...ერთი შეხედვით, ჩვეულებრივი ტური იყო: არც რაიმე "ხმაურიანი" სენსაცია მომხდარა და ზედა ექვსეულიც ნელ-ნელა იძენს "ლოგიკურ სახეს". ამ შემთხვევაში კი იმას ვგულისხმობთ, რომ გორის "დილამ" და რუსთავის "მეტალურგმა" ზედა ექვსეულში აინაცვლეს, - ეს ორივე გუნდი ხომ სეზონის დაწყების წინ ევროტურნირების საგზურის კანდიდატებად მივიჩნიეთ.ამას გარდა, გასული ტური სხვა ფაქტორებითაც იყო დასამახსოვრებელი: ექვსიდან ხუთ შეხვედრაში მასპინძლებმა გაიმარჯვეს, ერთი კი ფრედ დამთავრდა; ანუ ჩვენს ჩემპიონატში მასპინძელთა დომინაცია კვლავაც გრძელდება.
და ბოლოს, ყველაზე მთავარზეც: ექვს მატჩში 21 გოლი გავიდა, რაც სეზონის დაწყებიდან სარეკორდო
ყველაზე შედეგიანი მატჩი
განვლილი ტური ყველაზე შედეგიანი იყო და სეზონის დაწყებიდან ყველაზე შედეგიანი მატჩიც ვიხილეთ: "დინამო"-"მერანის" დაპირისპირებაში 6 გოლი გავიდა.
ამასთან, "დინამომ" ამ ჩემპიონატში პირველად შეძლო 4 ბურთის გატანა და გუნდის მთავარ მწვრთნელს, დუშან უჰრინს ეს ფაქტი რატომაც არ უნდა ახარებდეს; თუმცა სტუმრებსაც ნუ დავუკარგავთ გარჯას - მალხაზ ჟვანიას დამოძღვრილმა "მერანმა" კვლავაც მშვენიერი შთაბეჭდილება დატოვა და ფავორიტ მეტოქეს მართლაც ღირსეული წინააღმდეგობა გაუწია.
"მერანს" საშინაო მატჩებში 100-პროცენტიანი შედეგი აქვს და ამ მართლაც სიმპათიურმა გუნდმა სტუმრადაც რომ დაიწყოს ქულების მოგროვება, მაშინ აღარავის უნდა გაუკვირდეს მარტვილელთა ზედა ექვსეულში მოხვედრა.
ყოჩაღი შემცვლელები
მესამე ტურის გარდა, ყველა ტურში იყო თითო ისეთი შემთხვევა, როცა შეცვლაზე შემოსულ ფეხბურთელს გოლი გაჰქონდა. აი, განვლილ ტურში კი მართლაც სარეკორდო რაოდენობის ფაქტი დაფიქსირდა და ვეჭვობთ, მსგავსი შედეგი პირველი ეტაპის კი არა, საერთოდ, სეზონის ბოლომდე რომ გამეორდეს.
თავად განსაჯეთ: ექვსიდან ოთხ შეხვედრაში თავი გამოიჩინეს შეცვლაზე შემოსულმა ფეხბურთელებმა და მათგან ერთ-ერთმა სულაც გამარჯვების მომტანი გოლი გაიტანა!
სწორედ აქედან გვინდა დავიწყოთ: "მეტალურგის" 28 წლის შემტევი გოგა ფიფია მოედანზე შესვენების შემდეგ გამოჩნდა და თავისი აქტიური თამაში ოსტატური და, რაც მთავარია, 3 ქულის მომტანი გოლითაც დაუფასდა.
ისე, როგორც სათასო მატჩში, კოკა მიკუჩაძე ახლაც შეცვლაზე შემოვიდა და კვლავაც გოლი გაიტანა: 32 წლის ფორვარდმა პენალტი ზუსტად შეასრულა.
20 წუთი ეყო უმაღლეს ლიგაში სადებიუტო გოლის გასატანად "სპარტაკის" 20 წლის ნახევარმცველს უჩა ბურძენაძეს, ხოლო "დინამოს" კოტდივუარელმა ცენტრფორვარდმა პატრიკ ვუომ მოედანზე გამოსვლიდან ხუთიოდ წუთში თავისი პირველი გოლი გაიტანა საქართველოს ეროვნულ ჩემპიონატში.
