სტატისტიკა და ფაქტები: საქართველოს ნაკრები ქეცბაიადან ცხადაძემდე

ევროშესარჩევი ციკლი უკვე ისტორიის კუთვნილებაა. გადავხედოთ, როგორ ითამაშა საქართველოს ნაკრებმა და როგორ გამოიჩინეს თავი ჩვენმა მოთამაშეებმა ამ 10-მატჩიან, 2-მწვრთნელიან და 50-ფეხბურთელიან მარათონში...

ევრო 2016-ის შესარჩევი D ჯგუფი საქართველოს ნაკრებმა მეხუთე ადგილზე დაასრულა (შეგახსენებთ, რომ ის სწორედ მეხუთე კალათში იყო განთესილი) 10 თამაშიდან 3 მოგებით და 7 მარცხით. ჩვენმა ნაკრებმა 10 გოლი გაიტანა და 16 გაუშვა. მთელი 9 ქულით გავასწარით გიბრალტარს, მაგრამ მეოთხე ადგილზე მყოფ შოტლანდიას 6-ით ჩამოვრჩით.

შეგახსენებთ, რომ შოტლანდიის ნაკრებიც საგზურის გარეშე დარჩა. თუმცა, ჩვენთან რომ მოეგო (მარცხის ნაცვლად), ახლა პლეი ოფში ირლანდიის ნაკრების ნაცვლად გავიდოდა.

ეს შესარჩევი ციკლი ჩვენმა გუნდმა ორი მწვრთნელის თავკაცობით ჩაატარა, პირველ ოთხ თამაშზე გუნდი თემურ ქეცბაიამ გაიყვანა (1 გამარჯვება, 3 მარცხი, ბურთები 4:7, 3 ქულა), მომდევნო ექვს თამაშზე კი - კახაბერ ცხადაძემ (2 გამარჯვება, 4 მარცხი, ბურთები 6:9, 6 ქულა).

* ამ შესარჩევ ციკლში ორჯერ მოვახერხეთ ევროპის ჩემპიონატებზე ისტორიაში ყველაზე დიდი ანგარიშით წაგება - ჯერ შინ პოლონეთთან (0:4), შემდეგ სტუმრად იმავე გუნდთან (0:4).
* ევროპის ჩემპიონატებზე ყველაზე მეტი თამაში: ლევან კობიაშვილი - 31. მოქმედ ფეხბურთელებში: ზურაბ ხიზანიშვილი - 26.
* ევროპის ჩემპიონატებზე ყველაზე მეტი გოლი: შოთა არველაძე - 16. მოქმედ ფეხბურთელებში: ჯაბა კანკავა - 4.

* ნაკრების ბომბარდირი თორნიკე ოქრიაშვილია - 3 გოლი.
* ნაკრების 10 გოლი 5-მა ფეხბურთელმა გაიტანა.
* საქართველოს ნაკრების მაისურა 38-მა ფეხბურთელმა მოირგო.
* მატჩების განაცხადებში კიდევ 12 ისეთი ფეხბურთელი მოხვდა, რომელთაც მოედანზე გასვლამ 1 წუთითაც არ მოუწია.
* ნაკრების ყველაზე ხანდაზმული ფეხბურთელი დავით კვირკველია 35 წლისაა.
* ნაკრების ყველაზე ახალგაზრდა ფეხბურთელი გიორგი პაპუნაშვილი 20 წლისაა. ის თვეებით უმცროსია მათე ცინცაძეზე, ლაშა დვალსა და ოთარ კაკაბაძეზე.
* ყველაზე მეტი დრო გაატარეს მოედანზე: უჩა ლობჟანიძემ (810 წუთი), ჯაბა კანკავამ (777) და საბა კვირკველიამ (720).
* მხოლოდ 10 წუთი ითამაშა ავთო ებრალიძემ, 14-14 წუთი ლადო დვალიშვილმა და მათე ცინცაძემ.
* ყველა თამაშში მონაწილეობა მიიღო მხოლოდ თორნიკე ოქრიაშვილმა. 9-9-ში - უჩა ლობჟანიძემ და ჯაბა კანკავამ.
* 10-მა ფეხბურთელმა მხოლოდ თითო მატჩში მიიღო მონაწილეობა.
* სასტარტო შემადგენლობაში 9-9 მატჩი ითამაშეს ჯაბა კანკავამ და უჩა ლობჟანიძემ.
* ყველაზე ბევრჯერ შეცვლაზე შევიდა გიორგი ჭანტურია: 4-ჯერ.
* ყველაზე მეტჯერ შეცვალეს თორნიკე ოქრიაშვილი: 5-ჯერ.
* ყველაზე მეტჯერ სათადარიგოთა სკამზე (მოედანზე შეუსვლელად) იყო ბაჩანა ცხადაძე: 6-ჯერ.
* ნიკა კვეკვესკირის ანგარიშზე 2 საგოლე პასია.
* 2-2 ყვითელი ბარათი მიიღეს ბუბა დაუშვილმა, თორნიკე ოქრიაშვილმა, გიორგი ნავალოვსკიმ და ჯაბა კანკავამ.

* საშუალოდ 1 გოლი მატჩში საშუალოზე ცუდი მაჩვენებელია.
* საშუალოდ 1,6 მიღებული ბურთი ასევე საშუალოზე ცუდი მაჩვენებელია.
* გოლების შეფარდება -6 დაახლოებით საშუალო მაჩვენებელია.
* ნაკრებმა მეტოქეთა კარისკენ ზუსტად 100-ჯერ დაარტყა (საშუალოდ 10 დარტყმა). 38 დარტყმა კარში წავიდა, 46 ასცდა, 16 დაიბლოკა, 3 ძელს მოხვდა.
* ნაკრებმა გააკეთა 3 966 პასი, აქედან 3 468 ზუსტი (87%).
* ნაკრების ბურთის ფლობა - 48%.
* ნაკრებმა ჩამოაწოდა 44 კუთხური, მისმა მეტოქეებმა - 64.
* ნაკრების ფეხბურთელები 18-ჯერ მოხვდნენ თამაშგარეში.
* ნაკრები 108-ჯერ დაჯარიმდა და 111-ჯერ მის წინააღმდეგ იუხეშეს.
* ნაკრების ფეხბურთელებმა 19 ყვითელი ბარათი მიიღეს.

როგორც ვთქვით, ორმა მწვრთნელმა გაიყვანა ამ შესარჩევ ციკლში საქართველოს ნაკრები: პირველ ოთხ თამაშში - თემურ ქეცბაიამ, ბოლო ექვსში - კახა ცხადაძემ.

ქვემოთ გთავაზობთ ცხრილს, თუმცა გასათვალისწინებელია ის, რომ ცხადაძეს ორჯერ მოუწია მსოფლიოს ჩემპიონ გერმანიასთან დაპირისპირებამ, რის გამოც საშუალო მაჩვენებელი სერიოზულად გაუფუჭდა.




(იბეჭდება მცირე ცვლილებით)
ყოველდღიური სპორტული გაზეთი "ლელო"