სამაგიეროდ, გუშინ დიღმის ბაზაზე მორიგი ახალწვეულები გამოჩდნენ და მათ უკვე გუნდთან ერთად ვარჯიშიც მოასწრეს. ესენი არიან 27 წლის ლიტველი ცენტრალური მცველი მინდაუგას ბაგუჟისი და სერბი ცენტრალური ნახევარმცველი ვლადიმირ ვუკაილოვიჩი.
ვლადიმირ ვუკაილოვიჩი, დაიბადა 1983 წლის 25
სიმაღლე: 182 სმ.
პოზიცია: მარცხენა ნახევარმცველი.
კლუბები:
2001-2002 - "ბორაცი" (სერბეთი)
2002-2004 -"პარტიზანი" (სერბეთი)
2004-2005 - ბელგრადის "რადი" (სერბეთი)
2005-2007 - ბეჟანია" (სერბეთი)
2007-2009 - "ვოევოდინა" (სერბეთი)
2009 - "სენიცა" (სლოვაკეთი)
2010 - ბრიანსკის "დინამო" (რუსეთი)
2010 - "სლობოდა სევოინო" (სერბეთი)
სერბს სერბეთის ჩემპიონატის მეხუთე ადგილზე მყოფ "სლობოდა სევოინოში" ხშირად ცენტრალურ ნახევარმცველად ათამაშებდნენ, "ტრანსფერმარკტი" კი 220 ათას ევროდ აფასებს.
ვუკაილოვიჩზე ინფორმაცია "ვიკიპედიაში" მოვიპოვეთ, მინდაუგას ბაჟუგისზე კი ბევრი არაფერია ცნობილი, გარდა იმისა, რომ ის ტანმაღალია (193 სმ.) და ექვსი წელი საფეხბურთო კლუბ "კაუნასში" გამოდიოდა.
ბაგუჟისის გვერდით თბილისის "დინამოს" ცენტრალურ მცველ გია კვარაცხელიას და ცხინვალის "სპარტაკის" წევრ ნუკრი მანჩხავას უთამაშიათ. ამ უკანასკნელს მისი დახასიათება ვთხოვეთ.
"ბაგუჟისი საქართველოში ჩამოვიდა? ჯერ იმას გეტყვით, რომ "კაუნასში" ბევრთან ვმეგობრობდი, მათ შორის მინდაუგასთან. რაც შეეხება მის ფეხბურთელობას, არ მახსენდება, ლიტვის ნაკრებში ეთამაშოს, მაგრამ საკმაოდ კარგი ფეხბურთელია, ათლეტურია და თავით კარგად თამაშობს. "კაუნასში" "რეინჯერსის" წინააღმდეგ ლიტვური კლუბისთვის ისტორიული მატჩი ერთად მოვიგეთ და შოტლანდიელები ჩემპიონთა ლიგის მეორე საკვალიფიკაციო ეტაპიდან გამოვაგდეთ. შეიძლება, ბაგუჟისი ტექნიკური არაა, მაგრამ მებრძოლია და ტიპური ცენტრალური მცველია, რომელიც ორთაბრძოლას იშვიათად აგებს", - გვითხრა მანჩხავამ.
ზემოთდასახელებულთა გარდა, კლუბში კიდევ აკვირდებიან ცენტრალურ მცველებს, მაკედონიელ პანჩე კუმბევს და სერბ მარკო ევტიჩს, აგრეთვე სერბ მარცხენა მცველ მარკო მაროვიჩს.
სიის გადახედვიდან აშკარაა, რომ "დინამოს" ახალი ხელმძღვანელობა განსაკუთრებით ცენტრალურ და მარცხენა მცველებს ეძებს. დღეს 14 საათზე თბილისის "დინამო" "ავაზას" სტადიონზე ბოლნისის "სიონთან" საკონტროლო შეხვედრას გამართავს და ალბათ, კაჭარავა ამ მატჩის შემდეგ გადაწყვეტს, ვინ დატოვოს. თუმცა უცხოელებს იმ ტემპით უშვებენ, ძნელი წარმოსადგენია, ვინმეს დატოვება შესაძლებელი თუ არის.
კლუბთან ერთად ვარჯიშობს ახალგაზრდული ნაკრების შემტევი ნახევარმცველი ნიკა ძალამიძეც, მაგრამ როგორც ამტკიცებენ, ნიკა "დინამოში" დარჩენას მართლა არ აპირებს.
ყოველდღიური სპორტული გაზეთი "ლელო"
.
