გათანაბრების შანსი 42-ე წუთზე მიეცა: გიორგი რეხვიაშვილის ფლანგური ჩაწოდება გიორგი კახელიშვილმა ვერ დააგვირგვინა.
მეორე ტაიმი "დინამომ" უფრო მობილიზებულად დაიწყო. 57-ე წუთზე ხისკო მეკარესთან პირისპირ გადიოდა, მაგრამ მცველებმა შეავიწროვეს და სახიფათო მომენტი განიმუხტა.
"ზესტაფონის" იერიშები შეცვლაზე შესულმა ჯაბა დვალმა გაამწვავა. 61-ე წუთზე ანგარიში სწორედ მან გაზარდა: გორგიაშვილმა მარჯვენა ფლანგზე აფციაური შენიშნა, მან შეტევაში საჯარიმოში მყოფი დვალი ჩართო, "ზესტაფონის" ფორვარდმა კი მცველები ცრუ მოძრაობით ჩამოიცილა და ზუსტად დაარტყა - 0:2.
ერთი შეხედვით, თამაშის ბედი აქ უნდა გადაწყვეტილიყო, მაგრამ "დინამომ" ძალა მოიკრიბა, გულიანად შეუტია და ქულა მაინც გადაარჩინა. იაგუე კვლავ ვერაფრით დაგვამახსოვრდა, სამაგიეროდ, ხისკო და ალვარო აქტიურობდნენ, მონდომებული ჩანდა კოტოც, რომელიც 70-ე წუთზე საჯარიმოში შეიჭრა და დაარტყა - ზურაბ მამალაძემ ბურთი კუთხურზე მოიგერია.
76-ე წუთზე კი "დინამომ" ერთი ბურთი გაქვითა: კოტოს გადაცემა ხისკომ გოლით დააგვირგვნა - 1:2.
კარგად ჩაერთო თამაშში ალეკო კოშკაძე, რომლის პასითაც 81-ე წუთზე ლევან კაკუბავამ მწვავე მომენტი შექმნა. ერთ წუთში დასარტყმელ პოზიციაზე იაგუე ისევ კოშკაძემ გაიყვანა - ესპანელის თავური კარს აცდა.
89-ე წუთზე "ზეტსაფონის" ნახევარმცველ შოთა გრიგალაშვილის დარტყმას მატჩისთვის წერტილის დასმა შეეძლო, მაგრამ ლორიამ "დინამო" გადაარჩინა და ბურთი კუთხურზე მოიგერია.
მსაჯის მიერ დამატებული დრო იწურებოდა, როდესაც რეხვიაშვილმა შეტევა წამოიწყო, მშვენიერი გამჭოლი გადაცემით დასარტყმელ პოზიციაზე გაიყვანა ხისკო და ესპანელმა საბოლოო ანგარიში დააფიქსირა - 2:2.
გია ჭიაბრიშვილი: ევროტურნირებიდან ჩემპიონატზე გადმორთვა ორივე გუნდისთვის ძნელი იყო. დაღლილებმა ვერც ერთმა ვაჩვენეთ ის ფეხბურთი, რაც შეგვიძლია. ამიტომაც ფრე ლოგიკური იყო, მეტოქემ შეცდომები არ გვაპატია. თამაშის გადადება კი კარგი იქნებოდა. აქვე მადლობა მინდა გადავუხადო "დინამოს" სულგრძელობისთვის - ევროთასების შემდეგ მათ ერთი დღით მეტი ჰქონდათ მატჩისთვის მოსამზადებლად, მაგრამ თამაშის გადადება შემოგვთავაზეს, რათა დასვენებული ფეხბურთელებით გვეთამაშა. სამწუხაროდ, ეს ვერ მოხერხდა.
ალექს გარსია: ფიზიკურად და ფსიქოლოგიურად ძალიან მძიმე მატჩი იყო. ჩვენი ფეხბურთელებისთვის ჯერ კიდევ 25 აგვისტო იყო და ამ მატჩზე გადართვა მხოლოდ შეხვედრის მიწურულს მოახერხეს. თავით რომ ვერაფერი შევძელით, გულით ვითამაშეთ და ფრეს მაინც მივაღწიეთ. სამწუხაროა, რომ ასეთ დაღლილებს მოგვიწია თამაშმა".
იხილეთ ვიდეო
ყოველდღიური სპორტული გაზეთი "ლელო"
