ელადაზე წაგების შემდეგ ლატვიელები სამშობლოში დაბრუნდნენ და საქართველოს ნაკრებთან მატჩისთვის მზადებას შეუდგნენ. მეტოქე ნაკრების თავკაცმა ალექსანდრს სტარკოვსმა გუნდი გუშინ საღამოს ავარჯიშა. ჩვენს ნაკრებთან მატჩში ლატვიელებს საგრძნობი დანაკლისი აქვთ. ბერძნულ "ერგოტელისში" მოასპარეზე მარის ვერპაკოვსკისი დისკვალიფიკაციის გამო არ ეყოლებათ. გიორგი შაშიაშვილის ლატვიელმა თანაკლუბელმა მეორე გაფრთხილება საბერძნეთთან მატჩში მიიღო.
ცნობისთვის, 30 წლის ფორვარდს ეროვნულ ნაკრებში 83 მატჩში 27 გოლი აქვს გატანილი. სტარკოვსის საფიქრალი მხოლოდ ამით არ ამოიწურება. შესაძლოა მეტოქეს კიდევ ერთი ფეხბურთელი გამოაკლდეთ. მახაჩყალის "ანჟის" მცველი ოსკარს კლიავა ბერძნებთან მატჩში დაშავდა და სამშაბათის მატჩში მისი მონაწილეობის საკითხი გუშინ კვლავ კითხვის ნიშნის ქვეშ იდგა.
ხორვატია პირველია
ჯგუფის ფავორიტად მიჩნეულმა ხორვატიამ 9 ოქტომბერს ისრაელი აღთქმულ მიწაზე დაამარცხა. თავიდანვე აღვნიშნავთ, რომ ამ შეხვედრას ორივე გუნდი დანაკლისით შეხვდა. მასპინძლებს "ჩელსის" ნახევარმცველი იოსი ბენაიუნი, ასევე ომერ დამარი და ბირამ კაიალი აკლდათ. ხორვატთა დანაკლისი კი მხოლოდ ერთი ფეხბურთელით შემოიფარგლა - თავდამსხმელი მლადენ პეტრიჩი.
რაც შეეხება უშუალოდ მატჩს. ხორვატებმა თავიდანვე გამოაჩინეს კლანჭები და ნიკო კრანჩარის დუბლით ორბურთიანი ფორა მოიპოვეს. ხორატებს სწრაფი გოლითაც შეეძლოთ დაწინაურება. თუმცა ივიცა ოლიჩმა არაერთი საგოლე შანსი ვერ გამოიყენა. ოლიჩის ერთი დარტყმისას ლუის ფერნანდესის გუნდი აშკარა გოლისგან ძელმა იხსნა. კრანჩარმა იოსიპ შიმუნიჩის წაქცევისთვის დანიშნული პენალტით გახსნა ანგარიში. 41-ე წუთზე კი სტუმრებმა საჯარიმოში კარგად შენიშნეს კრანჩარი, რომელმაც ერთი მეტოქე ჩამოიშორა და მოჭრილი დარტყმით სხვაობა ორამდე გაზარდა, 0:2.
მეორე ნახევარი ისრაელმა უკეთ ჩაატარა, მაგრამ მოწინააღმდეგე მაინც ვერ დაჯაბნა. მასპინძლები მატჩის გადარჩენას შეეცადნენ, თუმც ანგარიშის მინიმუმამდე შემცირების მეტს ვერ გამორჩნენ: 81-ე წუთზე იტაი შეხტერმა ჩინებული სოლო რეიდი გოლით დააგვირგვინა. მატჩის ბოლო წუთებზე მასპინძლებმა ბოლო შტურმი მოაწყვეს, რომელშიც მეკარე დუდუ ავატიც მონაწილეობდა, მაგრამ ანგარიში აღარ შეცვლილა.
12 ოქტომბერს ისრაელი ბერძნებს სტუმრად ეთამაშება, 17 ნოემბერს კი ხორვატია მალტას უმასპინძლებს.
9 ოქტომბერი
ისრაელი-ხორვატია 1:2
ისრაელი: ავატი, ბენ ჰაიმი, კეინანი, ზივი, ტ. კოენი, ვერმუტი, ნათხო, ა. კოენი (70. გოლსა), ბარდა (56. რაფაელოვი), შეხტერი, ე. კოენი (53. კოლაუტი).
ხორვატია: რუნიე, შიმუნიჩი, ჩორლუკა, შილდენფელდი, სტრანიჩი, კრანჩარი, პრანიჩი, რაკიტიჩი (78. ვუკოევიჩი), მოდრიჩი, ოლიჩი (72. ბილიჩი), ედუარდო (57. მანძუკიჩი).
გოლები: 0:1 კრანჩარი (36-პენ), 0:2 კრანჩარი (41), 1:2 შეხტერი (81)
მაყურებელი: 21 000
თ მ ფ წ ბ ქ
1. ხორვატია 3 2 1 0 5-1 7
2. საქართველო 3 1 2 0 2-1 5
3. საბერძნეთი 3 1 2 0 2-1 5
4. ისრაელი 3 1 1 1 4-3 4
5. ლატვია 3 1 0 2 2-4 3
6. მალტა 3 0 0 3 1-6 0
