ეროვნული ჩემპიონატის ბოლო ტურის წინ ქულათა თანაფარდობა ძალაში რჩება. "ზესტაფონმა", "მეტალურგის" მსგავსად, გამარჯვება მოიპოვა და ამით დებულების ყბადაღებული თემა კიდევ უფრო აქტუალური გახდა. "ზესტაფონის" ამოცანა ნათელი იყო - იმისთვის, რომ საქართველოს მოქმედ ჩემპიონს ტიტულის შესანარჩუნებლად ბრძოლა გაეგრძელებინა, "დილა" აუცილებლად უნდა დაემარცხებინა.
სტუმრებმა მატჩი აქტიურად დაიწყეს და სწრაფი გოლიც გაიტანეს - "დილას" მცველმა საკუთარ საჯარიმოში ხელით ითამაშა და არბიტრმა თერთმეტმეტრიანი დანიშნა. პენალტი ჯაბა დვალმა ზუსტად შეასრულა და ბომბარდირთა დავაში ლიდერობა განიმტკიცა.
სამიოდე წუთში კი "ზესტაფონმა" კიდევ ერთი პენალტის დარტყმის უფლება მოიპოვა
მალე ნომინალური მასპინძლებიც გააქტიურდნენ და ალექსანდრე გურულის მიერ შესრულებული საჯარიმო დარტყმა როინ კვასხვაძემ კუთხურზე მოიგერია. ერთ წუთში კი რევაზ ბარაბაძე იყო ახლოს ანგარიშის გათანაბრებასთან, მაგრამ ზაალ ელიავამ ბურთს კარში შესვლის საშუალება არ მისცა.
პირველი ტაიმის დარჩენილი წუთები მთლიანად "ზესტაფონის" უპირატესობით წარიმართა და გიორგი ჭიაბრიშვილის გუნდმა ანგარიშის გაზრდის სამი რეალური შანსი გაუშვა ხელიდან - შოთა გრიგალაშვილის ეფექტური დარტყმა მიზანს ოდნავ ასცდა, მეკარესთან პირისპირ გასულ თორნიკე გორგიაშვილს ბექა შეყრილაძემ არ გაატანინა, დავით მუჯირის ჯარიმა კი "დილას" მეკარემ ხარიხის დახმარებით მოიგერია.
მატჩის მეორე ნახევარი ახალი დაწყებული იყო, დვალმა ეფექტური ვარდნით რომ სცადა გატანა - შეყრილაძეს საკუთარი გუნდის გადარჩენაში ამჯერად კარის ძელი "დაეხმარა".
თითქოს "დილას" კარში მეორე გოლი მწიფდებოდა, მაგრამ ბურთი "ზესტაფონის" კარში აღმოჩნდა. ივანე კანდელაკის წაქცევისთვის დანიშნული პენალტი გურულმა გამოიყენა.
ამის შემდეგ თამაშის ტემპი საგრძნობლად დაეცა, რაც, შესაძლოა, სიცხის ბრალიც ყოფილიყო. "ზესტაფონმა", ბუნებრივია, გამარჯვების გოლის გასატანად თავი არ დაზოგა, მაგრამ დრო გადიოდა და სტუმართა შეტევას სიმწვავე სულ უფრო და უფრო აკლდებოდა. "დილას" დაწინაურებაც შეეძლო, მაგრამ გურულმა და შეცვლაზე შესულმა მათე ვაწაძემ არაზუსტად დაარტყეს.
"ზესტაფონი" შეტევაზე ბოლო ძალებით გადავიდა. მსაჯმა მატჩის ძირითად დროს ოთხი წუთი დაამატა. სტუმრებმა საწადელს მეორე დამატებულ წუთში მიაღწიეს - შეცვლაზე შესულმა თორნიკე აფციაურმა საშუალო დისტანციიდან ძლიერად დაარტყა და ბურთი "დილას" კარში ხარიხიდან ასხლეტით აღმოჩნდა.
ამ გოლმა კი ინტრიგა ჩემპიონატის ბოლო ტურსაც შეუნარჩუნა და კიდევ უფრო გაზარდა ძალიან უსიამოვნო პროცესის, დებულების გარშემო ამტყდარი დავის გამძაფრების შანსი.
16.05. თბილისი. მ. მესხი. 800 მაყურებელი
დილა-ზესტაფონი 1:2
0:1 დვალი (7. პენ.), 1:1 გურული (55. პენ.), 1:2 აფციაური (90)
მე-11 წუთზე დვალმა (ზესტაფონი) ვერ გამოიყენა პენალტი (ააცილა)
დილა ზესტაფონი
4-2-3-1 4-4-2
შეყრილაძე რ. კვასხვაძე
ალადაშვილი ღონღაძე
სალუქვაძე კობახიძე
ინწკირველი საჯაია
თოთაძე ელიავა
კანდელაკი ბაბუნაშვილი
ახალკაცი გორგიაშვილი
ბეჭვაია მენთეშაშვილი
გურული შ. გრიგალაშვილი
კახელიშვილი დ. მუჯირი
ბარაბაძე დვალი
მწვრთნელები:
თ. შალამბერიძე გ. ჭიაბრიშვილი
დილა
60. ბარაბაძე - ვაწაძე
65. ბეჭვაია - მეგრელიშვილი
74. კანდელაკი - ჯიქია
სათადარიგოები: სკენდერი, ქარქუზაშვილი, ი. ლომიძე, ნ. ნოზაძე
ზესტაფონი
58. მუჯირი - ოვონიკოკო
60. ბაბუნაშვილი - აფციაური
79. გორგიაშვილი - გუგუჩია
სათადარიგოები: მამალაძე, თ. გრიგალაშვილი, გ. ონიანი, რაჟამაშვილი
გაფრთხილება: კობახიძე (4), ინწკირველი (10), ბაბუნაშვილი (50), საჯაია (66), ვაწაძე (84)
არბიტრი: თ. გვანცელაძე
მატჩის შემდეგ
თემურ შალამბერიძე (დილა): "ჩემს ფეხბურთელებს ძალ-ღონე არ დაუზოგავთ, მაგრამ დადებით შედეგს მაინც ვერ მივაღწიეთ. "ზესტაფონმა" უკეთ ითამაშა და დამსახურებულად მოიგო".
გიორგი ჭიაბრიშვილი (ზესტაფონი): "ჩემი გუნდის თამაშის ხარისხი დამაკმაყოფილებელი არ იყო. თამაში დაღლილობის ფონზე მოგვიწია და ამან ხარისხზე დიდი გავლენა იქონია".
"მოსახდენი ბოლოსკენ მოხდა" (იბეჭდება მცირე ცვლილებით)
ყოველდღიური სპორტული გაზეთი "ლელო"