26 წლის ვუო "დინამოში" სწორედ გოლების გასატანად ჩამოიყვანეს და მისი წარმატება არც არავის უნდა გაჰკვირვებოდა, რასაც ნამდვილად ვერ ვიტყვით "სეზონის აღმოჩენის" ნომერ პირველ კანდიდატზე, მარტვილის "მერანის" ნახევარმცველ აკაკი შულაიაზე: 17 წლის ფეხბურთელი "დინამოსთან" მატჩში შეცვლაზე შემოვიდა და ჩინებული გოლის გარდა, ასაკთან შეუფერებელი ოსტატობითაც გამოირჩეოდა.
შულაიამ ამ ჩემპიონატში მეორე გოლი გაიტანა, ისე, როგორც "მერანის" კიდევ ერთმა დებიუტანტმა, 19 წლის ბექა ციკოლიამ.
ჩვეული მოდებაძე და უჩვეულო კვირკველია
შვიდი ტური გავიდა და კვლავაც "ჰეთ-თრიქის" მოლოდინში ვართ; თუმცა, რატომ გვიკვირს: წინა სეზონის განმავლობაში მხოლოდ ხუთი შემთხვევა იყო, როცა კონკრეტულმა ფეხბურთელმა ერთ მატჩში მეტოქის კარში სამი გოლი გაიტანა (ჯაბა დვალი, ჩისკო, მიხეილ ჯორბენაძე, საბა ლომია, კოკა მიკუჩაძე).
სამაგიეროდ, იმავე წინა სეზონში ძალიან ხშირად გვხვდებოდა "დუბლი" და საქმეს ისეთი პირი უჩანს, ახლაც ასე იქნება.
აი, თუნდაც გასული ტური ავიღოთ, როცა ორმა ფეხბურთელმა შეძლო მატჩში ორი გოლის გატანა: ირაკლი მოდებაძემ ("დილა") და დავით კვირკველიამ ("დინამო").
28 წლის მოდებაძის შედეგიანი თამაში ვის უნდა გაუკვირდეს. თანაც, ისიც უნდა აღინიშნოს, "დილას" ცენტრფორვარდი ერთადერთია ამ სეზონში, მეორედ რომ შეძლო დუბლის შესრულება. აი, დავით კვირკველიას დუბლი კი, ცოტა არ იყოს, უჩვეულოდაც მოჩანს: საქართველოს ნაკრებისა და თბილისის "დინამოს" 32 წლის მარცხენა მცველმა წინა სეზონის განმავლობაში 2 გოლი გაიტანა, ახლა კი იმავე შედეგს ერთ მატჩში მიაღწია.
აღსანიშნავია, რომ "დინამოს" მაისურით დავით კვირკველიამ საქართველოს ჩემპიონატში თერთმეტწლიანი პაუზის შემდეგ გაიტანა!
გამოცდილების ფასი
დავით კვირკველიას, ისე, როგორც ირაკლი მოდებაძეს, გამოცდილება არ დაეწუნება, თუმცა ამ ტურში სხვა არანაკლებ გამოცდილმა ფეხბურთელებმაც გამოიჩინეს თავი: 29 წლის დიმიტრი ტატანაშვილმა ჩემპიონატში მეხუთე გოლი გაიტანა; "ჩიხურაში" მისმა თანაგუნდელმა, 28 წლის ლაშა ჭელიძემ კი ზუსტი დარტყმით თავის გუნდს ქულა მოუტანა.
"სიონი"-"ჩიხურას" მატჩში კიდევ ერთი გამოსარჩევი ფაქტი მოხდა: გარკვეული პაუზის შემდეგ საქართველოს ჩემპიონატს დაუბრუნდა ირაკლი სამხარაძე და 30 წლის შემტევმა ნახევარმცველმაც ბოლნისურ გუნდში სადებიუტო მატჩი (ჩემპიონატს ვგულისხმობთ) გოლით აღნიშნა!
წაუგებელი ახალგაზრდები
"სიონი" უმაღლესი ლიგის ყველაზე "ხანდაზმული" გუნდია. სამაგიეროდ, "ტორპედო" კვლავაც ინარჩუნებს ყველაზე ახალგაზრდული გუნდის "სტატუსს" და ამის მიუხედავად, ქუთათურები კვლავაც აგრძელებენ წარმატებულ სვლას.
ყველაფერს თავი რომ დავანებოთ, დღესდღეობით ხომ მხოლოდ "ტორპედოა" უმაღლეს ლიგაში ერთადერთი დაუმარცხებელი გუნდი!
