[ლეგიონი] დანიაში ოთარ კაკაბაძისა და ბუდუ ზივზივაძის დებიუტი შედგა [VIDEO]

27 თებერვალს რამდენიმე ქართველმა ლეგიონერმა ითამაშა.

დანიის პირველობაზე სამი ქართველის "ესბიერგი" გასვლაზე "ლუნგბიუს" დაუზავდა - 0:0. სტუმართა გუნდში ორი ქართველის დებიუტი შედგა. ოთარ კაკაბაძემ 90 წუთი ითამაშა და ყვითელი ბარათი მიიღო, ბუდუ ზივზივაძე კი 67-ე წუთიდან ჩაერთო თამაშში.

"ესბიერგის" მესამე ქართველი ლაშა პარუნაშვილი გუნდს მომდევნო ტურიდან დაეხმარება.

დანიაშივე, მათე ვაწაძე თავის ყოფილ კლუბ "ორჰუსს" დაუპირისპირდა. მატჩი 1:1 დასრულდა. ქართველი ფორვარდი "ვიბორგის" ძირითად შემადგენლობაში იყო. ის მე-60 წუთზე შეცვალეს.

საფრანგეთის რანგით მეორე ლიგაში "რეიმსი" შინ ლიდერ "ბრესტს" დაუზავდა - 1:1. მასპინძელთა სასტარტო შემადგენლობაში იყო საქართველოს ნაკრების კაპიტანი ჯაბა კანკავა, რომელმაც ბოლომდე ითამაშა.

პოლონეთის ექსტრაკლასაში "რუხმა" შინ 2:0 მოუგო "შლიონსკს". სტუმართა შორის სათადარიგო იყო ლაშა დვალი, რომელსაც ბოლო დროს სათამაშო პრაქტიკა აკლია.

აზიის ჩემპიონთა თასზე ტაშკენტის "ლოკომოტივმა" შინ 2:0 მოუგო დუბაის "ალ აჰლის". შეუცვლელად ითამაშა მასპინძელთა ქართველმა საყრდენმა კახა მახარაძემ. არაბულ გუნდში კი განელი ვარსკვლავი ასამოა გიანი ვიხილეთ.

აზერბაიჯანის ჩემპიონატში "ნეფთჩიმ" გასვლაზე 1:0 მოუგო აზალ-ს. გამარჯვებულთა შორის სრულად ითამაშა საქართველოს ნაკრების მცველმა გიორგი ნავალოვსკიმ.

(იბეჭდება მცირე ცვლილებით)
ყოველდღიური სპორტული გაზეთი "ლელო"