ზესტაფონი-სპარტაკი 4:0
1:0 ძარია (31. გელაშვილის პასით), 2:0 წინამძღვრიშვილი (67), 3:0 წინამძღვრიშვილი (79. ალადაშვილის პასით), 4:0 გრიგალაშვილი (90+2. გელაშვილის პასით)
ზესტაფონი სპარტაკი
3-5-2 4-4-2
კვასხვაძე გრიშიკაშვილი
ალადაშვილი ჭაფოძე
ონიანი ბოიომო
გორგიაშვილი თავბერიძე
აფციაური კორსანტია
მ. დაუშვილი კაშია
ძარია მგელაძე
გრიგალაშვილი შონია
ელიავა სარალიძე
გელაშვილი დეკანოიძე
დვალი კლოვისი60. დვალი - წინამძღვრიშვილი
69. აფციაური - ბაბუნაშვილი
75. ძარია - ფიფია
სათადარიგოები: მამალაძე, მაკარიანი, მიქაბერიძე, ცხადაია
68. დეკანოიძე - ხაჭვანი
78. შონია - ჩალაძე
88. კლოვისი - ჯიშკარიანი
სათადარიგოები: ნ. დაუშვილი, მაისურაძე, აქუბარდია, ფურცელაძე
არბიტრი: ჯ. ხორავა
ზესტაფონში ახალი საფეხბურთო
ჩემპიონატის როგორც გახსნის მატჩებში ხდება, თამაშის დაწყებამდე გუნდების კაპიტნებმა თორნიკე აფციაურმა და ნიკა მგელაძემ ეროვნული ჰიმნის ჰანგების თანხლებით საქართველოს დროშა აღმართეს. საზეიმო ცერემონიალების დასკვნითი აკორდი კი საქართველოს პროფესიული ფეხბურთის ლიგის პრეზიდენტის გია ფირცხალავას მიერ ზესტაფონელთათვის ბრინჯაოს მედლების (განვლილი სეზონის ნადავლი) გადაცემა იყო...
მოგეხსენებათ, ჩემპიონატის ერთ-ერთ ფავორიტად შერაცხულმა "ზესტაფონმა" სეზონი "დინამოსთან" მარცხით დაიწყო და საკუთარი გულშემატკივრების წინაშე რეაბილიტაციისთვის "სპარტაკის" დამარცხება მართებდა. დისკვალიფიკაციის გამო გია გეგუჩაძემ სამი უკანახაზელი - ხიდეშელი, კობახიძე და ბენაშვილი მოისაკლისა, რის გამოც მწვრთნელმა გადაადგილებებს და ტაქტიკურ ცვლილებებს მიმართა - დაცვის ცენტრში ონიანი და გორგიაშვილი შეუწყვილა ერთმანეთს, რომელთაც მარჯვნიდან ალადაშვილი ეხმარებოდა, მარცხენა ფლანგზე გამწესებული ელიავა კი დაცვაზე მეტად შეტევებზე გახლდათ ორიენტირებული...
როგორც მოსალოდნელი იყო, შეხვედრა მასპინძელთა შეტევებით დაიწყო, თუმცა პირველი სახიფათო მომენტის შექმნა ზესტაფონელებს ცოტა კი დაუგვიანდათ - მე-10 წუთზე ალადაშვილმა საჯარიმო დარტყმა კარგად შეასრულა, თუმცა გრიშიკაშვილიც უშეცდომოდ გაისარჯა და ბურთი კუთხურზე მოიგერია.
ცხინვალელებმა მასპინძლებს სწრაფი კონტრშეტევით უპასუხეს - მგელაძის სახიფათო დარტყმა კვასხვაძემ მოიგერია. ზესტაფონელები ფლანგებიდან მწვავედ უტევდნენ, განსაკუთრებით ალადაშვილი აქტიურობდა, რომელიც დაცვაშიც უშეცდომოდ ირჯებოდა და შეტევებშიც ხშირად ერთვებოდა. მე-14 წუთზე ალადაშვილის ფლანგური ჩაწოდების შემდეგ გელაშვილმა კარის მიმართულებით მძლავრად დასცხო, თუმცა ბურთი ოდნავ ასცდა მიზანს.
