პირველი ეტაპის ბოლო ტურამდე ერთადერთს მხოლოდ ბოლნისის "სიონს" არ ჰქონდა სტუმრად გამარჯვება მოპოვებული და აი, ნავსი გატყდა: ქვემოქართლურ "დერბიში" "სიონმა" ამ სეზონში უკვე მეორედ დააკარგვინა ქულები "მეტალურგს". თუმცა, ისიც საკითხავია, ვის სჭირდებოდა ეს ქულები: "მეტალურგისათვისაც" და "სიონისთვისაც" ეს მატჩი ხომ, ფაქტობრივად, არაფერს ნიშნავდა - ორივე გუნდისთვის ნებისმიერი შედეგი "მისაღები" იქნებოდა და, აქედან გამომდინარე, მშვიდი "დერბის" მოლოდინიც გვქონდა.
ერთი შეხედვით, ფეხბურთელებს თავი მართლაც "არ გაუგიჟებიათ" და თამაშის უმოტივაციო შინაარსიდან გამომდინარე, ვერ ვიტყვით, რომ მასპინძლები ძალიან დამწუხრებული დარჩნენ ზედიზედ მეორე წაგების გამო
ისე, გუშინდელ ქვემოქართლურ "დერბის" მაინც არ ჩაუვლია "უხმაუროდ" თუ "უემოციოდ": მატჩის დასრულებამდე დიდი დრო არ რჩებოდა, სათადარიგოთა სკამიდან ტრიბუნაზე ასვლა რომ მოუწია სტუმართა თავკაცს ხვიჩა ქასრაშვილს. მიზეზი კი ის იყო, რომ ბოლნისელთა მთავარმა მწვრთნელმა ხმამაღლა გამოხატა პროტესტი არბიტრის ქმედების გამო: ზვიად მეტრეველმა უწყინარ სიტუაციაში გაფრთხილება მიიღო. ეს კი იმას ნიშნავს, რომ "სიონის" ფორვარდს მომდევნო შეხვედრის გამოტოვება მოუწევს.
მომდევნო მატჩი კი, 8 მარტს გამართული შეხვედრისგან განსხვავებით, ბოლნისელთათვის მეტად და მეტად მნიშვნელოვანი იქნება (ისე, როგორც ყველა დანარჩენი). თუმცა, ალბათ, სჯობს, ისევ გუშინდელ "დერბის" დავუბრუნდეთ: კვლავაც არაოპტიმალური შემადგენლობით მოასპარეზე მასპინძლებმა მატჩი აქტიურად დაიწყეს და გიორგი სეთურიძის ზუსტი პასის მერე ირაკლი სიხარულიძეს კარგი მომენტი შეექმნა, მაგრამ მცირეოდენ არაზუსტად დაარტყა.
სიხარულიძემ ეს "შეცდომა" მალე გამოასწორა და ირაკლი მაისურაძესთან გათამაშებული კომბინაცია მეტოქის კარის შორეულ კუთხეში ზუსტი დარტყმით დაამთავრა.
ამ გოლის მერე მოედანზე მეტ-ნაკლებად თანაბარი თამაში წარიმართა, თუმცა სტუმრები დროდადრო სწრაფ და სახიფათო კონტრშეტევებსაც ახორციელებდნენ. აი, თუნდაც ის ეპიზოდი გავიხსენოთ, მარცხენა ფლანგიდან თენგიზ ჩიკვილაძის გადაცემას ვილი ისიანი რომ "გამოეხმაურა", მაგრამ მახვილი კუთხიდან არაზუსტად დაარტყა. თუმცა რამდენიმე წუთში ანალოგიური კომბინაცია ვიხილეთ იგივე ფეხბურთელების შესრულებით და ისიანმაც ანგარიში გაათანაბრა.
სულ მალე კი ბოლნისელებმა მეორე გოლიც გაიტანეს: დავით ბოლქვაძემ, როგორც სჩვევია, მოხდენილი პასით ჯაბა უგულავა ხელსაყრელ პოზიციაზე გაიყვანა და "სიონის" 19 წლის ფორვარდმაც ეს შანსი ხელიდან არ გაუშვა.
მასპინძელთა მომენტებიც უნდა ვახსენოთ, თუმცა გიორგი ქავთარაძისა და ირაკლი მაისურაძის მცდელობებს შედეგი არ მოჰყოლია.
მეორე ტაიმში მასპინძლები შესამჩნევად გააქტიურდნენ, "მეტალურგის" მთავარმა მწვრთნელმა კობა ჟორჟიკაშვილმა მოედანზე სამი შემტევიც (ირაკლი მოდებაძე, დიმიტრი ტატანაშვილი, გიორგი ჭედია) შემოიყვანა, მაგრამ ანგარიში აღარ შეცვლილა. არადა, მასპინძლებს მონდომება ნამდვილად არ დაეწუნებოდათ, მაგრამ გიორგი ქავთარაძის, რევაზ გეწაძისა და მიხეილ მახვილაძის დარტყმებს სიზუსტე აკლდათ.
ნურც "სიონის" მეკარეს დავუკარგავთ გარჯას: 22 წლის ვახტანგ ლობჟანიძეს (ისე, როგორც ამ გუნდების პირველი წრის შეხვედრაში) ურიგო შთაბეჭდილება ნამდვილად არ დაუტოვებია. განსაკუთრებით კი ის ეპიზოდ(ებ)ი უნდა აღვნიშნოთ, როცა ლობჟანიძემ ერთწუთიან ინტერვალში გეწაძისა და მოდებაძის სახიფათო დარტყმები მოიგერია.
08. 03. რუსთავი. ფოლადი. 500 მაყურებელი
მეტალურგი-სიონი 1:2
1:0 სიხარულიძე (8, მაისურაძის პასით), 1:1 ისიანი (39, ჩიკვილაძის პასით), 1:2 უგულავა (43, ბოლქვაძის პასით).
მეტალურგი (4-2-3-1) სიონი (4-3-2-1)
ბედიაშვილი ლობჟანიძე
სეთურიძე ავსაჯანიშვილი
კვარაცხელია გ. ოქროპირიძე
მახვილაძე ქემოკლიძე
ს. თოდუა ჩიკვილაძე
ქავთარაძე ისიანი
რაზმაძე ნემსაძე
თექთურმანიძე ჭანკოტაძე
ი. მაისურაძე დ. ბოლქვაძე
გეწაძე უგულავა
სიხარულიძე ხურციძე
მწვრთნელი: კ. ჟორჟიკაშვილი მწვრთნელი: ხ. ქასრაშვილი
მეტალურგი
60. თექთურმანიძე - ტატანაშვილი
70. სეთურიძე - ჭედია
78. მაისურაძე - მოდებაძე
სათადარიგოები: ბათიაშვილი, ოთარაშვილი, ექვთიმიშვილი
სიონი
46. ჭანკოტაძე - გველესიანი
46. უგულავა - ხიდეშელი
78. ხურციძე - მეტრეველი
სათადარიგოები: ზუხბაია, კაციტაძე, კობაური, ჯოჯუა
გაფრთხილება: თექთურმანიძე (44), კვარაცხელია (65), მეტრეველი (85)
არბიტრი: ი. ურუშაძე
ყოველდღიური სპორტული გაზეთი "ლელო"
