ახლა ყველაფერზე თანმიმდევრობით: გუშინ ფეხბურთის ფედერაციის პრეზიდენტმა ზვიად სიჭინავამ საგანგებო პრესკონფერენცია გამართა და მედიას პროფლიგის პრეზიდენტის, გია ფირცხალავას წერილი გააცნო.
საქართველოს ფეხბურთის ფედერაციის პრეზიდენტს
ბატონ დომენტი სიჭინავას
ბატონო დომენტი,
საქართველოს უმაღლესი და პირველი ლიგების კლუბების აბსოლუტურმა უმრავლესობამ ვერ შეძლო საქართველოს პროფესიული ფეხბურთის ლიგის დადგენილი ყოველწლიური საწევრო გადასახადის გადახდა. შესაბამისად, პროფესიული ფეხბურთის ლიგა უმძიმეს
საქართველოს პროფესიული ფეხბურთის ლიგის პრეზიდენტი
გიორგი ფირცხალავა
წერილის პასუხად ფედერაციის პრეზიდენტმა განაცხადა, რომ პროფლიგა მაისამდე უფუნქციოდ დარჩა:
- განცხადებაზე სასწრაფო რეაგირება იყო საჭირო. ფეხბურთის ფედერაციაში გადაწყვეტილება კლუბებთან კონსულტაციების შემდეგ და სახელმწიფოს დახმარებით მივიღეთ და პროფლიგის ფუნქციები ჩვენს თავზე ავიღეთ. ორშაბათიდან ჩვენთან ამოქმედდება საშეჯიბრო განყოფილება, რომელიც 2010-2011 წლების სეზონის უმაღლეს დონეზე ჩატარებასა და ჩამთავრებას უზრუნველყოფს. მთავრობა კი გამოყოფს თანხებს, რათა ეროვნული ჩემპიონატი არ ჩაიშალოს და ტურნირი ყველა კლუბმა ჩაამთავროს.
- ანუ, ლიგა უფუნქციოდ დარჩა?
- მაისამდე ასე იქნება.
- ეს ლიგის გაუქმებას ნიშნავს?
- ამას არ ნიშნავს. ლიგაში მოუწევთ იმის გარკვევა, რა პრობლემებია თავად ორგანიზაციაში. თუკი სპონსორს მოძებნიან და პრობლემებს მოაგვარებენ, მუშაობასაც განაახლებენ. მაისამდე ჩემპიონატზე, სუპერთასსა და ჭაბუკთა ლიგებზე პასუხისმგებლობას ჩვენ ვიღებთ.
- და ეს სახელმწიფოს დახმარებით მოხდება?
- სახელმწიფო გვერდში დაგვიდგება. კლუბებს და ლიგას ერთმანეთთან საქმე ვერ გაურკვევიათ. ეს ყველაფერი მსაჯების დავალიანებამ გამოიწვია. კლუბებს პროფლიგაში საწევრო არ შეუტანიათ. ეს ბევრს შეუძლია, მაგრამ არ აპირებენ, სანამ ლიგა ჩემპიონატში, თასსა და სუპერთასზე მონაწილეობისთვის შეპირებულ პრემიას არ გადაუხდის, ან ამ დავალიანებაში საწევრო გამოგვიქვითონო. ორშაბათს ყველა ლიგაში მოასპარეზე კლუბების ხელმძღვანელებს შევხვდები და დავილაპარაკებთ.
- სახელმწიფოსგან რა ოდენობის თანხას მიიღებთ?
- ზუსტად იმდენს, ვალები რომ გავისტუმროთ და ჩემპიონატი ჩავატაროთ.
- მაისამდე ლიგა ინვესტიციების მოზიდვას შეეცდება?
რევაზ არველაძე, ფედერაციის გენერალური მდივანი: - კომერციული ორგანიზაციის არსებობა აუცილებელია, მაგრამ ისიც კარგია, ფედერაციას სახელმწიფოს დახმარების იმედი რომ გააჩნია.
ზვიად სიჭინავა: - ორი დღის წინ "ვიტ ჯორჯიას" პრეზიდენტ გურამ რუხაძეს შევხვდი, რომელმაც სამართლიანი პრეტენზია წამოაყენა, ლიგისგან ჩემპიონატში, სუპერთასსა და თასზე მონაწილეობისთვის პრემია გვეკუთვნის და ბიუჯეტი ამ თანხის გათვალისწინებით დავგეგმეთ, ასე რომ, საწევრო ლიგის დავალიანებიდან გამოქვითონო.
- თუ ეს საწევროები არ შეგროვდა, მსაჯებს ხელფასებს როგორ გაუზრდით?
- ეს სხვა თემაა, სხვა პროექტია. მსაჯების ანაზღაურების გაზრდა ჩვენ პირველ და ჭაბუკთა ლიგებშიც გვსურს. წელს მივაღწიეთ იმას, რომ უმაღლეს ლიგაში თამაშების ჩაწყობაზე არავინ ლაპარაკობს. მსაჯების ხელფასების გაზრდა ამ საუბრებს საერთოდ შეწყვეტს.
- რომელიმე პრობლემურ გუნდს სპონსორი თუ გამოუჩნდა?
- ძველი ფედერაციის შეცდომაა, რომ გუნდების დაფინანსების დეტალები არ იცოდნენ. პორტის და ქალაქის დაფინანსება ერთი და იგივე არაა. ამიტომ უეფას და ფიფას მიაწოდეს ინფორმაცია, თითქოს ასეთი კლუბები სახელმწიფოსგან ფინანასდებოდნენ. წინა პრეზიდენტის განცხადება, რომელიც კლუბების მუნიციპალიტეტებიდან და სახელმწიფოსგან დაფინანსებას კრძალავდა, 2009 წლის 19 დეკემბერს გავაუქმე და გუბერნიებსა და მუნიციპალიტეტებში შუამდგომლობა დავაყენე, რომ გუნდებს შეძლებისდაგვარად დაეხმარონ. მთელ მსოფლიოში ასეა, მუნიციპალიტეტები ინახავენ სტადიონებს, ნაწილობრივ კლუბებს და საფეხბურთო სკოლებს.
ზოგ კლუბში ხელფასებს ვერ იხდიან, ასეთებს 300-400 ათასი ლარიც შეეშველება. გასასტუმრებელია მსაჯების თანხებიც. არადა, პრობლემები მანამდე უნდა მოგვარდეს, სანამ ეს ხალხი ფედერაციასთან პროტესტის გამოსახატავად მოგადგება.
- ნაკრებს წარმატებული წელი ჰქონდა და სპონსორები თუ შემოტრიალდნენ?
- "სოკართან" მიდის მოლაპარაკება, მაგრამ უკვე იმდენს ველაპარაკეთ, იმავე კლუბების თაობაზე, სანამ კონტრაქტი არ გაფორმდება, ვერაფერს გეტყვით. არადა, სლოვენიაში ნაკრებმა საქართველოს პირველობაზე მოთამაშე ბიჭებით მოიგო, ანუ უინტერესო ჩემპიონატი არ გვაქვს.
ყოველდღიური სპორტული გაზეთი
"ლელო"
