მედიაკომპანია "კოლხიდას" დამფუძნებელი და პრეზიდენტი ლექსო თოფურია აცხადებს, რომ პროფესიული ფეხბურთის ლიგასთან გაფორმებულ კონტრაქტს მხოლოდ იმ შემთხვევაში გააგრძელებს, თუკი უმაღლესი ლიგის კლუბები კერძო საკუთრებაში გადავლენ. ლაპარაკია მედიაპროექტის ინიცირებულ გადაცემა "გოლზე", რომელიც საქართველოს ეროვნული ჩემპიონატის პოპულარიზაციისა და კომერციალიზაციის მიზნით ჩამოყალიბდა.
- ბატონო ლექსო, გაურკვეველია, გააგრძელებს თუ არა პროფესიული ფეხბურთის ლიგა "კოლხიდასთან" კონტრაქტს. კონფერენციიდან გამოსულ ხმებს თუ დავუჯერებთ, თქვენ პირობა წამოგიყენეს - ლიგის წინაშე 2007 წლიდან არსებული დავალიანება უნდა გადაიხდოთ.
- ჩვენ ლიგასთან 20-წლიანი კონტრაქტი გავაფორმეთ და 2009 წლამდე დავალიანება გავისტუმრეთ. ახლა ლაპარაკია,
- როგორც ვიცით, ვადა 31 ივლისამდეა დათქმული...
- დიახ, ასეთია შეთანხმება და დამატებითი თანხა უნდა გადავიხადოთ.
- რატომ დამატებითი?
- დამატებითი თანხა დღევანდელი ვითარებიდან და მოთხოვნებიდან გამომდინარე გამოჩნდა. ამით დეფიციტში გარღვევა აღმოფხვრილი იქნება.
- გააჩნია კი "კოლხიდას" სახსრები, დამატებითი თანხა რომ გაისტუმროს და პროექტი არ ჩააგდოს?
- საკითხი ასე დგას: კლუბები კერძო საკუთრებაში უნდა გადავიდნენ. "კოლხიდას" პროექტის გაგრძელება მხოლოდ ასეთ შემთხვევაში უღირს. სხვაგვარად, ის 31 ივლისამდე შეწყდება, მანამდე კი კლუბებთან დავალიანებას აუცილებლად გავისტუმრებთ, არსებულ კონტრაქტს "კუდები" რომ არ დარჩეს.
- ანუ, კონტრაქტის შეწყვეტაზე მართლა ფიქრობთ?
- რასაკვირველია?! თუმცა ახლა სწორი მიმართულებაა აღებული. კონფერენციაზე შევიტყვე, რომ ზუგდიდის "ბაია" ძალზე სოლიდურმა კომპანიებმა - "სოკარმა" და "ჯი-ემ-სი ჯგუფმა" აიყვანეს. ფოთის პორტი და კიდევ 6 კომპანია "კოლხეთს" უპატრონებენ, "მადნეული" კი - ბოლნისის "სიონს".
- ეს ძალიან კარგი სიახლეა...
- დიახ, დამაიმედებელი ვითარებაა. აქამდე "ვისოლმა" ქუთაისის "ტორპედო" აიყვანა, "ოლიმპი", "ზესტაფონი" და "ვიტ ჯორჯია" კი ისედაც კერძო კლუბებია. ანუ, კერძო საკუთრებაში უკვე 8 კლუბია. ეს ტენდენცია, უპირველესად, ისევ ქართული ფეხბურთის განვითარებას წაადგება. ჯერჯერობით, გაურკვეველი ვითარებაა "სამტრედიისა" და ცხინვალის "სპარტაკის" შემთხვევაში. იმედია, მათი ბედიც მალე გაირკვევა და თუ ასე მოხდება, შეჯიბრების ნორმალურად ჩატარების სასურველი წინაპირობაც იქნება.
- სახელმწიფო საკუთრებაში მყოფ კლუბებთან ურთიერთობა პრობლემურია?
- 5 წლის წინაც ძალიან პრობლემური იყო და ახლაც ასეა. გახსოვთ, ალბათ, როგორ ვიბრძოდით. კარგია, პროცესი რომ დაიწყო და იმედია, ასეთივე ტემპით გაგრძელდება და მალე ყველა კლუბს კერძო მეპატრონე ეყოლება.
მერაბ მამულაშვილი
