დისკვალიფიცირებული თენგიზ ჩიკვილაძე მოისაკლისეს, რომლის ნაცვლადაც მარცხენა ფლანგზე გიორგი გურული გამოჩნდა. თბილისელებმა კი იმავე მიზეზით გიგა ბეჭვაია ვერ დაიხმარეს. შეხვედრა საკმაოდ მაღალ ტემპში მიმდინარეობდა,
პროდუქტიულად მოქმედებდა ირაკლი კლიმიაშვილიც, ბესიკ ჩიმაკაძეს კი რიგ ეპიზოდებში უფრო მეტი სიზუსტე მართებდა. მატჩის პირველი სახიფათო მომენტი ვიტელებმა შექმნეს -ქუთაისელი მცველების შეცდომის შემდეგ ჩიმაკაძე ურტყამდა, მაგრამ ომარ მიგინეიშვილმა შეძლო ბურთის მოგერიება, მასპინძლებმა იქვე მეტად სახიფათო შეტევით უპასუხეს, მცველის შეცდომის შემდეგ მეკარესთან პირისპირ გივი ჩხეტიანი აღმოჩნდა, მაგრამ გიორგი ძაძამიამ დაასწრო და ვიტელები ხიფათისგან იხსნა. ცოტა ხანში ჩხეტიანს ისევ მიეცა თავის გამოჩენის შანსი, იგი ისევ მარჯვენა ფლანგიდან უტევდა, მაგრამ მისი სახიფათო დარტყმა ხარიხას გადასცდა. 27-ე წუთზე ლაშა კასრაძემ ჯარიმიდან ჩაჰკიდა ბურთი, რასაც ჩიმაკაძის თავური მოჰყვა, მეკარე ცუდ პოზიციაში იყო, მაგრამ დარტყმა იმდენად სუსტი აღმოჩნდა მოგერიება მაინც მოასწრო. ტაიმის ბოლოს თემურ ფარულავას ჰქონდა გოლის გატანის შანსი. კუთხურის შემდეგ კარში თავით გზავნიდა ბურთს, მაგრამ მცირედით ააცილა.
მეორე ნახევრის საწყისი წუთები თანაბარ ბრძოლაში მიმდინარეობდა. 58-ე წუთზე კი ლიპარტიამ პატარა შედევრი შემოგვთავაზა. ბექა ზაქრაძის ჩაწოდებისა და კლიმიაშვილის თავური პასის შემდეგ მან "ტორპედოს" მთელი დაცვა გააბითურა და საჯარიმოს გარედან მოჭრილი დარტყმით ულამაზესი გოლი გაიტანა-0:1 გაშვებულმა ბურთმა მასპინძლები კიდევ უფრო დააბნია და 66-ე წუთზე ვიტელებს ანგარიშის გაზრდაც შეეძლოთ. ლიპარტია-კლიმიაშვილი-ჩიმაკაძის კომბინაციას ეს უკანასკნელი აგვირგვინებდა, მაგრამ დარტყმა სუსტი გამოუვიდა და მეკარემ მოიგერია. გიგატაძემ შეცვლებით სცადა მდგომარეობის გამოსწორება, მარჯვენა მცველ დაჩი ფოფხაძის ნაცვლად მესამე თავდამსხმელი ლაშა კემუხტაშვილი შეიყვანა. მოგვიანებით კი მოედანზე რევაზ კვერნაძეც შეუშვა. 67-წუთზე ტორპედოელებს ანგარიშის გათანაბრების შესაძლებლობა ჰქონდათ, თორნიკე თარხნიშვილის გადაცემის შემდეგ ნიკა საბანაძე ახლოდან ურტყამდა და მეკარე ძაძამიამ იხსნა საკუთარი გუნდი. 77-ე წუთზე დავით დიღმელაშვილის კუთხურის შემდეგ ვახტანგ კვარაცხელიას თავური ასცდა მიზანს.