რამდენიმე წუთში გელაშვილს კვლავ მიეცა გოლის გატანის შანსი, მაგრამ გრიშიკაშვილმა აუღო, დამატებაზე კი აფციაურმა ააცილა მიზანს. 27-ე წუთზე შეტევებში გართულ ზემოიმერლებს სტუმართა კიდევ ერთი მწვავე კონტრშეტევა გამოეპარათ - კლოვისი კვასხვაძესთან პირისპირ აღმოჩნდა, თუმცა აფრიკელს დასარტყმელად სივრცე აღარ ეყო, თანაც გოლკიპერი დროულად გამოვიდა კარიდან და მდგომარეობა განმუხტა. ცოტა ხანში, სარალიძე შეიჭრა საჯარიმოში და ზესტაფონელ მცველთან ორთაბრძოლისას დაეცა. სტუმართა ნახევარმცველი პენალტს ითხოვდა, თუმცა არბიტრს წესების დარღვევა არ დაუფიქსირებია. ზესტაფონელთა საპასუხო შეტევას კი გოლი მოჰყვა - გელაშვილმა მარჯვენა ფლანგიდან საჯარიმოსკენ დაძრული ძარია მოძებნა, რომელმაც უძლიერესი დარტყმით მასპინძლები დააწინაურა - 1:0.
მატჩის სცენარი მეორე ტაიმშიც არ შეცვლილა. მასპინძლები უტევდნენ, ცხინვალელები კი იშვიათი კონტრშეტევებით პასუხობდნენ. სტუმრებმა ორჯერ სახიფათოდაც დაარტყეს - 55-ე წუთზე მასპინძელთა კარს კლოვისი დაემუქრა, თუმცა კვასხვაძეს ბურთის მოგერიება არ გასჭირვებია. რამდენიმე წუთში კი სტუმრებმა გაცილებით მწვავე კონტრშეტევა განახორციელეს - შოთა კაშიას ფლანგურ ჩაწოდებას დეკანოიძემ თავური დარტყმა მიაყოლა, თუმცა ზესტაფონელთა ახალგაზრდა კიპერი კვლავ უშეცდომო იყო.
ამასობაში, დვალის ნაცვლად მოედანზე წინამძღვრიშვილი გამოჩნდა და ზესტაფონელთა შეტევებს სიმწვავე შემატა. 66-ე წუთზე გრიგალაშვილის ძლიერი დარტყმისას გრიშიკაშვილმა შეცდომა დაუშვა - ბურთი ცუდად მოიგერია, დამატებაზე კი ყველას წინამძღვრიშვილმა აჯობა და ანგარიში გაზარდა - 2:0.
რამდენიმე წუთში რატიმ დუბლიც შეასრულა - ალადაშვილის ფლანგურ ჩაწოდებას ნახტომში თავური დარტყმა მიაყოლა და სპარტაკელთა გამოცდილ მეკარეს შანსი არ დაუტოვა - 3:0.
მსაჯის მიერ კომპენსირებულ დროში მასპინძლებმა მეოთხედაც შეარხიეს სტუმართა კარის ბადე - გელაშვილმა სოლორეიდით მცველები მიფანტ-მოფანტა და გრიგალაშვილს თითქმის კარის ხაზიდან გაატანინა - 4:0.
მატჩის შემდეგ
გელა ინალიშვილი (სპარტაკი): "ახალგაზრდული გუნდი გვყავს. ფეხბურთელების უმეტესობას გამოცდილება აკლია. რამდენიმე საგოლე მომენტი გვქონდა და ვერ გამოვიყენეთ. ზესტაფონი კი გამოუყენებელ მომენტებს არავის პატიობს. მასპინძლებმა დამსახურებულად გაიმარჯვეს. ვულოცავ მათ გამარჯვებას, ჩვენ კი თამაშის გამოსასწორებლად ბევრი მუშაობა გვმართებს".
გია გეგუჩაძე (ზესტაფონი): "ჩვენთვის ძალიან მნიშვნელოვანი თამაში იყო. ეს მოგება მომავალი მატჩებისთვის გუნდს ფსიქოლოგიურად უკეთ განაწყობს. ლამაზი, კომბინაციური და შემტევი ფეხბურთი ვითამაშეთ, რამაც ლოგიკურ შედეგამდე მიგვიყვანა".