ესპანელი სპეციალისტის, ჟერარდ სარაგოსას ხელმძღვანელობით მოასპარეზე გუნდს ამ ტურამდე ზედიზედ ორი ფრე ჰქონდა ნათამაშები, თუმცა "ტორპედომ" გასულ ტურში ასევე ახალგაზრდული "ვიტ ჯორჯიას" წინააღმდეგობა მეორე ტაიმში დასძლია და ჩემპიონატში პირველად გაიმარჯვა დიდი ანგარიშით.
აქვე ტორპედოელთაგან გოლის ავტორთა ასაკსაც შეგახსენებთ: გუნდის ახალწვეულმა, 21 წლის თორნიკე კაპანაძემ ჩემპიონატში უკვე მესამე გოლი გაიტანა, 20 წლის მერაბ გიგაურმა და 19 წლის გიორგი ფანცულაიამ - პირველი, ისე, როგორც 18 წლის მათე ცინცაძემ, რომლისთვისაც ეს გოლი სადებიუტო იყო უმაღლეს ლიგაში.
ახალი "დილა"
ამ ზაფხულს, ევროტურნირების დაწყების წინ, გორის "დილაში" ახალი მთავარი მწვრთნელი, გიორგი დევდარიანი მივიდა და ფაქტობრივად, ახალი გუნდით მართლაც ღირსეულად იასპარეზა ევროპის ლიგაზე.
გორელთა გუნდის ქომაგთა სამწუხაროდ, მალე "დილადან" ორი საკვანძო ფეხბურთელი წავიდა (გიორგი ილურიძე, ლაშა გვალია) და დევდარიანსაც გარკვეული კორექტივების შეტანა დასჭირდა ძირითად შემადგენლობაში.
ამას შემდეგ სხვა წამყვანი ფეხბურთელების ტრავმებიც დაემატა და ყოველივე ეს შედეგზეც ადეკვატურად აისახა: ჩემპიონატის ბოლო სამ მატჩში (სამივე გასვლაზე რომ მოუწიათ გორელებს) "დილამ" მხოლოდ და მხოლოდ ერთი ქულის აღება მოახერხა.
და აი, ნავსიც გატყდა: საგრძნობლად გადახალისებული შემადგენლობით მოასპარეზე "დილამ" ამ ბოლო დროს "ფორმააკრეფილ" ცხინვალის "სპარტაკს" დამაჯერებელი ანგარიშით (3:1) აჯობა და ზედა ექვსეულშიც დაბრუნდა.
არადა, ამ შეხვედრაში "დილას" რამდენიმე წამყვანი ფეხბურთელი აკლდა (ოთარ ხიზანეიშვილი, გულვერდ თომაშვილი, კახა ალადაშვილი, გრიგოლ დოლიძე, დავით ბოლქვაძე), თუმცა გიორგი დევდარიანი თამამად ენდო ახალგაზრდებს და ამ უკანასკნელებმაც მწვრთნელს იმედი არ გაუცრუეს.
20 წლის მიხაილ გორელიშვილთან და 18 წლის გიორგი აბურჯანიასთან ერთად ძირითადში იყვნენ კლუბის ახალწვეულები: 22 წლის ნიკა ფილიევი და 21 წლის გეგა დიასამიძე, ხოლო 20 წლის გიორგი ქვილითაია და 17 წლის თენგიზ წიქარიძე შეცვლაზე შემოვიდნენ.
საქართველოს ჩემპიონატი. უმაღლესი ლიგა. VII ტური
დინამო-მერანი 4:2 - მოულოდნელი და სანახაობრივი [VIDEO]
ტორპედო-ვიტ ჯორჯია 4:1 - შთამბეჭდავი გამარჯვება [VIDEO]
დილა-სპარტაკი 3:1. ჩაკეტავ - აგებ, გახსნი - მაინც აგებ [VIDEO]
ზესტაფონი-გურია 1:0 - ქობალიამ "ზესტაფონს" მოგების გემო გაახსენა [VIDEO]
სიონი-ჩიხურა 2:2 - ბოლნისელებს ჯანი დააკლდათ
მეტალურგი-ზუგდიდი 1:0 - გოგა ფიფიას ფაქტორი
ბომბარდირები
ი. მოდებაძე (დილა) 5
დ. ტატანაშვილი (ჩიხურა) 5
ი. ქობალია (ზესტაფონი) 4
VIII ტური
6 ოქტომბერი, კვირა
ჩიხურა-სპარტაკი
გურია-დილა
ზუგდიდი-ზესტაფონი
ვიტ ჯორჯია-მეტალურგი
მერანი-ტორპედო
სიონი-დინამო
ყოველდღიური სპორტული გაზეთი "ლელო"
რას დავაბრალოთ,იქნებ მიმახვედროთ?