"ტორპედო" ანგარიშის გათანაბრებას ცდილობდა და ბევრსაც უტევდა, მაგრამ ისიც სათქმელია, რომ ქუთაისელებს მთელი მატჩის განმავლობაში ერთი გააზრებული კომბინაციაც არ გაუთამაშებიათ. მხოლოდ მაღალმა ჩაწოდებებმა და ქაოტურმა შეტევებმა კი შედეგი ვერ მოიტანა. პირიქით, ვიტელებს მატჩის მიწურულს სხვაობის გაზრდა ორჯერ შეეძლოთ 83-ე წუთზე კლიმიაშვილის უძლიერესი შორეული დარტყმა მეკარემ მოიგერია, 89-ე წუთზე კი კლიმიაშვილის გადაცემის შემდეგ შეცვლაზე შესულმა გიორგი ჯანელიძემ მცველებთან ორთაბრძოლაში დაარტყა და ისევ ქუთაისელთა მეკარემ ივაჟკაცა. დარჩენილ დროში მასპინძლებს მატჩის გადარჩენის შანსი აღარ მისცემიათ. სტუმრებმა შეხვერდა მშვიდად მიიყვანეს გამარჯვებამდე და ცხინვალის "სპარტაკთან" მოულოდნელი მარცხის შემდეგ ხასიათი გამოიკეთეს. "ტორპედოს" ხელმძღვანელობა კი ზამთრის სატრანსფერო ფანჯრისას გუნდის საფუძვლიან გადახალისებაზე ფიქრობს.
მერაბ კოჭლაშვილი ("ვიტ ჯორჯია~): "დღეს მოედანზე ორი თანაბარი ძალის გუნდი იყო. ფეხბურთელები რატომღაც ძალიან ნერვიულობდნენ. ჩვენ დასაკარგი არაფერი გვქონდა და მეტოქესთან შედარებით უფრო ნაკლები წნეხის ქვეშაც ვიყავით. უკეთესი მოედანი რომ ყოფილიყო, ბურთს დავიჭერდით და კარგი თამაშით მაყურებლებს ჩვენს მხარეზე გადმოვიყვანდით. ვფიქრობ, ცუდად არ გვითამაშია და დამსახურებულად გავიმარჯვეთ"
გიორგი სუხიაშვილი ("ტორპედო~): "ძალაინ გვიჭირს საგოლე მომენტების შექმნა და რეალიზება. გოლის გარეშე კი ფეხბურთში რაიმეს მიღწევა შეუძლებელია. კიდევ უფრო მეტს ვიმუშავებთ, რომ ეს პრობლემა გამოვასწოროთ და შედეგიანობა გავზარდოთ."
ტორპედო-ვიტ ჯორჯია 0:1
ქუთაისი. ცენტრალური. 5000 მაყურებელი
0:1 ლიპარტია (58)
ტორპედო ვიტ-ჯორჯია
4-4-2 4-4-1-1
მიგინეიშვილი ძაძამია
ფოფხაძე ხურცილავა
ს. თოდუა ადამაძე
ფარულავა კასრაძე
გურული ღანიაშვილი
ჩხეტიანი კლიმიაშვილი
დიღმელაშვილი ვასაძე
დათუნაიშვილი გურამ გურეშიძე
თარხნიშვილი ზაქრაძე
საბანაძე ლიპარტია
ვ. კვარაცხელია ჩიმაკაძე
მწვრთნელი: გ. გიგატაძე მწვრთნელი: მ. კოჭლაშვილი
ტორპედო
62.ფოფხაძე - კემუხტაშვილი
79.საბანაძე - კვერნაძე
სათადარიგოები: ქვილითაია, მაჭავარიანი, მ. გიგაური, ლომაშვილი, ნ.კვასხვაძე
ვიტ ჯორჯია
67. ზაქრაძე - ჯანელიძე
79. ლიპარტია - გოგიაშვილი
90. კლიმიაშვილი-კორიფაძე
სათადარიგოები: ა. მიქაბერიძე, გიორგი გურეშიძე, დვალიშვილი, ჭანკვეტაძე
გაფრთხილება: ჩიმაკაძე (38), ძაძამია (53), გურამ გურეშიძე (55) ჯანელიძე(84)
არბიტრი: ლ.კვარაცხელია (ზუგდიდი)
ყოველდღიური სპორტული გაზეთი
"ლელო"
