ლეგიონის უქმეები: გიორგი ჭანტურია საკონტროლოშიც ბრწყინავს

სანაკრებო პაუზისას ლეგიონის დიდი ნაწილი ან უქმობს, ან ნაკრებებში ირჯება, თუმცა არიან გამონაკლისებიც...

გერმანიის II ბუნდესლიგაში პაუზაა და ამიტომ ლუკას ჰუფნაგელმა "ფრაიბურგის" მეორე გუნდში ითამაშა რეგიონალლიგის მატჩში.

"ფრაიბურგმა" სტუმრად 2:1 მოუგო "ჰოფენჰაიმის" დუბლებს. ჩვენებურმა 90 წუთი ითამაშა და 68-ე წუთზე გამარჯვების გოლიც გაიტანა.

ჰუფნაგელისგან განსხვავებით, ამხანაგურ მატჩში გამოიჩინა თავი გიორგი ჭანტურიამ, რომლის "დუისბურგიც" "კიოლნს" 4:4 დაუზავდა.

ჭანტურიამ 65-ე წუთზე ანგარიში 4:3 გახადა. მანამდე, მე-60 წუთზე "დუისბურგმა" მისი პასით გაათანაბრა. ლაშა დვალი ახალგაზრდულ ნაკრებშია გამოძახებული.

ბელგიის მეორე დივიზიონში ლევან შენგელიას "ტუბიცემ" შინ 2:1 მოუგო "დეინცეს" და 20 ქულით მესამე ადგილზეა. ქართველი ლეგიონერი საქართველოს 21-წლამდელთა ნაკრებშია გამოძახებული.

პოლონეთის მეორე დივიზიონში დავით მაქარაძემ "სუვალკიში" პირველი გოლი გაიტანა, მაგრამ მისი გუნდი შინ 1:2 დამარცხდა "გლოგოვთან".

გიორგი ალავერდაშვილის "ზავიშამ" შინ 0:3 წააგო "ზაბკისთან". ჩვენებური მატჩის განაცხადში არ იყო.

პორტუგალიის მეორე ლიგაში ავთო ებრალიძემ 90 წუთი ითამაშა "ჟილ ვისენტესა" და "პენაფიელის" მატჩში, რომელიც ჩვენებურის გუნდმა 1:0 მოიგო.

რუსეთის I დივიზიონში ქართველთა "სკა-ენერგია" 1:1 დაუზავდა "ორენბურგს". კახა ალადაშვილი (46-ე წუთიდან, გაფრთხილება) და გოჩა ხოჯავა (38-ე წუთიდან) შეცვლაზე შევიდნენ.

ზურაბ არზიანი და დავით ხურციძე "არმავირის" სასტარტოში იყვნენ "ენისეისთან" 1:3 წაგებულ შეხვედრაში. ირაკლი გეფერიძე კი ლევან ჯღარკავას ნაცვლად შევიდა.

"სკა ენერგიაც" და "არმავირიც" დივიზიონის აუტსაიდერები არიან.

ჩრდილოამერიკის სოკერ ლიგაში ზურაბ ცისკარიძე "სან ანტონიოს" სათადარიგო იყო, მისმა გუნდმა კი სტუმრად 2:1 მოუგო "ინდი ილევენს".

იტალიაში ირაკლი შეყილაძის (90 წუთი) "ტუტოკუოიო" სტუმრად "პიზასთან" 0:1 დამარცხდა.

ყოველდღიური სპორტული გაზეთი "ლელო"