მიუხედავად ამისა, მეტოქეზე რაღაც ცნობები მაინც მოვიძიეთ. ვიცით, რომ მალტის ნაკრების თავკაცმა ჯონ ბუტიგეგმა 8 ოქტომბრის მატჩისთვის უნგრული "ფერენცვაროშის" ორი მოთამაშე - მეკარე ჯასტინ ჰაბერი (30 მატჩი) და თავდამსხმელი ანდრე შემბრი (30 მატჩი, 3 გოლი) გამოიძახა. ამ უკანასკნელს ეროვნულ გუნდში პორტუგალიასთან შარშანდელი მატჩის შემდეგ აღარ უთამაშია.
ასე რომ, მალტას ორი ფეხბურთელი დაემატა, თუმცა დანაკლისსაც ვერ ასცდნენ - თბილისში სერბული წარმოშობის 30 წლის თავდამსხმელ დანიელ ბოგდანოვიჩს ვერ ათამაშებენ. ბოგდანოვიჩს, რომელიც მიმდინარე სეზონიდან ინგლისური "შეფილდ იუნაიტედის" ღირსებას იცავს, ნაკრებში ასევე 30 მატჩი აქვს ჩატარებული, თუმცა მხოლოდ 1 გოლით "იწონებს" თავს. ის საქართველოსთან დისკვალიფიკაციის გამო ვერ ითამაშებს.
აღსანიშნავია, რომ გასულ უქმეებზე "ფერენცვაროშს" "ვაშაშთან" სტუმრად სწორედ შემბრიმ მოაგებინა (3:1). მალტელმა თავდამსხმელმა ამ მატჩში ჰეთ-თრიკი შეასრულა. როგორც ჩანს, ამან შემბრი მადაზე მოიყვანა და ადგილობრივ მედიასთან კომენტარში აშკარად დიდ გულზეა.
"ნაკრების თავკაცს უკვე ველაპარაკე. მზად ვარ, ისევ ვითამაშო ნაკრებში. მინდა, "ფერენცვაროშთან" ერთად ეროვნულ გუნდსაც გამოვადგე. ნაკრებში გარკვეული პაუზის შემდეგ ვბრუნდები და კვლავ მეძლევა შესაძლებლობა, გულშემატკივარი გავახარო... რაც შეეხება საქართველოს, ეს გუნდი შარშან აგვისტოში შინ დავამარცხეთ. თბილისში თამაში ძნელი იქნება, მაგრამ ჩვენ ჩვენი მაინც უნდა ვცადოთ. ძალიან მინდა, ამ შეხვედრაში გოლი გავიტანო და ბედნიერი ვიქნები, თუ ეს გოლი წარმატების მომტანი იქნება", - თქვა შემბრიმ ვებგვერდ ტიმესოფმალტა.ცომ-თან საუბარში.
მალტის ნაკრები ორშაბათს, 5 ოქტომბერს გვეწვევა. კუნძულელები სასტუმრო "შერატონ მეტეხი პალასში" დაბინავდებიან და "მიხეილ მესხზე" ივარჯიშებენ. მატჩის წინა დღეს კი წვრთნას "ბორის პაიჭაძეზე" გამართავენ.
