საქართველოს თავდაცვის სამინისტრო კალათბურთის და რაგბის კლუბებს პატრონობს და საკმაოდ წარმატებითაც. ბაჩო ახალაიას უწყების პატრონაჟით 2011 წლის მარტის ბოლოს ჩამოყალიბდა მორაგბეთა გუნდი "არმია" და დაარსების წელსვე დიდ წარმატებას მიაღწია: გახდა საქართველოს ჩემპიონი და თასის მფლობელი, გაიმარჯვა შვიდაკაცა რაგბის ჩემპიონატში.საკალათბურთო კლუბი "არმია" კი 2010 წელს დაარსდა და ამ მოკლე დროში უკვე სამი თასის მფლობელი გახდა: 2011 წლის თებერვალში საქართველოს თასს დაეუფლა, მაისში - სუპერლიგის თასს, მაისის ბოლოს კი - ოთარ ქორქიას სახელობის სუპერთასს, გახდა ქვეყნის ჩემპიონი და ევროთასებზე (ევროჩელენჯზე) პირველად
მოკლედ, "არმია" ორივე სახეობაში საკმაოდ წარმატებული და კარგად დაფინანსებული პროექტი აღმოჩნდა. ამას კი იმიტომ ვიხსენებთ, რომ ყოველივეს ლოგიკური გაგრძელება უნდა გახდეს საფეხბურთო "არმიას" ჩამოყალიბება. ამაზე თავდაცვის სამინისტროში ფიქრობენ - ყოველ შემთხვევაში, საფეხბურთო სამყაროსთვის ცნობილია, რომ თავდაცვის სამინისტრო კლუბის დაფინანსებას აპირებს.
თავდაპირველად ლაპარაკი იყო "არმიას" "გაგრასთან" გაერთიანებაზე. ეს გუნდი ჩვენს ჩემპიონატში რიგითი მნიშვნელობისა არ არის, თავდაცვის სამინისტროს კი საკალათბურთო და სარაგბო კლუბები ნულიდან არ შეუქმნია, ორივე გარკვეულ საფუძველს ემყარებოდა: მორაგბეები "უნივერსიტეტს" გაუერთიანდნენ, კალათბურთელები კი - რუსთავის "აზოტს".
"გაგრაში" თავდაცვის სამინისტროს ინტერესს ადასტურებენ, მაგრამ ამავე დროს განგვიმარტეს, რომ კლუბების გაერთიანება ერთ-ერთი ვარიანტი იყო და არა გადაწყვეტილი პროექტი, კონკრეტული მოლაპარაკება კი მხარეებს არ დაუწყიათ. მეტიც, ბოლო დროს სამინისტროდან კლუბს არავინ შეხმიანებია.
ერთ-ერთი ვერსიით, სამინისტრომ, შესაძლოა, აიყვანოს არა კერძო "გაგრა", არამედ საბიუჯეტო გუნდი, მაგალითად, ცხინვალის "სპარტაკი" (რომელიც ხაშურში გადასვლას და იქაური სტადიონის განახლებას აპირებს) ან ბოლნისის "სიონი". "სპარტაკის" პრეზიდენტმა დიმიტრი სანაკოევმა ეს ხმები უარყო, ასეთივე პასუხი მივიღეთ "სიონისგანაც".
მაშ, რამდენად რეალურია ეს ინფორმაციები? ცნობების გადამოწმება თავდაცვის სამინისტროში ვცადეთ, მაგრამ ამ საკითხზე ლაპარაკს ჯერ ერიდებიან. სამინისტროს სპორტულ სამსახურს ცნობილი პაროდისტი, ფეხბურთის დიდი გულშემატკივარი ბესო ბერულაშვილი ხელმძღვანელობს, რომელმაც ორაზროვანი პასუხი გაგვცა:
"საფეხბურთო კლუბ "არმიას" ჩამოყალიბებაზე ჯერ ლაპარაკი არ არის და, ცხადია, "გაგრასაც" არ შეუერთდება. თუ სამინისტრო საკუთარი გუნდის ჩამოყალიბებას გადაწყვეტს, ის აუცილებლად ცალკე დაარსდება".
ყოველდღიური სპორტული გაზეთი "ლელო"
