გოგიტა გოგუას და თემურ ქეცბაიას შორის გაუგებრობა მარტში, ხორვატიასთან მოგებული მატჩის შემდეგ მოხდა, რის შემდეგაც ნაკრების თავკაცმა შეკრებიდან დაითხოვა 27 წლის ფეხბურთელი და გუნდი ისრაელში მის გარეშე გაემგზავრა. რეალურ მიზეზებზე არც მწვრთნელსა და არც ფეხბურთელს არაფერი უთქვამთ. ამოიწურა თუ არა კონფლიქტი და როდის დაუბრუნდება ნაკრებს გოგუა? გთავაზობთ ინტერვიუს გოგიტა გოგუასთან.
- შენსა და თემურ ქეცბაიას შორის მომხდარ კონფლიქტზე კომენტარის გაკეთება არც ერთმა ისურვვეთ. არადა, გულშემატკივარს სურს, იცოდეს, რა მოხდა სინამდვილეში. ქეცბაიას თქმით, შენ ყველა მწვრთნელთან გქონდა კონფლიქტი.
- მე თუ
- მაინც, რა მოხდა შენსა და ქეცბაიას შორის?
- მე ერთს ვიტყვი - საქართველოს ნაკრებისთვის თავს არ დავზოგავ! ქართველი გულშემატკივრების გვერდში დგომას ვგრძნობ და მინდა, ყველას მადლობა გადავუხადო.
- სწორედ გულშემატკივარს სურდა, რომ თქვენ ურთიერთობა მოგეგვარებინათ, რადგან საქართველოს ნაკრებს გოგუასნაირი ფეხბურთელები დასაკარგი არ ჰყავს. იმ ინციდენტის შემდეგ გქონდა ქეცბაიასთან კონტაქტი?
- ყველაფერის მოგვარება შეიძლება და მეც, ალბათ, მალე ვითამაშებ საქართველოს ნაკრებში.
- ეს სიურპრიზია, ანუ ისაუბრეთ შენ და ქეცბაიამ?
- მოვლენებს ნუ გავუსწრებთ, ერთს ვიტყვი, მე საქართველოს ნაკრებში სათამაშოდ მუდამ მზად ვარ!
- მოვლენების გასწრება არც მიფიქრია, უბრალოდ, შენმა პასუხმა მაფიქრებინა, რომ ისაუბრეთ. კულუარებში ლაპარაკობდნენ, რომ შენ ერთი კონკრეტული ვარჯიშის შესრულებაზე უარი განაცხადე, რასაც ერთმანეთის მიმართ სიტყვიერი შეურაცხყოფა მოჰყვა.
- არანაირი სიტყვიერი შეურაცხყოფა არ ყოფილა. ხომ გითხარით, ყველაფრის მოგვარება შეიძლება და მოგვარდება კიდეც. არა მგონია, ჩემზე მეტად უნდოდეს ვინმეს ნაკრებში თამაში.
- "ვოლგაზეც" გკითხავ: გუნდის სატრანსფერო ფასებს გადავხედე და სამი ყველაზე ძვირადღირებული ფეხბურთელიდან ორი ქართველია - შენ და ლაშა სალუქვაძე, არადა, ორივე გუნდიდან ისე მოგკვეთეს, მიზეზებზე ღიად არფერი თქმულა. თანაც, რუსულ პრესაში არაერთხელ დაიწერა გარიგებულ თამაშებში "ვოლგას" მონაწილეობაზე.
- მწვრთნელმა გადაწყვიტა, რომ მეორე გუნდში მეთამაშა. ასე რომ, ეს კითხვა მას ეკუთვნის. მალე გადაწყდება, დავრჩები თუ არა "ვოლგაში". ჩაყწობილი თამაშებზე კი რა გითხრათ, სისულელე მგონია.
- თბილისის "დინამოში" ხომ არ გიხილავთ?
- მოვლენებს ნურც ამ შემთხვევაში გავუსწრებთ, ამასაც მომავალი გვიჩვენებს.
ყოველდღიური სპორტული გაზეთი "ლელო"
