ფედერაციის პრესსამსახურის ცნობით, მალე საფეხბურთო სკოლებს კატეგორიები მიენიჭებათ. ფედერაციაში საფეხბურთო სკოლების ლიცენზირების კომისია შარშან ჩამოაყალიბდა, საკლუბო ლიცენზირების განყოფილებამ კი შეიმუშავა კატეგორიზაციის დებულებები, რომელიც ყველა დაინტერესებულმა მხარემ მოიწონა და დაამტკიცა.შექმნილმა ქვეკომისიებმა მუშაობა ორი მიმართულებით დაიწყეს: სფფ-ის ექსპერტები და სკოლების ასოციაციები სამართლებრივ, საკადრო, ფინანსურ და ინფრასტრუქტურულ საკითხებზე მუშაობდა, ფეხბურთის სპეციალისტების მონაწილეობით კი სპორტული საკითხების დახვეწა მიმდინარეობდა.
სკოლებთან ურთიერთობა რეგიონული ფედერაციების საშუალებით ხორციელდებოდა, რომელთაც 2011 წლის დასაწყისში რეგიონში არსებული საფეხბურთო სკოლებისთვის გადასაცემი მასალები დაურიგდათ.
ამჟამად ფედერაციასთან სხვადასხვა ფორმით 144 საფეხბურთო სკოლა თანამშრომლობს,
კომისიის დასკვნა ბავშვთა ფეხბურთში არსებულ მძიმე მდგომარეობაზე მეტყველებს:
"საფეხბურთო სკოლების აბსოლუტურ უმრავლესობაში გამოვლინდა ძალიან მძიმე სურათი. ეს ეხება სპორტულ, ინფრასტრუქტურულ, სამართლებრივ და საკადრო საკითხებს, რომ არაფერი ვთქვათ ფინანსურ მდგომარეობაზე. სკოლების ეფექტური ორგანიზების შემთხვევაში. არსებული ფინანსებითაც უფრო მეტის გაკეთებაა შესაძლებელი.
კომისიას მიაჩნია, რომ, უპირველესად, უნდა მოწესრიგდეს სამართლებრივი საკითხები, კერძოდ, აღიარებენ თუ არა საფეხბურთო სკოლები სფფ-ის იურისდიქციას, რათა შემდგომ სფფ-მ განახორციელოს ფეხბურთის განვითარებასთან დაკავშირებული ქმედებები.
ამ ქმედებებიდან ყველაზე პრიორიტეტულია საბჭოური პერიოდიდან შემორჩენილი არასწორი მოდელის აღმოფხვრა: ზოგადი სპორტული დაწესებულებების განყოფილებების ნაცვლად საფეხბურთო სკოლების ცალკე იურიდიულ პირებად ჩამოყალიბება; ერთი იურიდიული პირის მიერ ცალ-ცალკე დაფუძნებული საფეხბურთო სკოლების და კლუბების გაერთიანება ერთიანი საფეხბურთო პოლიტიკის გასატარებლად, რადგან აბსოლუტურად გაუგებარია, რას უნდა ემსახურებოდეს რეგიონში საფეხბურთო კლუბისგან განცალკევებით ფუნქციონირებადი საფეხბურთო სკოლა, თუ არა ამავე კლუბისთვის კადრების მომზადებას" - წერია ფედერაციის ცნობაში.
კომისიამ საფეხბურთო სკოლების წინასწარი შეფასება დაიწყო და ვარსკვლავის მინიჭების 20 კანდიდატი გამოავლინა:"ოლიმპი", "ოლიმპიკი", თ. სულაქველიძის აკადემია, "ველაჯიოს" საფეხბურთო კომპლექსი - "ავაზა", 35-ე საფეხბურთო სკოლა, "მერანი", "მთვარის გლობუსი", "ნორჩი დინამოელი", "ლოკომოტივი", "ამერი" (ყველა - თბილისი), "ჩიხურას" აკადემია (საჩხერე), თერჯოლის სკოლა, ქუთაისის #94 ფეხბურთის სკოლა, "იმედი", "კოლხიდა", "ბაია" (ზუგდიდი), მარტვილის და ფოთის საფეხბურთო სკოლები, "ადელი" (ბათუმი), "ლუკა" (ბათუმი).
თუმცა კომისიის დასკვნაში მითითებულია, რომ სია საბოლოო არ არის და დასახელებული სკოლები მოთხოვნებს ერთნაირად ვერ აკმაყოფილებენ. სკოლებისთვის ვარსკვლავების დამტკიცების პროცესი გაგრძელდება მეორე ეტაპზეც, სექტემბრიდან 2012 წლის მაისამდე.
შემოწმების შედეგად კანდიდატებს შეიძლება მიენიჭოთ პირველი ან უფრო მაღალი კატეგორიის ვარსკვლავი ან პირიქით - გაუუქმდეთ კანდიდატის სტატუსი და დარჩნენ შეფასების გარეშე.
"გვესმის, რომ სკოლებს არ ულხინთ, მაგრამ ელემენტარული პირობები ყველამ უნდა დააკმაყოფილოს, ჰყავდეთ ლიცენზირებული მწვრთნელები, სტადიონზე აუცილებელია საშხაპეები, გასახდელები. ამავე დროს, აუცილებელია სამედიცინო პუნქტი, ბავშვებს დახმარება დროულად რომ გაუწიონ", - აცხადებს ფეხბურთის ფედერაციის გენერალური მდივანი რევაზ არველაძე.
საინტერესოა, რომ ლიცენზირების კანდიდატი სკოლებიდან 10 თბილისშია, ხუთი - იმერეთში, სამი - სამეგრელოში და ორი აჭარაში. ანუ არც ერთი სკოლა არ აკმაყოფილებს მინიმალურ მოთხოვნებს საქართველოს უმეტეს რეგიონში - შიდა და ქვემო ქართლში, გურიაში, კახეთში, რაჭა-ლეჩხუმ-სვანეთში... გუშინ ამ საკითხზე ფედერაციის აღმასკომზეც ილაპარაკეს.
გამოცანად რჩება, ასეთი კატასტროფული მდგომარეობის შემდეგ კიდევ როგორ იზრდებიან ეროვნული და ასაკობრივი ნაკრებების მომავალი თაობები. როდესაც 144 მოქმედი სკოლიდან ლიცენზირების მინიმალურ მოთხოვნებს მხოლოდ 20 აკმაყოფილებს, ამ ვითარებას მართლაც შეეფერება სიტყვა "კატასტროფა".
ყოველდღიური სპორტული გაზეთი "ლელო"
